جامبىل وبلىسىنىڭ تۇرعىندارى قىزىل سۋمەن الىسىپ الەككە ءتۇسىپ جاتىر. تالاس ارناسىنان اسىپ، جۇزدەگەن ءۇيدىڭ اۋلاسىن باسىپ قالعان. اسىرەسە وزەن جاعالاي جايعاسقان جۇرت جانىن شۇبەرەككە ءتۇيىپ وتىرۋعا ءماجبۇر. سەبەبى كۇن وتكەن سايىن اساۋ وزەننىڭ جيەگى ورىلىپ، باسپانالارعا ۇلكەن ءقاۋىپ توندىرۋدە. ال شەنەۋنىكتەر اپاتتى جاعدايدىڭ تۋىنداۋىن قىرعىزستانداعى كيروۆ سۋ قويماسىنان كوپ مولشەردە سۋ جىبەرىلۋىمەن تۇسىندىرەدى، - دەپ حابارلايدى Qamshy.kz كتك ارناسىنا سىلتەمە جاساپ.

تالاستان اققان اساۋ سۋ تۇرعىنداردىڭ ەسىنىن الدى. ءقازىر وزەن ارناسىنا سىيماي، وسى ماڭداعى ەل-جۇرتتى الەككە سالۋدا. ماسەلەن، تەكتۇرماس ايماعىنداعى جۇزگە جۋىق ءۇيدىڭ اۋلاسىن سۋ باسىپ قالعان. قاراشا جينالعان سۋدان قۇتىلا الماي زار جىلاپ وتىر.

تالاستى جاعالاي قونىستانعان تۇرعىندار ءبىر جەتىدەن بەرى كىرپىك ىلمەي ءجۇر. ويتكەنى وزەننىڭ جيەگى كۇن ساناپ جىرىلىپ، ۇيلەردى شايىپ كەتۋ ءقاۋىپى تۇر. ەكپىنمەن اققان سۋدىڭ كۇشتىلىگى سونشا، تالدى تامىرىمەن قوپارۋدا.

گۇلبايرا تۇلەكبەكوۆا، تاراز قالاسىنىڭ تۇرعىنى:

-مىنا تالاستان 20 مەتر قاشىقتىقتا ەدىك. 20 مەتر قاشىقتىڭ ءبىر-اق ساعاتتا ۇيىمىزگە جەتىپ كەلدى. سول اناۋ جەردە تۇرعاندا ءبىز اكىمدىكتەن كومەك سۇرادىق. مىنا تالاستىڭ جاعاسىن ءبىز، كۇندىز-تۇنى قاراۋىلدايمىز. ۇيىقتامايمىز ءبىز تۇنىمەن.

ال، جاۋاپتى ماماندار جاعدايدىڭ ۋشىعۋىن قىرعىزستانداعى كيروۆ سۋ قويماسىنداعى سۋدىڭ شەكتى دەڭگەيگە جەتۋمەن تۇسىندىرەدى. ونداعى سۋ ەرنەۋىنەن اسىپ، تارازدى باسىپ قالماس ءۇشىن، تالاس وزەنى ارقىلى كوپ مولشەردە سۋ بوساتىلعان ەكەن. ءبىراق شۋ-تالاس باسسەيننىڭ باسشىسى توتەنشە جاعدايدىڭ بولۋىنا قىرعىزستانداعى ارىپتەستەرىن كىنالاۋدا. ياعني، بيىل جاۋىن-شاشىننىڭ جىلداعىدان كوپ ەكەنىن بىلە تۇرا، دەر كەزىندە تالاستان سۋ تاستالماعان. ال، وزدەرى ەسكەرتۋلەرىن ەلەمەگەن ايىرقالپاقتى اعايىنداردىڭ ارەكەتىن تۇسىنبەي دال.

جۇمابەك مۇحاتايەۆ، شۋ-تالاس باسسەيىندىك ينسپەكسياسىنىڭ باسشىسى:

-ولار ءبىزدى تىڭدامادى، سۋدى قىسىپ جىبەرمەي قويدى. ال، سۋ قويماسى ابدەن تولدى. ءبىر اي بۇرىن دابىل قاعىپ، بىرنەشە رەت حات جازدىق، تىم-تىرىس جاتىپ الدى. سودان ءبىر كۇنى ەسكەرتپەستەن سۋدى جىبەرە سالدى. ءوزىمىز تالاس ارقىلى سەكۋنتىنا 70-80 تەكشە مەتر سۋ قابىلداپ جۇرسەك، ولار 210 تەكشە مەتردى بوساتا سالدى. نەگە بۇلاي ەتكەندەرىن تۇسىنبەدىك.   

دەگەنمەن قوس تاراپتىڭ تۇسىنىسپەۋشىلىگى ۇكىمەتتىك دەڭگەيدە شەشىلىپتى. ءقازىر تالاس ارقىلى سەكۋندىنا 150 تەكشە مەتر سۋ تاستالۋدا. ءبىراق، ونىڭ ءوزى جۇرتتىڭ مازاسىن قاشىرىپ وتىر.  

كيروۆ سۋ ساقتاۋ قويماسىنىڭ جالپى سىيىمدىلىعى 550 ملن. تەكشە مەتر. وسىدان ونشاقتى كۇن بۇرىن مۇنداعى سۋدىڭ دەڭگەيى 548 ملن. تەكشە مەترگە دەيىن كوتەرىلىپ، تومەندەگى تاراز قالاسىنا ۇلكەن ءقاۋىپ توندىرگەن. اپاتتان قاۋىپتەنگەن ماماندار تالاس وزەنى ارقىلى قويماداعى سۋدى تومەن قاراي تاستاعان. ياعني، سودان بەرى مۇنداعى سۋدىڭ دەڭگەيى 530 ملن. تەكشە مەترگە تومەندەدى. ءقازىر ەشقانداي ءقاۋىپ جوق دەپ سەندىرەدى اتقارۋشى بيلىك.