تۇركيا ۇلتتىق ءماجىلىسىنىڭ رەسپۋبليكالىق حالىق پارتياسىنان (رحپ) سايلانعان دەپۋتاتى ەرەن ەردەم باسپا ءسوز ءماسليحاتىندا يشيم مۇشەلەرىنە ورىندارى بەلگىلى بولا تۇرا وپەراسيا جاسالماعانىن، تۇركياعا ۇرەي سالعان يشيم مۇشەلەرىنىڭ تۇركيادا 18 مىڭ دوللارعا ەمدەتىلگەنى تۋرالى قۇجاتتاردى كورسەتتى.

رحپ ستامبۋل دەپۋتاتى ەرەن ەردەم وتكىزگەن باسپا ءسوز ءماسليحاتىندا يشيم تەررور ۇيىمى اسكەريلەرىنىڭ تۇركيانىڭ قۇرىلىمى تۋرالى 422 بەتتەن تۇراتىن تىڭدالعان جازبالارىن اشكەرەلەدى.
ەرەن ەردەم بولىسكەن قۇپيا قۇجاتتارمەن قاتار وبلىس قاۋىپسىزدىك كوميتەتىنىڭ انكارا اكىمشىلىگىنە بىلدىرىلگەن قۇجاتتاردى دا اشىقتاپ ءتۇسىندىردى.

ەرەن ەردەم جۇرگىزگەن باسپا ءسوز ءماسليحاتىندا كيليس پەن گازيانتەپتە يشيم اسكەريلەرىنىڭ ەركىن ۇيىم قۇرعانىن، مىڭداعان تەرروريستىڭ تۇركيادان ءوتىپ بارا جاتقاندا بارلىق جول ءجۇرۋ كەستەلەرىنىڭ انىقتالعانىن، الايدا بىردە-بىر وپەراسيا جاسالماعانىن كورسەتەتىن قۇجاتتاردى اشكەرەلەپ كورسەتتى.  ەرەن ەردەم ايشىقتاعان قۇجاتتارعا قاتىستى كيليستە، انتەپتە، تۇركيانىڭ كوپتەگەن قالاسىندا ۇكىمەت كوز جۇما قاراپ وتىرعان جايتتار بارىن، دەپۋتات رەتىندە مىندەتىن ورىنداۋ ءۇشىن وسى قۇجاتتاردى اشىنا تىلگە تيەك ەتتى.

«اكپ (ادىلەت جانە دامۋ پارتياسى) ۇكىمەتىنىڭ قولى قانشالىقتى لاس ەكەنىن كورسەتەتىن قۇجاتتار»

ەرەن ەردەم «سىزگە كورسەتەتىن بۇل قۇجاتتارىم تۇركيا رەسپۋبليكاسىنىڭ قالاي ناشارلاپ بارا جاتقانىن ءارى اكپ ۇكىمەتىنىڭ قولى قانشالىقتى لاس ەكەنىن كورسەتەتىن قۇجاتتار…»– دەدى. ايشىقتالعان قۇجاتتاردا ەردەم «ءابۋ باكىر» دەگەن كودپەن قاۋىپسىزدىك كوميتەتىىزدەۋ سالعان يلحامي بالى اتتى الدەكىمنىڭ تۇركيا يشيم تەررور ۇيىمى شابۋىلدارىن جوسپارلاعانىن ايتتى ءارى سول كىسىگە قاتىستى تەلەفونداعى اڭگىمەلەردى ءبولىستى.

