جۋرناليست اردابەك سولداتباي ءدىنتانۋشىلار زىكىريا جانداربەك پەن قايرات جولدىبايۇلىن «بيلىككە جەتۋ ءۇشىن ەلباسىعا قارسى كوتەرىلىپ، ەلدە جاپپاي جازالاۋ ساياساتىن جۇرگىزۋدى قولدايدى» دەپ ايىپتاپ وتىر، - دەپ حابارلايدى Qamshy.kz.
«زىكىريا جانداربەك سالافيتتەردى نەگە جەك كورەدى؟ سەبەبى، سالافيتتەر بۇلىككە، ميتينگكە، فيتناعا قارسى. ال، سوپىلىق-زىكىرشىلىك جولدى ۇستانعاندار قالاي دا ءبىر بيلىككە جەتۋدى كوزدەيدى. ول ءۇشىن ءدىندى ءوز ىڭعايلارىنا قاراي بۇرىپ، ءداستۇرلى قازاقى ءدىن نەمەسە ارابتىڭ ءدىنى دەپ ءبولىپ الادى. بيلىككە جەتۋ ءۇشىن ەلباسىعا قارسى كوتەرىلىپ، ەلدە جاپپاي جازالاۋ ساياساتىن جۇرگىزۋدى قولدايدى. وزدەرىمەن پىكىرى ساي ەمەستەردى تۇگەلدەي اتىپ-اسىپ، تۇرمەگە جابۋعا دايىن»، - دەگەن ا. سولداتباي ەلدە «سوپىلار» دەپ اتالاتىن ءدىني اعىمنىڭ دا قولداۋشىلارى از ەمەستىگىن ايتادى.
«بۇل سەكتانتتاردى ءار كەز ءتۇرلى قىزمەت اتقارىپ كورگەن، ءبىراق ءاردايىم ساتسىزدىككە ۇشىراعان، جەكەلەگەن باسشىلاردىڭ كەسىرىنەن جۇمىستان قۋىلعان، كارەراسى وسپەي ىشىنە قان قاتىپ قالعان، ال بىلاي دىنگە ەش قاتىسى جوق، اراعىن ءىشىپ، زيناسىن جاساپ جۇرگەن «بەلسەندىلەر» ءوز سايتتارى، باق-تارى ارقىلى قولدايدى. ءۇريت سوق دەيدى. ولار وزدەرىنە ناقتى ءجابىر كورسەتكەندەردىڭ قولىندا ءالى بيلىگى بولعان سوڭ ولارعا ۇندەي الماي، ءتاۋحيدتى تاستاي قىلىپ ۇستانعان مۇسىلماندارعا تيىسەدى. ايتەۋىر ءبىر جاۋ تاۋىپ، ىشتەگى قىجىلدارىن شىعارىپ الماقشى. وزدەرى ويناس جاساپ ايرانداي ۇيىپ وتىرعان وتباسىنىڭ شىرقىن بۇزىپ، وزگەنىڭ ايەلىنىڭ ءھام باسقانىڭ بايىنىڭ قوينىندا جاتىپ كوپ ايەل الاتىن مۇسىلماندارعا تيىسەدى. ەشقايسىسىن ەشقاشان جۇمىستان قۋعان، قىسىم كورسەتكەن ءسالاف جوق. ءبىراق جاۋلارى ءسالاف. سەبەبى، قاشان دا شايتاننىڭ جاۋى تاۋحيد ۇستانۋشىلار»، - دەيدى ا. سولداتباي.
ا. سولداتبايدىڭ سىنىنان قازاقستانعا تانىمال ءدىنتانۋشى-عالىم، islam.kz سايتىنىڭ باس رەداكتورى قايرات جولدىباي دا شەت قالماعان. ونى جۋرناليست «پاتشاعا قارسى كوتەرىلگەندەردى شاھيدكە تەڭەدى» دەپ وتىر.
«زىكىريا جانداربەك سەكىلدى حالىقتى ازدىرىپ، اداستىرىپ، جىكتەپ، ءبولىپ، بىر-بىرىنە ايلاپ سالاتىن زىكىرشى-سوپىلار - قازاقتىڭ باستى جاۋى. بۇلاردىڭ تاعى ءبىرى قايرات جولدىباي ۇلى كەزىندە پاتشاعا قارسى كوتەرىلىسكە شىعىپ ولگەن ادامداردى شاھيدكە تەڭەپ ەدى، ەندى ناماز وقىماساڭ وقىماي-اق قوي، ودان كاپىر بولىپ كەتپەيسىڭ دەپ ونسىز دا يمانى ءالسىز جۇرتتى الداپ، ازدىرىپ ءجۇر. مۇندايلاردى ادامنىڭ ىشىنەن شىققان شايتاندار دەيدى. ول شايتانىڭ ءتىپتى عۇلاما اتانىپ ءجۇرۋى مۇمكىن. سوندىقتان، كىمگە ەرىپ، كىمدى تىڭداپ جۇرگەندەرىڭىزدى ءبىلىپ الىڭىزدارشى الدىمەن»، - دەيدى ا. سولداتباي.
بۇل جۋرناليست اردابەك سولداتبايدىڭ العاش رەت شۋلى مالىمدەمە جاساۋى ەمەس. بۇعان دەيىن دە ول سالافيزم يدەياسىن اقتاپ، ساياساتتانۋشى ايدوس سارىممەن ءسوز تالاستىرعان بولاتىن. ال، جاقىندا ا. سولداتباي ەلىمىزدەگى ءدىن ىستەرى جونىندەگى كوميتەتتى تاراتۋ كەرەك دەگەن ۇسىنىس تاستادى.
