بۇگىن 3 قىركۇيەكتىڭ تاعى وزبەكستان تاڭى يسلام كارىموۆسىز اتتى. ەلدىڭ تۇڭعىش پرەزيدەنتى وزبەكستان رەسپۋبليكاسى دەنساۋلىق ساقتاۋ مينيسترلىگى دارىگەرلىك-سانيتارلىق بىرلەستىگىنىڭ ورتالىق كلينيكالىق اۋرۋحاناسىنا 27 تامىز كۇنى تاڭەرتەڭگى ۋاقىتتا جەتكىزىلگەن بولاتىن. كوپ ۇزاماي تاۋەلسىز ب ا ق يسلام كارىموۆتىڭ قايتىس بولعاندىعىن جارىسا جازدى. ارتىنشا پرەزيدەنتتىڭ كىشى قىزى لولا كارىموۆا ەلدى سابىر مەن وتباسىنىڭ جەكەلىگىن ساقتاۋعا شاقىرىپ، اكەسىنىڭ اۋىر حالدە ەكەنىن حابارلادى. 

وسىلايشا وزبەكستان رەسپۋبليكاسىنىڭ 1 قىركۇيەك تاۋەلسىزدىك كۇنى قارساڭىندا ەلدە سابىر-سابىر بولدى دەگەنىمەن، بۇل ەلدىڭ ۇكىمەتى اتاۋلى كۇندى تىنىش وتكىزۋگە بارىن سالدى. تاۋەلسىزدىك كۇنى وتكەن سوڭ، ەكىنشى قىركۇيەك كۇنى وزبەكستان ۇكىمەتى ەلدىڭ تۇڭعىش پرەزيدەنتى ومىردەن وزعانىن قايعىرا جەتكىزدى. وسى كەزدە قىزى لولا كارىموۆا دا ينستاگارم پاراقشاسىندا «ول ءبىزدى تاستاپ كەتتى...» دەپ جازدى.

بۇل بوزالا تاڭ وزبەك ەلى ءۇشىن اۋىر بولاعىن انىق. ولاي دەيتىنىمىز، تاۋەلسىز وزبەكستاندى شيرەك عاسىردان استام بيلەگەن يسلام كارىموۆسىز ەلدىڭ ەندىگى تىرشىلىگى مەن ساياسي حال-احۋالى قانداي بولارى ازىرگە بەيمالىم. 

ساياساتتانۋشىلار ءوز بيلىگىنە كەلۋى مۇمكىن دەگەن ءۇش تاراپتى ايتىپ، وزبەكستان بيلىگى پرەزيدەنتتىڭ تۋىستارىنا بەرىلمەيتىنىن بولجاپ تا ۇلگەردى. 
وسى وراي دا ءبىز دە وزبەكستاننان جىراق جۇرگەن وسى ۇلتتىڭ وكىدەرىنەن ەلدىڭ ەندىگى جاعدايى تۋرالى ويلارىن سۇراپ بىلۋگە تىرىستىق.

انۆار، قۇرىلىسشى:

-مەن قازاقستاندا جۇرگەنىمە 3-4 جىل بولدى. جىلدا جاز-كۇز مەزگىلدەرىندە وسىندا جۇمىس ىستەپ اقشا تابامىن. قىز-كوكتەمدە وتباسىمنىڭ قاسىندا بولامىن. وزبەكستان ساياسي جابىق مەملەكەت دەر ەدىم. سولاي بولعانىمەن، ءبىزدىڭ پرەزيدەنت ەلىمىزدى دامىتۋعا، يسلام ءدىنى مەن وزبەك ءتىلىن كوتەرۋگە بار كۇش-جىگەرىن سالدى. بۇگىننەن باستاپ وزبەكستان كارىموۆسىز دەگەنگە اسا قورقىنىشپەن قارايمىن. ەندى بيىككە تالاس كۇشەيىپ، ەلدىڭ جاعدايى ۋشىقپاسا دەگەن جالعىز تىلەگىم بار. ايتپەسە مارقۇم پرەزيدەنتتىڭ ارتىنان جامان ءسوز ايتاتىنداي ول ەلى ءۇشىن جامان ارەكەت جاساعان ەمەس.

