بۇگىن نۇر-مۇباراك ۋنيۆەرسيتەتىندە «ەكسترەميزمنىڭ الدىن الۋ سالاسىنداعى مامانداردى قايتا دايارلاۋ ينستيتۋتى» اشىلدى، - دەپ حابارلايدى Qamshy.kz muslim.kz – كە سىلتەمە جاساپ .

بەيرەسمي دەرەكتەر بويىنشا ءقازىر ەلىمىزدە 16 مىڭعا جۋىق ادام جات اعىم جەتەگىندە. ەندى بۇگىننەن باستاپ ەل اراسىنداعى ەكسترەميستىك توپتار مەن جات اعىمدارعا قارسى كۇرەسۋشى مامانداردى دايارلاۋ ماسەلەسى مىقتاپ قولعا الىنا باستادى.

نۇر-مۇباراك ەگيپەت يسلام مادەنيەتى ۋنيۆەرسيتەتىندەگى  «ەكسترەميزمنىڭ الدىن الۋ سالاسىنداعى مامانداردى قايتا دايارلاۋ  ينستيتۋتىنىڭ»  اشىلۋ سالتاناتىندا  قمدب ءتوراعاسى، باس ءمۇفتي ەرجان قاجى مالعاجى ۇلى: «بۇگىندە مەشىتكە كەلەتىن جاماعاتتىڭ 85-90 پايىزى جاستار. ال جالپى ەلىمىزدەگى رۋحاني ىزدەنىسكە تۇسكەن جاندار  عالامتور  ارقىلى جات اعىمداردىڭ  ۋاعىز-ناسيحاتىنا يلانىپ جاتادى. جات اعىم جەتەگىندەگىلەرمەن جۇمىس جاساۋ ءۇشىن وسىنداي توپ كەرەك ەدى. سەبەبى يمامداردىڭ جالپى ءبىلىمى بولسا دا، ءدال تەرىس ءدىني توپتاردىڭ العان باعىتىنا قارسى  كۇرەس ماسەلەسى بولەك ءادىستى تالاپ ەتپەك. سوندىقتان، ءبىز وسى جاعدايلاردى ەسكەرە وتىرىپ، الداعى 1-2 جىلدا 200-300-گە دەيىن ماماندارىمىزدى قايتا دايارلاۋ كۋرسىندا بىلىمدەرىن پىسىقتايمىز دەگەن ۇمىتتەمىز»،-دەپ الداعى جوسپارلارعا توقتالىپ ءوتتى.

«ءبىزدىڭ ۋنيۆەرسيتەت شاكىرت تاربيەلەپ قانا قويماي، ەل ىشىندەگى ءدىني ماسەلەلەر مەن تۇيتكىلدەرمەن دە كۇرەسۋگە دايىن. سەبەبى بۇل بارشامىزعا ورتاق مۇددە. سوندىقتان، مەن مىسىردا ەكى ەل اراسىنداعى كەلىسىمدەرگە ساي ءبىرشاما لاۋازىمدى ازاماتتارمەن جولىققان ەدىم. ەار ۋاقىفتار ءمينيسترى مۋحامماد جۇما مىرزانىڭ سىزدەرگە ارنايى سالەمىن جولدايمىن. بولاشاقتا بۇل جاڭا ينستيتۋتقا ءال-ازھار ۋنيۆەرسيتەتىنەن وسى سالاعا ماماندانعان ارنايى  2 پروفەسسور كەلەتىنىن ايتقىم كەلەدى»،-دەدى نۇر-مۇباراك ۋنيۆەرسيتەتىنىڭ رەكتورى، پروفەسسور جۋدا باسيۋني.

بۇل باستاما 2016 جىلدىڭ 10 ماۋىسىندا ق ر پرەزيدەنتى ن.ءا.نازاربايەۆتىڭ توراعالىعىمەن ق ر قاۋىپسىزدىك كەڭەسى وتىرىسىندا مەملەكەتتىك ورگاندارعا جۇكتەلگەن ءبىرقاتار تاپسىرمالارعا سايكەس جۇزەگە اسىپ وتىر. ەلباسى نۇسقاۋىنا ساي ق ر ۇقك ءتوراعاسىنىڭ ءبىرىنشى ورىنباسارى س.ءابىشتىڭ توراعالىعىمەن جۇمىس توبى قۇرىلعان بولاتىن. اتالعان جۇمىس توبى  ق ر مسم مەن ق ر بعم-نە  جاڭا ينستيتۋتتى نۇر-مۇباراك ەيم ۋنيۆەرسيتەتى جانىنان اشۋعا تاپسىرما جۇكتەگەن-دى. سەبەبى بۇل ۋنيۆەرسيتەت بىلىكتى ماماندار مەن عالىمداردىڭ ورتالىعىنا اينالعاندىقتان ولار يسلام، ءدىن توڭىرەگىندە كەز-كەلگەن ساۋالعا جاۋاپ بەرە الادى. ءبىر عانا مىسىردىڭ ءال-ازھار ۋنيۆەرسيتەتىنەن  14 عىلىم دوكتورى قىزمەت ەتەتىنىن دە ايتا كەتەيىك.

ال ءقازىر ەلىمىزدە  جات اعىمدار جەتەگىندە قانشا جەرلەستەرىمىز ءجۇر دەگەن ساۋالعا ق ر مسم ءدىن ىستەر كوميتەتىنەن بالعابەك مىرزايەۆ: «بەيرەسمي دەرەكتەر بويىنشا  15-16 مىڭداي ادام. ونىڭ ىشىندە تاكفيريستەر، جيھاديستەر دەپ ءتۇرلى اعىمدارعا ءبولىنىپ جاتادى. ال سيرياعا 500-گە جۋىق ادام كەتكەن. سوندىقتان ءبىز وسى ماسەلەلەردىڭ بارلىعىن زەرتتەپ، تالداپ، ولاردىڭ تەرىس باعىتقا كەتۋىنە نە سەبەپ ەكەندىگىن جان-جاقتى ساراپتاۋدامىز. ءقازىردىڭ وزىندە «اق-نيەت» وڭالتۋ ورتالىعى جات اعىم قۇرباندارىمەن جۇمىس جاساۋدا.

«بۇل ۇلتتىق پروبلەما. سەبەبى قانشاما قاراكوزدەرىمىز تەمىر تورعا توعىتىلىپ، تاعدىرلارى تالقاندالىپ جاتىر. ەندى وسى ولقىلىقتىڭ ورنىن تولتىرىپ، بۇدان كەيىن وزگەلەردىڭ جات اعىم قۇربانى بولماۋى ءۇشىن جان-جاقتى ەڭبەك ەتۋىمىز ماڭىزدى»،- دەدى نۇر-مۇباراك ۋنيۆەرسيتەتىنىڭ پرورەكتورى، پروفەسسور ءشامشادين كەرىم مىرزا.

جاڭادان اشىلعان ينستيتۋت ديرەكتورى بولىپ نۇر-مۇباراك ۋنيۆەرسيتەتىنىڭ وقىتۋشىسى، PhD دوكتور قايرات قۇرمانبايەۆ تاعايىندالدى. ەلىمىزدىڭ ءار ايماعىنان كەلگەن 20 يمامعا ينستيتۋت ماماندارى دارىستەرىن باستاپ كەتتى.