تارازدا تاسقىننان جۇزدەگەن ءۇي تاسقىن سۋدىڭ استىندا قالدى. اسىرەسە تالاس وزەنى ماڭىنداعى مىڭداعان ۇيگە ءقاۋىپ ءتوندى. تۇرعىندار اپات جايىندا الدىن الا دابىل قاققانمەن، اكىمدىك ارەكەتسىز بولدى دەيدى. ال جاعداي ۋشىققان سوڭ، قۇتقارۋشىلاردىڭ كەش كەلگەن كومەگىنەن قايىر جوق دەپ اشىنادى.

تاراز قالاسىنداعى تەكتۇرماس ايماعى تۇگەل ارالعا اينالدى. سۋ الماعان ساۋ جەر قالماعان. جۇرت جينالعان سۋدى شاماسى جەتكەنشە شەلەكتەپ تە ارنايى كولىكپەن سورعىزىپ تا كورۋدە. ءبىراق بۇل ارەكەتتەن بەرەكەت جوق، - دەپ حابارلايدى Qamshy.kz 31-ارناعا سىلتەمە جاساپ.

كوپشىلىك كولكىگەن سۋدىڭ كولگە اينالۋىنا، قىرعىزستانداعى كيروۆ سۋ قويماسىنان سۋ مولشەرىنىڭ شامادان تىس بوساتىلۋى سەبەپ ەكەنىنە سەنىمدى.

ليدا تۋتكينا، تاراز قالاسىنىڭ تۇرعىنى:

- قىرعىزداعى سۋ قويماسى سۋ جىبەردى. سول تالاستان بىزگە جەر استىنان سۋ كوتەرىلىپ جاتىر.+ جۇما كۇنىنەن باستاپ جەر استىنان سۋ كوتەرىلىپ جاتىر. مىنە التىنشى كۇن بولدى. جاڭبىردان ەمەس.

ال توتەنشەلىكتەر تالاس وزەنىن جاعالاي جايعاسقان جۇرتتىڭ جاعدايىن جاڭبىر سۋىمەن بايلانىستىرادى. ءقازىر كوتەرىلگەن سۋدى تومەندەتۋ ءۇشىن قالاعا كىرەتىن بارلىق ارىق كانالدار تولىق بىتەلگەن. الايدا جەر استى سۋى ازايار ەمەس.

ومار تاكەيەۆ، جامبىل وبلىستىق توتەنشە جاعدايلار دەپارتامەنتىڭ توتەنشە جاعدايلاردى الدىن الۋ ءبولىمىنىڭ باستىعى:

- قازىرگى جاعداي مىنا ءۇش كوشەنىڭ تومەنگە تۇسپەۋى ول درەناج كانالىنىڭ سۋ وتكىزۋ تومەندىگىنەن. سونداي-اق تۇرعىندارىنىڭ وزدەرى قوقىستاردى تاستاپ كانالدىڭ جابىلۋ وقيعالارى بولىپ جاتىر.

ال ارناسىنان اسقان تالاس بوگەت بۇزىپ، جارىن جىرىپ ۇيلەرگە جاقىنداپ قالعان. ماسەلەن مىناۋ جەكسەنبى كۇنگى جاعداي. تالاس ەندى تاسىپ جاتقاندا تۇرعىندار تالابىمەن ءتۇسىرىپ العانبىز. ءتورت كۇننەن كەيىنگى كورىنىس مىناۋ. وزەن كوشەنىڭ ءبىر بولىگىن شايىپ كەتىپ، قورانىڭ ىرگەسىنە تاياعان. ارى قاراي ءۇيدى اعىزىپ كەتپەس ءۇشىن اكىمدىك بارىن سالۋدا. ءبىراق كەشىگىپ جەتكەن كومەكتەن قايىر از دەيدى كوپ. دابىل قاققان ەلدىڭ ءسوزى دەر كەزىندە ەسكەرىلگەندە بۇلاي بولمايتىن ەدى دەيدى تۇرعىندار.

گۇلبايرا تۋلەبەكوۆا، تاراز قالاسىنىڭ تۇرعىنى:

- كورىپ تۇرىپ ءبىز ايتتىق. قاراڭىزشى دەپ. سىزگە ءالى جاۋ كەلمەيدى دەدى. قورىقپاي قويىڭدار دەدى. مىنا جەردى وپىرىپ جاتقان سول كەزدە. ءسويتىپ كەتتى، سودان جوق. ەرتەسى ءبىر ساعاتتا سۋ ۇيىمىزگە جەتىپ كەلدى. جانارمايىن قۇيىپ بەرسەكتە، اس اۋقاتتاندىرىپ بەرسەكتە كەلمەي قويدى اكىمشىلىك.

سوڭعى ون كۇندىكتە عالامتور جەلىسىندە قىرعىستانداعى كيروۆ سۋ قويماسى جارىلادى دەگەن اقپار جەلدەي ەسىپ ءجۇر.  تەك بۇگىن عانا توتەنشە جاعدايلار مينيسترلىگىنىڭ وكىلى بۇل جايتتىڭ جالعان ەكەنىن جاريالادى. مالىمدەمەدە اتالمىش سۋ قويماسى 550 ملن تەكشە مەتر سۋدى سىيدىرا الاتىنى ايتىلعان. بىرەر كۇن بۇرىن سۋ مولشەرى وسىعان شامالاسىپ قالسا ءقازىر 532 ملن-دى قۇراپ وتىر. ەسەسىنە سەكۋندىنا 170 تەكشە مەتر سۋ جامبىلعا قاراي بوساتىلۋدا. سونىڭ سالدارىنان تالاس وزەنى تاسىپ، جاعاسىنداعى جۇرتقا ءقاۋىپ ءتوندىرىپ تۇر.