قازاقستاننىڭ ۇلتتىق ەكونوميكا ءمينيسترى قۋاندىق بيشىمبايەۆتىڭ حالىقپەن ەسەپ بەرۋ كەزدەسۋى بارىسىندا 2016-2017 جىلدارى ەكونوميكالىق ءوسۋدى ىنتالاندىرۋ جانە جۇمىسپەن قامتۋدى قامتاماسىز ەتۋ جونىندەگى قوسىمشا شارالار جوسپارى تۋرالى ايتتى، - دەپ حابارلايدى Qamshy.kz. ۇەم باسپا ءسوز قىزمەتىنە سىلتەمە جاساپ.

«نۇرلى جول» مەملەكەتتىك باعدارلاماسى شەڭبەرىندە ينفراقۇرىلىمدىق جوبالاردى جانە ەكونوميكانىڭ باسىم سالالارىنداعى ينۆەستيسيالىق جوبالاردى ىسكە اسىرۋدى جەدەلدەتۋ بويىنشا جۇمىس كوزدەلگەن.

«اعىمداعى جىلعى قىركۇيەك ايىندا 2016 جىلعا ارنالعان رەسپۋبليكالىق بيۋدجەت ناقتىلاتىن بولادى، ول كىرىستەر بويىنشا بولجامدى ۇلعايتۋدى جانە 2015 جىلدىڭ پايدالانىلماعان قاراجاتىن تارتۋدى كوزدەيدى. 144،5 ملرد. تەڭگە كولەمىندەگى قوسىمشا قاراجات 2016 – 2017 جىلدارى ەكونوميكانىڭ وسۋىنە مۋلتيپليكاتيۆتىك اسەرى بار «نۇرلى جول» مەملەكەتتىك باعدارلاماسىنىڭ شەڭبەرىندە ينفراقۇرىلىمدىق جوبالاردى ىسكە اسىرۋدى جەدەلدەتۋگە، اگروونەركاسىپتىك كەشەن جانە وڭدەۋ ونەركاسىبىنىڭ جوبالارىن قارجىلاندىرۋعا باعىتتالاتىن بولادى» - دەدى بيشىمبايەۆ.

بۇدان باسقا، 2016 جىل سوڭىنا دەيىن ەكونوميكانىڭ ءوسۋىن قاتاماسىز ەتۋ ءۇشىن «نۇرلى جول» مەملەكەتتىك باعدارلاماسى جانە 2016 جىلعى داعدارىسقا قارسى قوسىمشا شارالار جوسپارى شەڭبەرىندە جوسپارلانعان قاراجاتتى پايدالانۋ تيىمدىلىگىن ارتتىرۋ جوسپارلانىپ وتىر.

ءتۇرعىن-ۇي قۇرىلىسىنا بولىنگەن 70،3 ملرد تەڭگە مولشەرىندەگى ۋاقىتشا بوس قاراجات جانە 85،1 ملرد. تەڭگە مولشەرىندەگى بجزق-ڭ  قاراجاتى (بارلىعى 155،3 ملرد تەڭگە) اينالىم كاپيتالىن قارجىلاندىرۋعا، «بايتەرەك» ۇبح» اق ارقىلى 2017 جىلدىڭ ماۋسىمىنا دەيىن قايتارۋىمەن قايتا وڭدەي ونەركىسىبىن ەكسپورت الدى جانە ەكسپورتتىق نەسيەلەۋگە باعىتتالاتىن بولادى.

ەكونوميكانىڭ وسۋىنە جىلدام اسەر ەتۋ ءۇشىن ا.ج. ەكىنشى جارتىجىلدىعىندا ىشكى سۇرانىستى ىنتالاندىرۋعا ۇكىمەتتىڭ ارنايى رەزەرۆى ەسەبىنەن 91،5 ملرد. تەڭگە باعىتتالاتىن بولادى.

سونىمەن قاتار، ءونىم شىعارۋدىڭ قىسقارۋى بايقالىپ وتىرعان ەكونوميكا سالالارىندا ءوندىرىس كولەمىنىڭ ءوسۋىن قامتاماسىز ەتىلەدى.

«جالپى وڭدەۋ ونەركاسىبىندە ءوسۋدى ىنتالاندىرۋ ءۇشىن ماگيسترالدىق تەمىرجول جەلىسى جانە ەلەكتر ەنەرگياسى قىزمەتتەرىنە ۋاقىتشا تومەندەتۋ كوەففيسيەنتىن، جەڭىلدىكتى شارتپەن اينالىم كاپيتالىن، ليزينگتىك قارجىلاندىرۋدى جانە ەكسپورتتىق/ەكسپورتالدى كرەديتتەۋدى ۇسىنۋ جونىندەگى، سونداي-اق سىرتقى ساۋدانى رەتتەۋ شارالارى قابىلداناتىن بولادى» - دەپ حابارلادى بيشىمبايەۆ.

ءمينيستردىڭ پىكىرىنشە وسى شارالار 2016 جىلعى ماۋسىم-شىلدەدە ەكونوميكانىڭ وسۋىنە مۇمكىندىك بەرەتىنى، 2016 جىل قورىتىندىسى بويىنشا - 0،5% دەڭگەيىندە كۇتىلۋدە.