بىرەر كۇن بۇرىن ءوز دەڭگەيىنەن كۇرت كوتەرىلگەن ەرتىس وزەنى قازىرگى كۇنى وسكەمەن جانە سەمەي قالاسىنىڭ تۇرعىندارىنا اسا ءقاۋىپ تۋعىزىپ وتىرعان جوق. وبلىس باسشىلىعى ايتىپ وتكەندەي، سۋ قويماسىنا جينالعان سۋدى دەر كەزىندە جىبەرىپ وتىرعاندىقتان، بۇگىننەن باستاپ وزەننىڭ دەڭگەيى قايتا ءتۇسىپ كەلەدى، - دەپ حابارلايدى Qamshy.kz شقو اكىمىنىڭ باسپا ءسوز قىزمەتىنە سىلتەمە جاساپ.

شىعىس قازاقستان ايماقتىق كومۋنيكاسيالار قىزمەتىندە وتكەن باسپا ءسوز ءماسليحاتىندا شقو اكىمىنىڭ ورىنباسارى ديميتريي گاريكوۆ ايتىپ وتكەندەي، وزەن دەڭگەيىنىڭ كوتەرىلۋىنە قىتايدا جاۋىن-شاشىننىڭ تولاسسىز جاۋۋى سەبەپ بولعان. كەيىن شەكارالاس ايماقتاعى 7 بوگەت تولىپ كەتكەندىكتەن، جىبەرىلەتىن سۋ كولەمى دە ارتقان.

– ەرتىس وزەنىنىڭ دەڭگەيى كوتەرىلىپ، جاعالاۋداعى 57 ساياجايدى سۋ باستى. ءبىراق بۇل ساياجايلار ەشبىر قاۋىپسىزدىك ەرەجەلەرىن ساقتاماي، جاعالاۋعا جاقىن سالىنعان جانە ول جەردە ەشكىم تۇرمايدى. سلاۆسكيي اتىنداعى جاعالاۋدى دا سۋ باستى. ءبىراق بۇگىن ساعات 12 شاماسىندا سۋ دەڭگەيى 40 سم-گە ءتۇستى. سونداي-اق، سۋ باسۋى مۇمكىن ايماقتا ورنالاسقان ۇيلەردەن 105 ازامات ءقاۋىپسىز ايماققا كوشىرىلدى. 18 ماۋسىمداعى كورسەتكىشپەن سالىستىرعاندا، كەلىپ جاتقان سۋ دەڭگەيى 1،5 ەسەگە دەيىن ءتۇسۋ كورسەتكىشى بايقالادى. سوندىقتان بىرەر كۇندە ەرتىس وزەنى ءوز قالپىنا كەلەدى دەگەن سەنىمدەمىز، – دەدى ديميرتيي گاريكوۆ.

ايماق باسشىسىنىڭ ورىنباسارى سونداي-اق، الەۋمەتتىك جەلىلەردەگى قىتايداعى بوگەت جارىلعاندىعى جايلى ءتۇرلى قاۋەسەتتەرگە سەنبەۋگە شاقىردى. ال بەينەجازبالارداعى بوگەتتەگى تاسىپ جاتقان سۋ گيدروەلەكتروستانسياداعى كۇندەلىكتى سۋدى جىبەرۋ ءۇردىسى ەكەندىگىن جەتكىزدى.

– ءشۇلبى، بۇقتىرما سۋ قويمالارىنداعى سۋ دەڭگەيى كوتەرىلگەندىكتەن، جىبەرىلەتىن سۋ مولشەرى دە ارتتى. سوندىقتان الدىن-الا پاۆلودار وبلىسىنىڭ اكىمدىگىن ەسكەرتتىك. دەگەنمەن، ونىڭ ءوزى ءقاۋىپ تۋعىزاتىنداي دەڭگەيگە كوتەرىلمەيدى. ال ءبىزدىڭ گيدروەلەكتروستانسيالارىمىزعا جينالعان سۋ كەيىن كەرىسىنشە ستانسيانىڭ جاقسى جۇمىس ىستەپ، ەلەكتر ەنەرگياسىن وندىرۋگە ءوز سەپتىگىن تيگىزەدى، – دەدى ديميتريي گاريكوۆ