سەيسەنبى ەلدەگى ساياسي اۋىس-تۇيىستەرمەن باستالدى. پرەزيدەنت اكىمشىلىگىنىڭ باسشىسى نۇرلان نىعماتۋللين لاۋازىمىنان بوساپ، ماجىلىسكە باردى. پا-گە استانا اكىمى ادىلبەك جاقسىبەكوۆ بارادى دەگەن سىبىس بار. بۇعان دەيىن جاقسىبەكوۆ پرەمەرلىككە دايىندالىپ جاتىر دەگەن دە اڭگىمە شىققان.

ال، استانا اكىمدىگىنە ينۆەستيسيا جانە دامۋ ءمينيسترى، كەزىندە ۆيسە-پرەمەرلىكتى دە الىپ جۇرگەن اسەت يسەكەشيەۆ تاعايىندالماق دەيدى اقوردا اينالاسىنداعى جورامالشىلار. نەسى بولسا دا جاقىن ارادا بەلگىلى بولادى. ازىرگە ن. ءنىعماتۋليننىڭ ءماجىلىس دەپۋتاتتىعىن، ب. ىزمۇحامبەتوۆتىڭ «ارداگەرلەر ۇيىمىنىڭ» جەتەكشىلىگىنە سايلانعانى تۋرالى عانا ەرسمي اقپارات تاراۋدا. جورامالشىلار ن. ءنىعماتۋليننىڭ ءماجىلىس سپيكەرلىگىنە سايلاناتىنىن، ال، ب. ىزمۇحامبەتوۆ ارداگەرلەر اراسىنا بارعانىمەن، دەپۋتاتتىق مانداتىن تاپسىرا قويمايتىنىن بولجاعان ەدى.  

ەندىگى ءبىر قىزىق بولجام – پرەمەر-مينيستر كارىم ءماسىموۆتىڭ تاعدىرى. سوڭعى ءبىر ايعا جۋىق ۋاقىتتا ۇكىمەت باسشىسىنا اقپارات قۇرالدارى ارقىلى ەداۋىر شابۋىلدار جاسالۋدا. «قوي اۋزىنان ءشوپ الماس» كەيبىر جۋاس باسىلىمدارعا دەيىن پرەمەرگە قاراتا قاھار كورسەتۋىنەن-اق ءبىراز نارسەنى تۇسىنۋگە بولادى. كوپتەن بەرى اقپاراتتىق الاڭدا كورىنبەي كەتكەن پرەمەر-مينيستردىڭ قايتادان توبە كورسەتۋىن، وڭىرلەرگە ساپارلاۋىن دا «كەزدەيسوق بەلسەندىلىك» دەي المايسىز.

بيلىك اينالاسىنداعى ساراپشىلار ەل ىشىندەگى قوعامدىق-ساياسي كوڭىل-كۇيدىڭ مۇقيات زەرتتەلىپ وتىراتىنىن، ءاربىر ساياسي شەشىم، ونىڭ ىشىندە كادرلىق تاعايىنداۋلار دا بار، سول حالىقتىڭ كوڭىل-كۇيىن ەسكەرە وتىرىپ جاسالاتىنىن ايتادى. وسى لوگيكاعا سالساق، كارىم ءماسىموۆ شىنىمەن ورنىنان بوسايتىن بولسا، قازاقستاندا وعان لايىق دەيتىن قانداي لاۋازىم بار. بىرنەشە دۇركىن پرەمەر بولعان ادامدى «حالىق بانكتىڭ» باسشىلىعىنا قويا قويماس. پارلامەنتتىڭ اينالاسىنان دا ەلەستەتە المايمىز ول كىسىنى. دەمەك.... ءيا، ۇيرەنشىكتى ادىسپەن ەلشىلىككە جىبەرۋگە بولادى. ءبىراق، قايدا؟ قىتايعا جىبەرسە، ونسىز دا بىقسىپ جاتقان شالاعا ماي قۇيعانداي بولادى. سوعان قاراعاندا، كارىم ءماسىموۆ ماسكەۋگە تارتۋى مۇمكىن. ال، ول جاقتا 2014 جىلدىڭ اقپانىنان بەرى جۇرگەن مارات ءتاجين ەلگە ورالۋى ءتيىس. مارات ءتاجيندى قازاقستاندىق يدەولوگيانىڭ الداسپانى دەمەسە دە، ۇقىپتى ۇيىمداستىرۋشىسى دەسە بولادى. دەمەك، م. ءتاجيننىڭ رەسەيدە جۇرگەنىنەن قازاقستاندا قىزمەت ەتكەنى الدەقايدا ءتيىمدى. ونىڭ ۇستىنە ەۋرازيالىق وداقتىڭ ۇيىمداستىرۋشىلىق جۇمىستارى اياقالدى. ۇيىم جۇيەلى رەجيمدە جۇمىس ىستەۋدە.

قايتىپ كەلگەندە م. ءتاجين قايدا بارادى؟ پرەزيدەنت اكىمشىلىگىن باسقارادى دەيىن دەسەك ول لاۋازىمدى ادىلبەك جاقسىبەكوۆ «الىپ قويدى». اكىمدىككە قويسا تاعى دا كوزگە قوراش كورىنەدى. ودان دا امبەباپ كادر گۇلشارا ءابدىحالىقوۆانى دەپۋتاتتىققا نە مينيسترلىكتەردىڭ بىرىنە ىسىرىپ، مەملەكەتتىك حاتشىنىڭ پورتفەلىن ۇستاتقان ءجون-اۋ. ويتكەنى، يدەولوگيا ماسەلەسى ەل اۋماعىندا سوڭعى جىلى ايتارلىقتاي اقساپ تۇر. ءبىر عانا م. ءتاجيننىڭ تۋعان جەرى اقتوبەدەگى تەرروريستىك اكتىنىڭ ءوزى بۇل سالادا اتتەگەن-ايلاردىڭ از ەمەستىگىن اڭعارتادى. "سالافيزممەن سوعىس" ناۋقانىنا دا مىقتى ۇيىمداستىرۋشى كەرەك دەگەندەي...  

بۇل ايتىلعانداردىڭ بارلىعى بولجام، ارينە. اينا قاتەسىز ورىندالادى دەۋدەن دە اۋلاقپىز. باستىسى، تاياق جەرگە تاستالدى، ناتيجەسىن ۋاقىت كورسەتەدى.

جومارت ابدوللا ۇلى