استانادا مەملەكەتتىك ورگاندارداعى جەمقورلىققا قارسى قوعامدىق قوزعالىس قۇرىلدى، - دەپ حابارلايدى Qamshy.kz.

ۇيىمداستىرۋ كوميتەتى ءقازىر ۇيىمنىڭ ناقتى اتاۋىن تالقىعا سالۋدا. وسىنداي قوزعالىس قۇرۋ يدەياسىن العاش بولىپ ۇسىنعان ساياساتكەر سىرىم ابدراحمانوۆ مۇنداي شەشىم قابىلداۋعا استانالىق ادىلبەك مەيراموۆتىڭ وتباسىنداعى جاعداي تۇرتكى بولعانىن ايتادى.

«ءبىز استاناداعى سۇرىلگەن ۇيلەردىڭ ورنىنداعى جەرلەردىڭ ءتيىمدى پايدالانىلۋىن بەلسەندى تۇردە تەكسەرەتىن بولامىز. ءتۇرلى جەمقورلىق سحەمالاردىڭ جۇزەگە اسۋى دا نازاردان تىس قالمايدى. ءار جىلدارداعى اكىمدىكتىڭ قاتىسۋىمەن قۇرىلعان، تاراتىلعان ۇيىمدار، زاڭدى تۇلعالار، مەملەكەت قاراجاتىنىڭ جۇمسالۋىن تالدايمىز»، - دەيدى س. ابدراحمانوۆ.

س. ابدراحمانوۆ استانادا پاتەرى سۇرىلگەلى جاتقان ءا. مەيراموۆتىڭ باسىنداعى جاعدايدى «مەملەكەتتىك تەررور» دەپ باعالاپ وتىر.

«بۇل استانا اكىمدىگى تاراپىنان جاسالىپ وتىرعان «مەملەكەتتىك تەررور» دەسە دە بولادى. كوپبالالى وتباسىنىڭ ءۇيى «مەملەكەت قاجەتتىلىگىنە» دەپ، كوشەنى كەڭەيتۋ ءۇشىن سۇرىلمەكشى، الايدا، بۇل باعىتتاعى قاجەتتى جۇمىستار بۇرىن ءبىتىپ قويعان. ماعان ول جەرگە كوممەرسيالىق نىساننىڭ قۇرىلىسى جۇرمەك دەگەن دە اقپارات جەتىپ جاتىر»، - دەگەن ول قۇرىلعالى جاتقان قوعامدىق قوزعالىستىڭ الەۋمەتتىك ادىلدىك ىزدەگەن قاراپايىم تۇرعىندارعا كومەك كورسەتۋدى عانا ەمەس، بيزنەسىنەن ايرىلعان نەمەسە مەملەكەتتىك ورگاندار مەن شەنەۋنىكتەردەن، ىقپالدى توپتاردان ءتۇرلى قىسىم كورگەن كاسىپكەرلەردىڭ دە قۇقىعىن قورعاۋدى كوزدەيتىنىن ايتىپ وتىر.