شۋحرات، ساتۋشى:

-وسى بيلىكتە ۇزاق وتىراتىن، قارتايسا دا تاعىن بەرمەيتىن باسشىلار ورتا ازيادا عانا بار شىعار. يسلام كارىموۆ سونداي ەل تاعىن ۇزاق بيلەگەن باسشىلاردىڭ ءبىرى دە بىرەگەيى. «ولمەكتىڭ ارتىنان ولمەك جوق»، وزگە ەلدە نانىمىزدى تاۋىپ جەپ جۇرسەك تە، ەلىمىز ءۇشىن الاڭدايمىز. قارت كىسىنىڭ سوڭعى ۋاقىتقا دەيىن كەلەسى باسشىعا ورىن بوساتپاۋى سونشا جىل بيلەگەن ەلىن ەندى دۇربەلەڭگە تۇسىرە مە دەپ قورقامىن. ءبىراق تىنىشتىق بولۋىن تىلەيمىن.

زيلولا، اسپاز:

-قارت كىسى عوي، قازا قايىرلى بولسىن دەيمىن. ءبىز بىردەڭە دەگەنىمەن بيلىك ماسەلەسىن زاڭ مەن بيلىكتەگى كىسىلەردىڭ وزدەرى شەشەدى. ءبىزدىڭ قولىمىزدان ەلىمىزدىڭ بەرەكە-بىرلىگىن  تىلەۋ عانا كەلەدى. كارىموۆ ۇزاق جىلدار وزبەكستاننىڭ بولاشاعى  ءۇشىن جاقسىلى-جاماندى جۇمىستار اتقاردى. ونى تاريحتا تۇڭعىش پرەزيدەنت بولىپ قالاتىنىن، شيرەك عاسىرلىق ەڭبەگىن جوققا شىعارا المايمىز.

نودير، اياق كيىم جوندەۋشى:

-يسلام كارىموۆتىڭ قايتىس بولۋىنا بايلانىستى ەلىمە قايعىرىپ كوڭىل ايتامىن. جىراقتا جۇرسەم دە جۇرەگىم ەلىممەن بىرگە. الايدا ەلدىڭ بولاشاعى ءۇشىن الاڭداۋعا ەش نەگىز جوق دەپ سابىرعا شاقىرعىم كەلەدى. تۇڭعىش پرەزيدەنتىمىز بەكتىكەن زاڭ بار، تالاپ بار. زاڭ بويىنشا بيلىككە كىم كەلۋى كەرەك بولسا سول كەلەدى. بيلىك پەن زاڭداردا وزگەرىس بولسا دا، ەل ءىشى سول باياعىشا قاز-قالپىندا تىرشىلىك كەشە بەرەتىنىنە سەنەم.

ايتا كەتەيىك، 2013 جىل 1 ساۋىردەگى مالىمەت بويىنشا قازاقستاندا 520 مىڭعا تارتا وزبەك تۇرادى. وزبەك دياسپوراسىنا ارنالعان 81 مەكتەپ بار. سونداي-اق، قازاقستان حالىقتارى اسسامبلەياسىنىڭ قۇرامىندا وزبەكتەردىڭ ۇلتتىق مادەني ورتالىعى جۇمىس ىستەيدى.

ەستەرىڭىزگە سالساق، وزبەكستان رەسپۋبليكاسىنىڭ تۇڭعىش پرەزيدەنتى يسلام كارىموۆ 78 جاسىندا قايتىس بولىپ، بۇگىن سامارقانعا جەرلەندى. 

ال وزبەكستان كونستيتۋسياسىنىڭ 96 بابىنا سايكەس، سەنات ءتوراعاسى نيگماتۋللا يۋلداشيەۆ وزبەكستان پرەزيدەنتى مىندەتىن ۋاقىتشا اتقاراتىن بولدى. ەندى الداعى ءۇش ايدىڭ ىشىندە وزبەكستان پرەزيدەنتىن سايلاۋ وتكىزىلۋى ءتيىس.

ينديرا قۋات