سايتىمىزدا الماتىداعى «اقكەنت» تۇرعىن ءۇي كەشەنىندە ورىن العان جاعداي تۋرالى بۇعان دەيىن دە جازعان بولاتىنبىز. وسىعان وراي، «Ayt Housing Complex»  تومەندەگىدەي جاۋاپ حات كەلدى.

الماتىدا «اقكەنت» تۇرعىن ءۇي كەشەندەگى پاتەر اقىسىن تولەمەيتىندەر پاتەرلەرىنەن شىعارىلدى. 17 ماۋسىم كۇنى ءاليا قاراتايەۆنا ەليۋكەنوۆا، ۇلجان ءابدىقايىموۆنا بەردييەۆا، اننا الەكساندروۆنا سابۋروۆانى ماجبۇرلەپ پاتەردەن شىعارۋ بويىنشا سوت شەشىمى ورىندالدى.

«Ayt Housing Complex» كومپانياسىنىڭ زاڭگەرى گۇلجان ساپرونوۆانىڭ حابارلاۋىنشا 2010 جىلعى 25 قازاندا ءاليا قاراتايەۆنا ەليۋكەنوۆا «اقكەنت» پرەميۋمدى تۇرعىن ءۇي كەشەنىندە ەكى بولمەلى پاتەردى ساتىپ الۋ ءۇشىن سوماسى 23،7 ملن. تەڭگەنى قۇرايتىن شارت جاساسقان. جوعارىدا كورسەتىلگەن سومانىڭ 4،8 ملن. تەڭگەسىن، ياعني 20% عانا تولەگەن.

ا.ك. ەليۋكەنوۆا اتالعان پاتەردە تۇرىپ كەلە جاتقانىنا 67 اي بولعان. بۇل رەتتە، 2 بولمەلى پاتەردى جالعا الۋ قۇنى ورتا ەسەپپەن 80 مىڭ تەڭگەنى قۇرايدى. ياعني اتالعان تۇرعىن ۇيدە 5 جىل تۇرۋ شىعىنى شامامەن 5 ملن. تەڭگەدەن استام قاراجاتتى قۇرايدى.

سونداي-اق، ا.ك. ەليۋكەنوۆانىڭ مەنشىگىندە استانا قالاسىندا پاتەرى جانە «لادا» ماركالى اۆتوكولىگى بار.

بۇدان باسقا ەرتەرەكتە ا.ك. ەليۋكەنوۆانىڭ جەكە مەنشىگىندە 2 ءۇي جانە 1 پاتەرى بولعان.

كەيبىر مالىمەتتەرگە سايكەس ا.ك. ەليۋكەنوۆا مەملەكەتتىك ورگانداردا قىزمەت ەتىپ، 2015 جىلدىڭ جەلتوقسان ايىنا دەيىن باسپانا الۋعا ارنالعان «باسپانالىق تولەماقىلار» الىپ وتىرعان. اتالعان 20 ملن. تەڭگە سوماسىنداعى تولەماقىلار استانا قالاسىنان پاتەر ساتىپ الۋعا جۇمسالعان. بۇل فاكتى بويىنشا 2016 جىلعى 11 اقپاندا قىلمىستىق ءىس قوزعالدى.

2013 جىلعى 11 جەلتوقساندا بەردييەۆا ۋلجان ابديكايموۆنا «اقكەنت» پرەميۋمدى تۇرعىن ءۇي كەشەنىنەن 17.3 ملن. تەڭگەگە 1 بولمەلى پاتەر ساتىپ الۋ جونىندە «Ayt Housing Complex» كومپانياسىمەن كەلىسىمشارتقا وتىرعان. كورسەتىلگەن سۋممادان تەك (باستاپقى جارنا) 4%-عانا – 608 مىڭ تەڭگە تولەنگەن.

ۋ. بەردييەۆا اتالعان پاتەردە تۇرىپ جاتقانىنا 29 اي بولعان. الايدا بۇل اۋداندا 1 بولمەلى پاتەردى ورتاشا جالعا الۋ قۇنى 60 تەڭگە شاماسىندا، ياعني جوعارىدا كورسەتىلگەن مەرزىمدە 1.7 ملن. تەڭگە شىعىندى قاجەت ەتەدى.

سونداي-اق، ۋ. بەردييەۆانىڭ الماتى قالاسىندا پاتەرى، Hyundai County اتتى 2 ماشيناسى، Iveco TurboDaily، Toyota Camry، Mercedes-Benz 410، Mitsubishi Galant، Hyundai SuperAero City ماركالى 7 بىردەي اۆتوكولىكتەرى بار.

وسىعان قوسا ۋ. بەردييەۆا «اقكەنت» پرەميۋمدى تۇرعىن ءۇي كەشەنىندەگى پاتەرىن جالعا بەرىپ، ءوزى باسقا مەكەن-جايدا تۇرادى.

2013 جىلعى 26 جەلتوقساندا سابۋروۆا اننا الەكساندروۆنا «اقكەنت» پرەميۋمدى تۇرعىن ءۇي كەشەنىنەن 33 ملن. تەڭگەگە 3 بولمەلى پاتەر ساتىپ الۋ جونىندە «Ayt Housing Complex» كومپانياسىمەن كەلىسىمشارتقا وتىرعان. كورسەتىلگەن سۋممادان تەك (باستاپقى جارنا) 2%-عانا – 684 مىڭ تەڭگە تولەنگەن.

ا.ا. سابۋروۆا وسى پاتەردە تۇرىپ جاتقانىنا 29 اي بولعان. بۇل اۋداندا 3 بولمەلى پاتەردى ورتاشا جالعا الۋ قۇنى 100 000 تەڭگە شاماسىندا، ياعني جوعارىدا كورسەتىلگەن مەرزىمدە 2.3 ملن. تەڭگە شىعىندى قاجەت ەتەدى.

سونداي-اق، ا.ا. سابۋروۆانىڭ الماتى قالاسىندا پاتەرى، Subaru Legacy جانە «Volkswagen Touareg» اۆتوكولىكتەرى بار.

قۇرمەتپەن، ولجاس مۋحيتوۆ

«Ayt Housing Complex» ج ش س مەنەدجەرى