ينۆەستيسيالار جانە دامۋ ءمينيسترى بولىپ جەڭىس قاسىمبەك تاعايىندالدى، - دەپ حابارلايدى Qamshy.kz اقوردا سايتىنا سىلتەمە جاساپ.

«جەڭىس ماحمۇد ۇلى قاسىمبەك قازاقستان رەسپۋبليكاسىنىڭ ينۆەستيسيالار جانە دامۋ ءمينيسترى بولىپ تاعايىندالسىن»، - دەلىنگەن پرەزيدەنت جارلىعىندا.

اتالعان لاۋازىمعا تاعايىندالعانعا دەيىن ج. قاسىمبەك اتالعان مينيسترلىك باسشىسىنىڭ ءبىرىنشى ورىنباسارى قىزمەتىن اتقارعان.

ج. قاسىمبەك 1975 جىلى جامبىل وبلىسىندا دۇنيەگە كەلگەن. ماماندىعى – ساۋلەتشى-ديزاينەر. 2001 جىلى ل. گۋميليەۆ اتىنداعى ەۋرازيا ۇلتتىق ۋنيۆەرسيتەتىن «مەملەكەتتىك جانە جەرگىلىكتى باسقارۋ» ماماندىعى بويىنشا دا ءتامامداعان.

ەستەرىڭىزگە سالساق، بۇرىنعى ينۆەستيسيا جانە دامۋ ءمينيسترى اسەت يسەكەشيەۆ استانا قالاسىنىڭ اكىمى بولىپ تاعايىندالدى. ال، استانانىڭ بۇرىنعى اكىمى ادىلبەك جاقسىبەكوۆ پرەزيدەنت اكىمشىلىگىنىڭ باسشىسى بولىپ تاعايىندالسا، ن. نىعماتۋللين پرەزيدەنت اكىمشىلىگىنىڭ جەتەكشىسى لاۋازىمىنان بوساپ، «نۇر وتان» پارتياسى اتىنان ءماجىلىس دەپۋتاتى بولىپ تىركەلدى. ن. نىعماتۋللين بۇعان دەيىن قاراعاندى وبلىسىنىڭ اكىمى، «نۇر وتان» حدپ ءتوراعاسىنىڭ ءبىرىنشى ورىنباسارى، ءماجىلىس سپيكەرى سىندى لاۋازىمداردى اتقارعان بولاتىن.

ءماجىلىستىڭ بۇرىنعى ءتوراعاسى ب. ىزمۇحامبەتوۆ «ارداگەرلەر ۇيىمى» رقب جەتەكشىلىگىنە سايلاندى.