سەنىڭ عانا
شۋاعىڭدى شاشساڭ كۇنىم بوپ،
شۋاعىڭا شومىلار ەدىم سەنسەڭ.
جانىمدى ۇقساڭ قوشقىل ءتۇنىم بوپ،
سىرىمدى اشار ەدىم وزىڭە سەنسەڭ.
سىلكىدىم مۇڭدى ءوزىڭسىز بولار ەمەس،
جانار الدىنان كەتپەيدى باياعى ەلەس.
وتكەن كۇندەرىم وكىنگەنىمەن كەلمەس.
شىنايى
(سوفيا مارسەل ىزىمەن)
(اق ولەڭ)
الىستا بولساڭ،
جاقىنىم بولارسىڭ،
تىلەۋشىم بولىپ.
سوفيا مارسەل.
شىنايى،
الەمنىڭ كەسكىنىن،
كورسەتەر سوزىنە ەستىنىڭ،
شولدەگەم...
ىزدەگەم...
شىنايى،
كوكتەم جەل لەبىن،
جۇرەكتى تەربەپ سەزىم،
دەر جاندى،
جاسقانباي سەزىن،
ىزدەگەم، كۇندە مەن.
تىلەكتەن مۇنارا تۇرعىزىپ،
جۇرەگىمە جان جىلۋىن سىيعىزىپ،
وڭتۇستىككە جەتكەن ءبىر قوڭىراۋ،
سانامدا تۇنار ماڭگىلىك،
بولار بالكىم، ارمان كوگىمە ماندىلىك.
شىنايى،
سەزىمدى سەزدىم اعالىق،
بايقالدى بويىنان دانالىق.
شىنايى،
جىلى ءسوزىن ەتتىم جان ازىق،
سانام سىلكىندى كەتكەن ازىپ.
شىنايى،
جۇرەكتى اڭعاردىم جالىندى،
تانىدىم ءور بولمىس، نار ۇلدى.
شىنايى،
نۇرلى اعام مەنىڭ،
جۇرەگىمە دارىتقان سەنىم.
شىنايى،
ەڭسەمدى تىكتەتكەن تەكتىم،
كوڭىلگە جىلى جەل بوپ ەستىڭ.
شىنايى،
تەڭىزىندە ءومىردىڭ اساۋ،
كەزىكپەستەن اعاجان تۇساۋ،
كۇلىمدەم ءجۇرشى ۇدايى،
حالىقتىڭ الدىندا امان-ساۋ.
كىرلەنبەسىن ءسىزدىڭ كوڭىل اق ادال،
جۇرەگىم جىرىن اق ولەڭمەن جازار.
پەيىلىم قۇنىنىن سوزبەنەن،
جەتكىزۋگە كەي كەز جۇرەكسىنەم،
ءسوزىم بۇل – شىنايى.
جىلى ءسوز - جانىما ءار،
مۇڭى كوپ عۇمىرىما ءنار،
سەزىم بۇل - شىنايى.
ءىنى بولىپ تولعانۋدا ءبىر باقىت،
تىلەۋقور جان جايلى ەرەك.
ادامدىققا عاشىق بولام ءبىر ۋاق،
مەيىرىمى كوزىنەن كورىنەر بولەك.
شىنايى،
جانارىڭىزدان مەيرىم كوردىم،
جان الديلەر جىلىلىقپەن.
سول مەيىرىممەن جىرىمدى ءوردىم،
جۇرەگىمنەن تۇسكەن سوڭ جارلىق.
***
نۇرلى اعام،
كوڭىل كوگىمە نۇر شاشقان،
نۇرلى ادام،
ءاز عۇمىرىڭ بولسىن داستان.
ىسىڭىزگە بەرەكەت تىلەدىم،
ءجۇزىڭىز كۇلىمدەپ ءار كۇن.
وزىڭىزگە تىلەكشى جۇرەگىم،
ارماندارىڭىز اينالسىن
شىندىققا ءبۇتىن.
***
ءسىز – شىنايى جانسىز،
بىلعانباعان كوڭىل شىرايى.
ءسىز – شىنايى جانسىز،
جۇرەككە سەنگەن ۇدايى.
بۇل جىرىم –
ىنىلىك نيەت شىنايى.
قاڭتارداعى قوشتاسۋ
كۇرسىنىستەر تامام بولمايدى،
سوڭىڭنان ازاپ-مۇڭ قالمايدى.
ۋاقىت جازادى دەمە جارانى،
جۇرتتار سولاي ءبىزدى الدايدى.
قاڭتاردا جاۋعان اق قارداي،
ارمانىم جۇرەگىڭدە ساقتالعاي.
ۋاقىتتىڭ وتكەنىن اڭعارماعان،
جۇرەككە جىر قۇيىلعان شاقتار-اي.
قاڭتاردىڭ قارىن سۇيمەيمىن سەنسىز،
جۇرەگىم قىستىڭ سىزىن سەزەدى سەنسىز.
