ۇكىمەت وتىرىسىندا ق ر پرەمەر-مينيسترى كارىم ءماسىموۆ قازاقستان اۋماعىنداعى اۋرۋ مالداردىڭ ولەكسەسى كومىلگەن ورىنداردىڭ كۇزەتىن كۇشەيتۋدى تاپسىردى، - دەپ حابارلايدى Qamshy.kz.

«كەشە ءبىز قاراعاندى وبلىسىندا تۇينەمە ماسەلەسى بويىنشا كەڭەس وتكىزگەن بولاتىنبىز. اۋرۋ مالداردىڭ ولەكسەسى كومىلگەن جەرلەردى كۇزەتۋ باقىلاۋدان شىعىپ بارا جاتىر. وسى رەتتەگى جۇمىستاردى تىڭعىلىقتى پىسىقتاۋ كەرەك جانە بۇل باعىتتا ءتيىستى تاپسىرما بەردىم. اسقار يسابەك ۇلى، وسى جۇمىستاردى ۇيلەستىرۋ اكىمدەرمەن بىرگە سىزگە جۇكتەلەدى. ۇكىمەتتىڭ كەلەسى وتىرىسىندا وسى ماسەلەدەن باستايمىز»،-دەدى ك. ءماسىموۆ ۆيسە-پرەمەر-قر اۋىل شارۋاشىلىعى مينيسترىنە قاراتىپ ايتقان سوزىندە.

ءماسىموۆتىڭ سوزىنشە، ەلىمىزدىڭ اۋماعىنداعى مال ولەكسەلەرى كومىلگەن ورىنداردىڭ ناقتى كارتاسى كورسەتىلۋى ءتيىس.

«ولاردىڭ بارلىعى سەنىمدى تۇردە كۇزەتىلۋى كەرەك. اتاپ ايتقاندا، بۇل جۇمىستارعا قارجى بولىنگەن بولاتىن. وسى رەتتە بۇل قارجىنىڭ قايدا جۇمسالعانىن، سونداي-اق بۇل شارالارعا باعىتتالعان قارجىنىڭ يگەرىلۋىنە ءاربىر وبلىستار بويىنشا كىمدەر جەكە جاۋاپ بەرەتىنىن قاراۋ قاجەت»،-دەدى ۇكىمەت باسشىسى.

بۇدان بولەك، ك. ءماسىموۆ وڭىرلەردە ۆەتەرينارلىق قاداعالاۋ ءتيىستى دەڭگەيدە ەمەس ەكەنىن اتاپ ءوتتى. سونىمەن قاتار پرەمەر-مينيستر سانيتارلىق-ەپيدەميولوگيالىق باقىلاۋ قىزمەتىن دەنساۋلىق ساقتاۋ جانە الەۋمەتتىك دامۋ مينيسترلىگىنىڭ باسقارۋىنا بەرۋ شارالارىن قاراستىرۋدى تاپسىردى.