وڭتۇستىك قازاقستان وبلىسى تولە بي اۋدانىندا وتكەن تويلاردىڭ بىرىندە وسىنداي كەلەڭسىز جاعداي ورىن العان،  - دەپ حابارلايدى Qamshy.kz «زامانا» گازەتىنە سىلتەمە جاساپ.

توي قانشالىقتى كوپ وتكەن سايىن ول تۋرالى ءسوز دە سونشالىقتى مول بولاتىن سەكىلدى. وڭتۇستىك قازاقستان وبلىسى، تولە بي اۋدانىنىڭ تۇرعىنى تورەبەك نيازوۆ وتكەن اپتادا تويدا كورگەن قىزىقتارى تۋرالى بىلايشا باياندادى:

- سەنبى كۇنى بالدىزىمىزدىڭ ۇزاتۋ تويىنا باردىق. توي قىزىقتى ءوتتى. ويىن-كۇلكى، ءازىل-وسپاق، جاقسى ءان مەن بي – ءبارى بولدى. قۇدالاردى كۇتۋ جاعىنا «بەس» دەگەننەن باسقا باعا دا قويا المايمىز. باستالاردا تويدىڭ ىشىمدىكسىز وتەتىنىن بىلدىك. بۇل كۇيەۋ بالانىڭ قالاۋى ەكەن. العاشىندا كۇيەۋ بالا نامازعا جىعىلعاندىقتان حالال توي جاساعىسى كەلگەن بولار دەپ ويلاعانبىز. سويتسەك، ول ناماز دا وقىمايدى ەكەن.
جاسىراتىنى جوق، ءبارىمىزدىڭ ىشكىمىز كەلىپ تۇر. ارامىزدا وسى تويدا جاقسىلاپ دەمالامىن دەپ بارعاندار جوق ەمەس ەدى. اراق بولماعان سوڭ تاماق تا دۇرىس جەلىنبەگەندەي بولدى. اركىم شۇقىپ-شۇقىپ قويىپ قاراپ وتىر. توي يەلەرى وسىنى تۇسىنسە كەرەك، ءبىر ۋاقىتتا بىزدەر جاققا كەلەتىن شاي كوبەيدى. بارلىعىنىڭ الدىنا «ليپتون» قۇرعاق شايى سالىنعان شاينەكتەر كەلە باستادى. قۇدا بالا اينالىپ اركىمنىڭ قۇلاعىنا سىبىرلاپ جۇرگەنىنىڭ سىرىن كەيىن بىلدىك. سويتسەك شاينەكتەرمەن كەلىپ جاتقان شاي ەمەس، اراق ەكەن. باسقالاردىڭ نازارىن اۋدارماس ءۇشىن قۇرعاق شاي سالىپ قويىپتى. سول سول ەكەن، قىزا باستادىق. تاماقتار دا جەلىندى، ءبىزدىڭ جاقتان بي دە بيلەندى.

ءىشىپ وتىرعانىمىزدىڭ ءتۇسى وزگەردى دەمەسەڭ اراقتان ەش ايىرماسى جوق. شايدىڭ دا ءدامى شىقپاعان. وسىلاي تويدان قىزارا ءبورتىپ قايتتىق. قوشتاساردا قۋ ءتىلدى قۇدالاردىڭ ءبىرى: «ول زامان دا، بۇل زامان، شايعا ماس بولعان قوناقتاردى ءبىرىنشى رەت كوردىم»، – دەپ قاعىتىپ جاتتى. وسىلايشا ءبىز بالدىزىمىزدىڭ تويىندا شاي قوسىلعان اراق ءىشىپ قايتتىق. بۇل قىزىق ەمەس پە؟ - دەيدى تورەبەك نيازوۆ.