الاش ارىستارى تاعى ءبىر جاڭعىرماق. 23 ماۋسىم كۇنى استانا قالاسىنداعى ۇلتتىق كىتاپحانادا «الاش ايتقان اسىل ءسوز» اتتى كىتاپتىڭ تۇساۋكەسەرى وتەدى، - دەپ حابارلايدى Qamshy.kz.

«جاڭا كىتاپ قازاق ەلى تاۋەلسىزدىگىنىڭ 25 جانە الاشوردا ۇكىمەتىنىڭ باسشىسى ءاليحان بوكەيحاننىڭ 150 جىلدىعىنا وراي جارىققا شىعىپ وتىر. سونداي-اق، 1916 جىلعى ۇلت-ازاتتىق كوتەرىلىسىنىڭ 100 جىلدىعىن دا قاپەردەن شىعارعانىمىز جوق. جيناققا ۇلت كوسەمى ءاليحان بوكەيحاننان باستاپ سماعۇل ءسادۋاقاسۇلىنا دەيىنگى 25 الاش ارىستارىنىڭ وي-تولعامدارى مەن قاناتتى سوزدەرىن توپتاستىرىپ بەرىپ وتىرمىز. وسى رەتتە 25 الاش ارىستارىن ىرىكتەپ، ولاردىڭ قاناتتى سوزدەرىن جاريالاۋىمىزدىڭ تەگىن ەمەستىگىن ايتا كەتكەن ءجون. ويتكەنى، بيىل تاۋەلسىزدىگىمىزدىڭ 25 جىلدىعى، وسىعان وراي وقىرمان قاۋىمعا 25 الاش ارىسىنىڭ قاناتتى سوزدەرىن سىي رەتىندە تارتۋ ەتۋدى الدىمىزعا ماقسات ەتىپ قويدىق. بۇل باستامانى 2 جىل بۇرىن شىمكەنتتە قىزمەتتە جۇرگەندە قولعا العان ەدىم»، - دەيدى جوبا اۆتورى بەرىك ءۋالي.

جوبا اۆتورى الاش ارىستارىنىڭ توم-توم ەڭبەكتەرىن اقتارىپ، ءىنجۋ-مارجان سوزدەردى ىرىكتەگەن جۋرناليست سەرىك جولداسباي مەن تاريحشى ەركىن ەرلانۇلىنا، كىتاپتىڭ جارىق كورۋىنە قولداۋ كورسەتكەن بەكەن قونىسوۆ پەن ەركەبۇلان قۇرمانعالييەۆكە العىسىن بىلدىرەدى.

«وكىنىشكە قاراي، ءوز قايراتكەرلەرىمىزدىڭ قاناتتى سوزدەرىن قاپەردەن شىعارىپ الىپ جاتامىز. ايتپەسە ءاليحان بوكەيحان ايتقان قاناتتى سوزدەر اتاتۇرىك پەن دجوردج ۆاشينگتوننان ەش كەم ەمەس. ايتالىق، ۆاشينگتون: «ەلىم ماعان نە بەرەدى دەپ ەمەس، مەن ەلىمە نە بەرەمىن» دەپ ويلاۋىمىز كەرەك؟» دەسە، ءاليحان بوكەيحان: «ءتىرى بولسام، حان بالاسىندا قازاقتىڭ حاقىسى بار ەدى، قازاققا قىزمەت قىلماي قويمايمىن» دەيدى. ۇندەستىك بار ما؟ بار. جالپى كىتاپتى پاراقتاپ قاراپ شىقساڭىز، «اپىراي، ءا» دەگىزەتىن قاناتتى سوزدەر وتە كوپ» دەيدى بەرىك ءۋالي. مۇنى كىتاپقا پىكىر جازعان بەلگىلى الاشتانۋشى – عالىم تۇرسىن جۇرتباي دا ايتىپ وتىر.

مىنە، وسىنداي قۇندى كىتاپتى وقيمىن دەسەڭىز، الماتى قالاسىنداعى «ەل شەجىرەسى» باسپاسىنا حابارلاسىڭىز (اباي داڭعىلى 143، كابينەتتەر: 403، 413. تەل؛ 394-42-04، 394-42-91).

سونداي-اق، كىتاپتى شىمكەنتتە بەكەن قونىسوۆتان، استانادا سەرىك جولداسبايدان «الاش ايتقان اسىل ءسوز» كىتابىن ساتىپ الۋىڭىزعا بولادى. ال، استانالىق اعايىندى «الاش ايتقان اسىل ءسوز» اتتى كىتاپتىڭ تۇساۋكەسەرىنە شاقىرامىز. تۇساۋكەسەر 23 كۇنى ساعات 11:00 –دە  استاناداعى ۇلتتىق كىتاپحانادا وتەدى. ەگەر وقىرمان تاراپىنان قىزىعۋشىلىق بولىپ جاتسا، اتالمىش كىتاپتىڭ تۇساۋكەسەرىن الاشتىڭ استاناسى اتانعان سەمەيدەن باستاپ باسقا قالالاردا دا وتكىزۋگە مۇمكىندىك بار.