باقىتتى دەپ ويلامايمىن سەنى دە مەن،
جالعىزسىراپ جۇرگەن بولارسىڭ مەنسىز.
كەۋدەمە ورناپ قاڭتاردىڭ بورانى سەنسەڭ،
جانىم جىلاپ ءجۇر جاۋراپ، كەلسەڭشى سەزسەڭ.
قاڭتارداعى قوشتاسۋ كەشى ءساتتى ەسىمە كەلسەڭ،
ءتۇسىپ كەتەدى كۇرسىنىستەرمەن بەيمەزگىل ەڭسەم.
ۇمىتارمىز ءبارىن.
جىلدار جاسىرىپ جىبەرەر،
ازابىڭ مەن قايعىڭدى كەرمەك.
جان جاراسىن ەمدەپ ۇلگەرەر،
ۋاقىت دەگەن – ۇلى قۇدىرەت ەرەك.
تاعدىر جۇزىمىزگە ءبىر كۇنى كۇلەر،
سەنەمىن جىرلى جۇرەگىممەنەن.
جۇرەگىمىز شاتتىقتان ءبىر تۇلەر،
ءسات سايىن تىلەگەن تىلەۋىممەنەن.
***
باقىت بالىن تاتقانىڭ،
كەرەگى قانشا باسقانىڭ.
جانىڭدى جىر الديلەپ،
ارايلاپ اتسا اق تاڭىڭ.
ايلار الىستاتىپ جىبەرسە،
جۇرەكتەگى اسىل جانداردى.
ۇمىتامىز ءبارىن،
سالادى قۇستار ءانىن.
ۇعىنا الساق قوي،
جارىق جالعان ءمانىن.
سەزىمنىڭ جىرى
سەزىمىڭدى دەيسىڭ باعالا،
اق قانات قۇسىم شاعالا.
ارمانىڭ الدار بولسا دا،
ارمانمەن وي قىرىن جەردىڭ ارالا.
كوك اسپانداي اشىق بولسا كوڭىلىڭ،
جاقسىلىققا تولادى دەيسىڭ ءومىرىڭ.
ولمەسىن دەيسىڭ تىلەۋقور بوپ ماعان،
اق قارداي تازا جۇرەگىڭدەگى سەزىمىڭ.
تەڭىزدى وپپەي كۇن كەشەر بولساڭ،
تەڭىزدەن قاشىقتاپ كەتەر بولساڭ،
نە كۇيدى كەشەر ەدىڭ اپپاق قۇسىم،
كەلمەسىن سوزىمە وتىنەم ەشبىر ىزاڭ.
تەڭىزگە ەركەلەپ الاسىڭ كەي ۋاق،
جانىڭا ءور تەڭىز دارىتار شۋاق.
ارناسىنان اسىپ بۋىرقانار بولسا،
جانىڭ جابىرقايدى بىلەم ءبىراق.
تەڭىزدىڭ مىنەزىن تانىدىڭ ەرتە،
بولعانمەن بولمىسىڭ نازىك ەركە.
مەنى دە جەتەلەگەن قۇشتارلىق،
ءوزىم انىق تانىپ بىلمەگەن ولكە.
ماحاببات شىعار جۇرەككە قونعان،
جانىما بولار دەپ سەنەم قورعان.
قىراندى بىلەسىڭ بە شاعالا سەن،
زاڭعار كوكتى ءوز بيىگىنەن شولعان.
تەڭىزدى ءسۇيدىم جاسىمنان شاعالا،
ءوزىڭ ۇيرەتىڭ دەپ اركەز سەزىمدى باعالا.
قىراندى ءسۇيدىم شاعالا كەيىپپەن مەن،
وزىڭە اسىعامىن جانىم جابىرقاعاندا.
تەڭىزسىز مەن كۇن كەشپەگەن ەكەنمىن،
سۋسىز مەكەنگە جارقىنىم بوتەنمىن.
سىرىمدى ۇقتىڭ دەپ بىلەمىن شاعالا،
مەن – تەڭىزدى سۇيگەن باياعى سول ەركەڭمىن.
بىلەمىن جانىما دەم بەرگىڭ كەلدى،
دوستىق پەيىلىڭە بالا كوڭىلىم سەندى،
ءومىر دەگەن – ۇزىك ۇمىتتەردى ۇكىلەۋ دەپ،
ءومىردى سۇرەمىن ساعىنىشىممەن ەندى.
تەڭىزىڭنەن ايىرماسىن سەنى شاعالام،
سەزىم توگىلەر ءالى تالاي جۇرەك شارادان.
ساعان وبال
(يۋلدۋز ۋلۋحبەك قىزىنىڭ ىزىمەن)
كەتپەشى دەپ ءسوز شىعىندار دەمە،
سۋىنعان جۇرەگىم سەنەن ەرتە-اق.
جىلۋىڭدى سەزىنبەيدى ەندى دەنە،
سانامدا سەن جايلى جوق سۇراق.
ساعان وبال،
ماعان وبال.
ايرىلدى جولىمىز،
قالاۋىڭدى تاپ ال.
