ەلىمىزدەگى ەڭ شاعىن مەكتەپ سولتۇستىك قازاقستان وبلىسىنداعى  بىرلىك اۋىلىندا اشىلدى. مۇندا نەبارى بەس وقۋشى بار. بالا سانىنىڭ  ازدىعىنان ءۇش جىل بويى جابىق تۇرعان ءبىلىم ورداسى بيىلدان باستاپ قايتا جۇمىس ىستەپ جاتىر. بۇعان وسى وڭىرگە قىتايدان قونىس اۋدارعان قانداستارىمىز سەبەپ بولعان. بۇل مەكتەپتە اينالاسى بەس شاكىرت ءۇشىن 10 ادام جۇمىس ىستەيدى، - دەپ حابارلايدى Qamshy.kz كتك ارناسىنا سىلتەمە جاساپ. 

اۋدان اكىمىنىڭ قولىنان مەكتەپكە كەرەك-جاراعىن الىپ جاتقان انار  وتباسىمەن بيىل كوكتەمدە قىتايدان كوشىپ كەلىپتى. وتكەن وقۋ جىلىنىڭ ءتورتىنشى توقسانىن اۋدان ورتالىعىندا ءتامامداعان. بيىلدان باستاپ اۋىلدا وقيتىن بولدى.   

انار ەكپىن، 3 سىنىپ وقۋشىسى:

-مەن قىتايدا جاقسى وقىعانمىن. ەندى بۇل جاقتا جاقسى وقيمىن دەگەن ۇمىتتەمىن. مەكتەپ اشىلعانى دا جاقسى بولدى.

بىرلىك ورتا مەكتەبى بالا سانىنىڭ ازدىعىنا بايلانىستى 3 جىل بۇرىن جابىلعان ەدى. ەندى تەرىسكەيگە جۇڭگو مەن تالدىقورعاننان كوشكەن ون وتباسىنداعى بەس بالا ونىڭ قايتا اشىلۋىنا سەپ بولىپ وتىر. قونىس اۋدارعانداردىڭ كەيبىرىنە ءبىلىم وشاعىنان جۇمىس تا تابىلىپتى.

الەن ورازالى، بىرلىك اۋىلىنىڭ تۇرعىنى:

-وسى مەكتەپكە مەنى جۇمىسقا ورنالاستىرعالى جاتىر. جانە دە پەنسياعا  شىققانشا جاسىم ەلۋگە كەلدى، شامام جەتكەنشە وسى بىرلىك اۋىلىنداعى مەكتەپتە ءبىر كىسىلىك ەسە قوسىپ بەرسەم دەگەن ماقسات.

بىرلىك مەكتەبىندەگى بەس بالاعا ساباق بەرەتىن ەكى ءمۇعالىمنىڭ ءبىرى وسى مەكتەپتىڭ تۇلەگى. ءبىر كەزدەرى وقۋشىعا تولى سىنىپتار بۇگىندە ەلەس بولىپ قالدى دەيدى ول.

گۇلدانا احمەتوۆا ، ءمۇعالىم:

-11 جىلدىق مەكتەپ بولاتىن ءبىز وقىپ كەتكەن كەزدە. بۇنىڭ الدىندا ءمۇعالىم مەن وقۋشىلار سانى كوپ ەدى. ءقازىر ەكەۋ. مەن جانە تاعى سول قازاق ءتىلى مەن ادەبيەتىنەن بەرەتىن ءمۇعالىم. ەكى ءمۇعالىم.

ەڭ شاعىن مەكتەپ عيماراتىن جوندەۋگە ءۇش جارىم ميلليون تەڭگە جۇمسالعان ەكەن. ونىڭ سىرتىندا ءبىر جارىم ميلليوننىڭ قازاندىعى بار. ال ەكى ءمۇعالىم مەن بەس بالاعا وت جاعۋشى، ەدەن جۋۋشى، كۇزەتشى مەن مەيىربيكەنى قوسقاندا 8 ادام قىزمەت كورسەتپەك. جەرگىلىكتى بيلىك كەلەر جىلى بالا سانى كوبەيەدى دەپ وتىر. ويتكەنى وڭتۇستىكتەن وسى اۋىلعا تاعى ون شاقتى وتباسى كوشىپ كەلەدى دەپ كۇتىلۋدە.