«تەلەفونداعى بۇل اڭگىمەلەرىندە تەرروريستەردىڭ قاي قوناقۇيگە تۇسكەنى، قاي جەردە كولىك كۇتكەنى، كولىكتەرىنە قاي جەردەن بەنزين قۇيعانى، قايدا توقتاپ، كيليستە قاي مەشىتتە جينالاتىنى، قانشا كىسىنىڭ قاي جەرگە بارىپ-كەلەتىنىنە دەيىن بارلىعى جازىلعان. وسىلاردىڭ بارلىعىن بىلە تۇرا قارسى ەشقانداي وپەراسيا جاسالماعان. قاراپايىم جاي عانا ءبىر سۇراق سۇرايىن: «بۇل تەرروريستەردى نەگە تۇتقىندامادىڭدار؟» دەپ يشيم تەرروريستەرىن ەركىنسىتىپ قويۋعا ءوزىنىڭ قارسىلىعىن ءبىلدىردى.
تەلەفونداعى اڭگىمەلەردى بولىسكەن ە.ەردەم: «مىنە، ولاردىڭ تەلەفونداعى اڭگىمەلەرى سۇمدىق. قۇقىق قورعاۋ ورگاندارى بۇلاردى تىڭداپ، جازىپ العان. قاراڭدار، يلحامي بالى دەگەن تەررور بىلاي دەپ سۇراپتى: «...، سەنەن قانشا كىسى شىقتى؟» شەكارادان قانشا كىسىنىڭ وتكەنىن سۇراپ تۇر. وعان «175 ادام شىقتى» دەپ جاۋاپ بەرگەن. ول قايتادان «جوق، مەن كىرگەن ادامداردى سۇراپ جاتىرمىن» دەگەندە، «1128 ادام» دەپ جاۋاپ بەرگەن. سانداردى كورىپ تۇرسىزدار ما؟ تۋرا 1128 كىسىنى ءبىر پارتيادا ورنى بەلگىلى ءبىر مەكەنجايدان بارىپ الىپ كەتكەن. ءبىراق ەشكىم قارسى وپەراسيا ۇيىمداستىرماعان. بۇدان دا سۇمدىعى، اڭگىمە كەزىندە ول تەلەفوننان ستروبوسكوپقا تاپسىرىس بەرگەن. تۋرا ءبىر سۋپەرماركەتتە ساۋدا جاساپ تۇرعانداي، تەك پوليسيا مەن جوعارعى دەڭگەيدەگى قىزمەتكەرلەر قولدانا الاتىن ستروبوسكوپقا تاپسىرىس بەرۋدە. باقىلاۋ جاعى ءنول. وتە ءبىر تراگيكومەديا اڭگىمەلەر جۇرگەن. تەرروريستىڭ ءبىرى قالاي شىعاتىنىن سۇراعاندا، وعان دا ەگجەي-تەگجەيلى مالىمەت بەرىلگەن، ال قۇقىق قورعاۋ ورگاندارى بولسا، بارىنە كوز جۇما قاراعان. ايتقان جەرىڭە كەلدىم، مۇنايدىڭ الدىندا تۇرمىن. سيرياعا كەتكەندەر شەكارادان وپ-وڭاي وتۋدە. ولار راككادا قارۋ مەن اسكەري جاتتىعۋدان وتەدى، سودان كەيىن كەلىپ تۇركيادا قىرعىن جاسايدى»، – دەدى.

«قۇجاتتاردا انكارا مەن سۋرۋجداعى قىرعىندى يلحامي بالىنىڭ جوسپارلاعانى جازىلعان»