سەنى سۇيگەن جۇرەگىم اقىماق،
سەنى كۇتكەن كەشتەرىم ەلەس تەك.
سەنى اقتاعان سوزدەرىم ساندىراق،
الداندى ءۇمىتىم نەلىكتەن ۇركەك....
ساعان وبال،
ماعان وبال،
دەي بەرەم اتتەڭ،
وتكەن كۇندەرىم ورال.
جىلامايمىن.
ارقاما ارتىپ سان جۇگىن تىرلىك،
مەنەن كۇتەدى ءالى كۇنگە ءبىر ىرىلىك.
جىلاتقاندار كوپ مەنى،
كەلمەدى ءالى كوڭىل كوكتەمى.
جۇباتقانداردىڭ سانى از،
باسادى مۇڭدارىم ەڭسەنى.
كوڭىلدىڭ كوكتەمى كەشىككەلى،
كەلمەستەي كورىنەدى ماعان جاز.
كەلسەڭشى جۇرەكتىڭ كوكتەمى،
ساقتاۋلى ساعان جۇرەكتە ناز.
جالعان جۇزدەر، جالعان سوزدەر،
جىلاتۋدى بىلەتىن پەندەلەر،
جۇباتۋعا قاۋحارسىز نەگە؟
سانام سونى ويلاپ سەندەلەر.
جالعاندى اقتاۋعا اسىققان،
باسىن كوتەرە سالىپ جاستىقتان.
حالىڭە كۇلەدى جۇرەگىڭ جىلاپ،
تۇندەردى ايساڭ جاس سىققان.
جىلاماۋعا بەكىندىم سەنسەڭىز،
جانارىمدا جاس تاۋسىلعانداي.
شىنايى قالپىڭىزدان وزگەرمەڭىز،
ىقىلاسىڭىز جۇرەگىمە ازىق بولعاي.
كەلگەنشە جۇرەگىمنىڭ كوكتەمى كۇتكەن،
مازامدى الماسىن اۋىر مۇڭدار تىپتەن.
تىلسىم ءۇن
كۇنسۇلۋ تۇرعىنبەكقىزىنا
ءۇن – ۇمىتپەن ۇندەسسە عانا ساز بولار.
(تۇرىك حالقىنىڭ ناقىلى)
جاقسىلار بار دەپ عالامدا،
جاقسى جىر ساقتاپ ساناڭدا،
مۇقالماي سىنىنا تىرلىكتىڭ،
ونەر دەپ جۇرگەن جان اپا.
قاناتىڭدى قايىرعاندار،
الەمىڭنەن ايىرعاندار،
ءۇمىتىڭدى ۇزگەن جاندار،
كور سوقىرلار، ناداندار.
جەتىمدى جەبەپ جاسىعان،
تابىلعان دوس قاسىنان.
بالالىقتىڭ كەمەسىن ءالى،
قيا الماعان اسىل جان.
كۇنىڭدى كۇيگە تولتىرار،
جانىڭدا جۇرگەي جاقسىلار.
ناۋىرزەك گ ۇلى سەكىلدى جانسىز،
بالاپان جۇرەكتەر ناق قۇمار.
ساحنانىڭ قادىرىنە جەتەم دەر،
ونەردى ولگەنشە ءسۇيىپ وتەم دەر.
باقىتىن وزگەدەن بولەك قۇراعان،
تىلسىم ءۇنى بارشا ەلگە ۇناعان.
كورگەنمەن سان مىڭ كەدەرگىلەردى،
ءساتى جوق ونىڭ شايقالعان، قۇلاعان.
ۇلگى ەتتىم مەيىرىمدى بولمىسىڭدى،
ۇلگى ەتتىم ونەر دەپ اششى ۋ ءىشۋدى.
ۇلگى ەتتىم جابىرقاماي پەندەلىككە،
ءدال سىزدەي بولىپ كۇەسىپ كۇن كەشۋدى.
تىرلىگىڭدى ءتاتتى مۇڭمەن ورگەن ءسات،
ساحناعا جان جۇرەكتى بەرگەن ءسات.
ونەر – باقىتىڭنىڭ باستاۋى ءسىرا،
ساحنادا اق جۇرەگىڭىز بولار شات.
ءبىر عۇمىرلىق مۇڭ شەكسە دە جان،
ءالى كۇنگە جوعالمادى ءبىر ارمان.
ساحنانىڭ قادىرىنە شىن بويلاپ،
تۇسپەنىز لايىم قاسيەتتى ساحنادان.
ولەڭدەر توپتاماسىنىڭ اۆتورى مەيىرحان مەيرامبەك ۇلى توپانباي – جاس اقىن. رەسپۋبليكالىق "شاراپات"شىعارماشىل جاستار بايقاۋىنىڭ باس جۇلدە يەگەرى. 1994 جىلى وڭتۇستىك قازاقستان وبلىسىندا تۋعان. تۋعاننان دسپ، تالما جانە كوز جانارىنىڭ ناشار كورۋى سىندى دەرتتەرمەن اۋىرادى.
