پاتشالار اڭعارىندا جۇرگىزىلگەن قازبا جۇمىستارى كەزىندە تابىلعان سۇيەك ءبىزدىڭ زامانىمىزعا دەيىنگى III-IV عاسىرلاردا ءومىر سۇرگەن ايەلگە تيەسىلى، - دەپ حابارلايدى Qamshy.kz Skifnews.kz-كە سىلتەمە جاساپ.

اسا قۇندى جادىگەرلەر ارحەولوگيالىق اۋماقتاعى №2 قورعاننان تابىلدى. عالىمدار بۇل جەردە سەنساسيالىق جاڭالىقتىڭ بولارىن وسىدان ءۇش جىل بۇرىن ايتقان ەكن. تابىلعان ادام سۇيەگىن ارحەولوگتار ساق حانشايىمى ەكەنىن ايتىپ وتىر. ادام مۇردەسىمەن بىرگە عالىمدار قورىمنان ءتۇرلى جادىگەرلەر جانە جەتى جىلقىنىڭ سۇيەگىن دە قازىپ الىپتى. بۇل جەرلەنگەن ايەلدىڭ اسا تەكتى تۇقىمنان ەكەنىن كورسەتەدى دەيدى ولار.

قاتوڭ-قاراعاي اۋدانىنداعى پاتشالار اڭعارىندا وسىمەن بىرنەشە جىل قاتارىنان اۋقىمدى ارحەولوگيالىق قازبا جۇمىستارى جۇرگىزىلىپ كەلەدى. بۇل جەردە الكەي مارعۇلان اتىنداعى ارحەولوگيالىق ينستيتۋتتىڭ باستى عىلىمي قىزمەتكەرى زەينوللا ساماشيەۆ باستاعان وتاندىق جانە شەتەلدىك ماماندار زەرتەۋمەن اينالىسىپ جاتىر.

"ءبىز ءالى قازبا جۇمىستارىن اياقتاعان جوقپىز، ءبىراق تاپقان دۇنيەلەرىمىزدەن دەرەۋ مۋزەي جاساپ جاتىرمىز. مۋزەي عىلىمىندا بۇل العاشقى جاعداي. ەندى بەرەل قورعانى جايلى بارلىق مالىمەتتى، وندا تابىلعان جادىگەرلەر تۋرالى تەك عالىمدار عانا ءبىلىپ قويمايدى، سونىمەن قاتار، بۇكىل قىزىققان ازاماتتاردىڭ دا وعان قولى جەتىمدى. قورعانعا كەلگەن كەز-كەلگەن ادام ءبىزدىڭ اتا-بابالارىمىزدىڭ باي تاريحىنان حاباردار بولىپ، بارلىعىن دا ءوز كوزىمەن كورىپ قايتادى"، - دەيدى ز.ساماشيەۆ.

ايتا كەتەيىك، شقو-دا قازىرگى تاڭدا اسپاناستى مۋزەيىن سالۋ جۇمىستارى ءجۇرىپ جاتىر. نەگىزگى جادىگەرلەردىڭ ءبىرى №2 قورعان بولماق.