يشيم اسكەرلەرىنە قاتىستى ونداعان ەسكەرتۋلەر مەن كىنا تاعاتىن اكت دايىندالعانىن ايتقان ەردەم قۇقىق قورعاۋ ورگاندارىنىڭ بۇل كىسىلەرگە باعىتتالعان بىردە ءبىر وپەراسيا جاساماعانىن ءارى بۇل كىسىلەردىڭ ەمىن-ەركىن جۇرگەنىن ايتتى. انكارا اكىمشىلىگىنىڭ وبلىستىق قاۋىپسىزدىك باسقارماسىنا حابار بەرىلگەن قۇجاتتاردى كورسەتكەن ەردەم  «يلحامي بالىنىڭ انكارا مەن سۋرۋج قىرعىنىن جوسپارلاعانى جانە قارۋ-جاراق جيناعانى قۇجاتتاردا جازىلعان. قاۋىپسىزدىك كوميتەتى ولاردى تاكپىرشى سامانپازارى توبى رەتىندە جۇيەلەگەن. بۇل قۇجاتتاردا كيليستەن توپ-توپ ادامداردىڭ قالاي شەكارادان وتكەنى جازىلعان. كيليستە مەشىتتەردىڭ الدى İETT اۆتوبۋس (ستامبۋل ەلەكتريكتى ترامۆاي مەن تۋننەل اۆتوبۋستارى) ايالدامالارى سەكىلدى جۇمىس ىستەۋدە. بۇلاردىڭ بارلىعىن دا ۇكىمەت ءبىلىپ وتىر. الگى اڭگىمەدە «تۇرىك مۇنايلارى مەن ەكىنشى پوشتانى وتكىزدىك» دەگەن ءسوز وتەدى. ياعني بارلىق ورىندارى مەن كوورديناتتاردى ءبىلىپ العان. GSM تەلەفوندارى تىركەلگەن. وسىنشالىقتى سەلت ەتپەۋشىلىككە ايتار ءسوزىم جوق. تەلەفوندا وتكىزۋ جۇمىستارى دەگەن اتپەن مەملەكەتتىك قىزمەتكەر سەكىلدى جۇمىس ىستەپ جاتقان ۇيىم بارى بايقالادى. ءبىر كىسى تەرروريستەردىڭ بىرىنە «انتەپتىڭ ورتالىعىندامىن. بەلكيس قوناقۇيىندەمىن» دەۋدە. ءاي، قاۋىپسىزدىك كوميتەتى، سەن قايدا قاراپ وتىرسىڭ؟! ءاي، ادىلەت ءمينيسترى، سەن قايدا قاراپ وتىرسىڭ؟! ءاي، اكپ ۇكىمەتى، سەن قايدا قاراپ وتىرسىڭ؟! بۇلار ءدال ءقازىر راككادا قارۋمەن جاتتىعۋ وتكىزۋدە. بۇل قۇجاتتاردا جۇزدەگەن ادرەس، تەلەفون جازبالارى جانە مالىمەتتەر بار»، – دەدى.

يشيم تەرروريستەرى ۆيدەو ءتۇسىرىپ تۇركياعا سەس كورسەتكەننەن كەيىن تۇركياعا كەلىپ ەمدەلگەن

ءابۋ حانزالانىڭ بوستاندىققا شىققانىن ەسكە سالعان ەردەم: «تەلەفون ارقىلى ءبىر تەرروريست «تاكۆاحابەر» تۋرالى ءسوز ەتۋدە. ول ءوزىنىڭ سايت رەداكتورى ەكەنىن ايتۋدا. بۇل اقپاراتتىق سايت ءابۋ حانزالانىكى، الگى وتكەندە بوستاندىققا شىققان ءسوز جۇزىندە ءيشيم-نىڭ باسشىسى. «تاكۆاحابەر»-دە شانلىۋرفادان سيرياعا تەرروريست جىبەرگەنىنە قاتىستى تەلەفوننان تىڭدالعان ونداعان اڭگىمە بار. ەندى ادىلەت مينيسترىنەن سۇرايمىن، ءابۋ حانزالانى بوستاندىققا شىعارعان سوتقا تەرگەۋ امالى جۇرگىزىلە مە؟ بۇل قۇجاتتاردا يشيم تەرروريستەرىنىڭ بارلىعى دا تۇركيادا ەمدەلگەنى جايلى ايتىلادى. ەمدەۋ شىعىندارى قالاي وتەلگەنى ءسوز بولۋدا. 10 مىڭ دوللار، 20 مىڭ دوللار، وسىنداي كولەمدەگى قاراجاتپەن تەرروريستەردىڭ قاي ەمحانادا، قانداي دارىگەرلەردەن ەم قابىلداعانى كورسەتىلۋدە. مۇحاممەد ءابۋ تۇركي ۆيدەولارى ارقىلى تۇركيانى قورقىتۋ ارەكەتىن جاساعان تەرروريستىڭ كەيىن شەكارادان ءوتىپ، ەم قابىلداعانىن، 18 مىڭ دوللار جۇمسالعانىن جازعان. سول ەمحانالار مەن دارىگەرلەرگە قاتىستى بىردە-بىر تەرگەۋ جۇرگىزىلگەن ەمەس. تاكسيم الاڭىندا مالىمەت تاراتقان ادامداردى تۇتقىنداۋعا ساناسى جەتكەندەر مىنالاردى نەلىكتەن تۇتقىنداماۋدا. بۇل بايقاماي قالۋشىلىق ەمەس، قاساقانا جاسالعان ءىس. بارلىق مالىمەت قولدارىڭدا، ءبىراق شارا قولدانبايسىڭدار. دەمەك، سەندەر تەررورلىق ۇيىمداردىڭ اراسىن ءبولىپ- جارىپ وتىرسىڭدار» دەدى.

«بارلىعى دا تىڭدالدى، ءبىراق بىردە-بىر وپەراسيا جاسالمادى»

ەردەم قۇجاتتاردى كورسەتىپ: «بۇل 422 بەتتىك قۇپيا قۇجاتتاردا كورىپ وتىرعاندارىڭىزداي،  سۇمدىق اڭگىمەلەر بار. تەلەفوندا يشيم-دىكتەر اراسىندا مىناداي «اعا، مۇندا 10 كىسى كۇتىپ تۇر، ولاردى الدىرتايىق، پالەن ەمحانادا جارالى بولىپ جاتىرمىز، تاۋىق بازارىندا تۇگەنشە دەگەن توپ كۇتىپ تۇر، وتشاشقىش قارۋلار مەن اۆتوماتتاردى الدىم، شەكارادان وتەمىز» دەگەندەي اڭگىمەلەر بار. بارلىعى دا تىڭدالعان، ءبىراق ەشقانداي ارەكەت جاسالماعان. بۇل سۇمدىق نارسە، اشىقتان-اشىق يشيم-گە كوز جۇما قاراۋ دەگەن ءسوز. مۇنداي قۇجاتتار ادەتتە ۇلكەن داۋ تۋعىزادى» دەدى.

ەرەن ەردەم ادىلەت ءمينيسترى بەكير بوزداعقا: «مۇرت قويۋ ساياساتكەر بولۋعا جەتكىلىكتى ەمەس» دەدى

بەكير بوزداعتىڭ تەررورلىق ارەكەتكە بىلە تۇرا كوز جۇما قاراعانىن ايتقان ەردەم «مۇرت قويۋمەن ساياساتكەر بولمايسىڭ، ادىلەتتىلىكتى ساقتايتىن بولساڭ عانا سول ورىندا وتىر-عىن. مۇنداي زاڭسىزدىقتاردى كورمەگەنىڭە قاراعاندا ءوز ىسىڭە ولاقسىڭ. ورنىڭدى بوسات. تەرروريستەر وت قارۋمەن، اۆتوماتپەن كيليس جاقتان شەكارا كەسىپ وتۋدە. ۇكىمەتتەگىلەر ولاردىڭ تەلەفونداعى سوزدەرىن تىڭداپ وتىر، ءبىراق ەشقانداي شارا قولدانار ەمەس. ەلىمىزدەگى بالالاردى ءولتىرىپ جاتقاندارعا كوز جۇما قاراۋعا ۇيالمايسىڭدار ما؟» – دەدى.

ەرەن ەردەم ومىرىنە ءقاۋىپ ءتوندىرىپ وتىرعاندار بارىن ايتتى

ءبىر سۇراق ارقىلى ىلعي ولتىرەمىز دەگەن ءقاۋىپ ءتوندىرىپ وتىرعاندار بارىن ايتقان ەردەم دەپۋتات رەتىندە ءوزىنىڭ مىندەتىنە ادال ەكەنىن ءارى شىندىقتى ايتۋدان قورىقپايتىنىن ءبىلدىردى.

دەپۋتات بۇعان دەيىن دە پارلامەنت تورىندە ەل بيلىگىن سيرياداعى سودىرلارعا نەمقۇرايلى قارادى دەپ ايىپتاعان بولاتىن.

http://www.sosyalmanset.com/eren-erdemden-belgeli-kayitli-isid-bombasi-1502h.htm