راحىمجان وتاربايەۆ «قامشى» سايتىنداعى سۇحباتىندا «قازاقپىن دەسەڭ ەشكىم تانىمايدى، ءفيليپينسىڭ بە، تايسىڭ با، جاپونسىڭ با دەپ بارلىق ازياتتاردىڭ اتاۋىن تەلىپ شىعادى» دەيدى. راسىندا شەتەلگە بارىپ كەلگەن ادامداردىڭ  ايتۋى بويىنشا قازاق ەلىن، قازاق ۇلتىن ەشكىم بىلمەيدى، ءبىراق نۇرسۇلتان نازاربايەۆتى ءبارى بىلەدى دەپ ماقتانىش سەزىمىمەن ايتادى. ارينە ەلباسىمىزدىڭ الەمدىك دەڭگەيدەگى تۇلعا ەكەندىگىندە جۇرەگىمىز جارىلعانشا قۋانامىز. ءبىراق جەر كولەمى الەمدە 9 ورىندا، تابيعي بايلىعى بويىنشا الەم بويىنشا العاشقى وندىقتىڭ ىشىندە كىرەتىن وسىنداي الىپ مەملەكەتتى بىلمەۋ كۇلكىلى جاعداي ەمەس پە. نەگە ولاي؟

ءبىر كەزدە بابالارىمىز شىڭعىس حان، ەدىل (اتتيلا) تۇلعالارىن الەم بىلگەنمەن بۇگىنگى كۇنى شىڭعىس حان قۇرعان ۇلى مەملەكەتتىڭ – ۇلان-عايىر يمپەريانىڭ – قاي حالىققا تيەسىلى ەكەنىن انىقتاي الماي بىرەسە موڭعول بىرەسە قازاققا تەلىنۋى قازاق تاريحىنىڭ جوقتىعىنان. ارينە قاي ۇلتتىڭ مەملەكەتى ەكەنىن انىقتاۋ ءۇشىن ءتىلدىڭ دە تىكەلەي قاتىسى بار نەگىزگى كورسەتكىش دەر ەدىم. ولاي دەپ ايتپاعىم، جىلدار وتە ن. نازاربايەۆ قۇرعان مەملەكەتتى دە زەرتتەۋشىلەر ورىس مەملەكەتىن قۇرعان دەپ توپشىلاۋى مۇمكىن عوي. سەبەبى بۇگىنگى كۇنى ەلىمىز ورىس ءتىلدى مەملەكەت ەكەنىمىز الەمگە ايان. سوندىقتان قازاق مەملەكەتىنىڭ، ونى قۇرۋشى قازاق ۇلتىنىڭ ابىرويى مەن ءتىلىن كوتەرىپ ەلىمىزدى الەمگە پاش ەتىپ قانا قويماي سول التىن وردا حاندىعىنىڭ تىكەلەي مۇراگەرى ەكەنىمىزدى دالەلدەۋ كەرەك. ءبىراق وكىنىشكە قاراي ەلىمىزدى الەمگە تانىتاتىن سىرتقى ىستەر ءمينيسترىمىز كونە يۆريت تىلىندە مايىن تامىزىپ سويلەگەنمەن، قازاق تىلىندە قاقپايدى.

دەگەنمەن، الەم جاپونيانى «تويوتو»، «حوندا» ت.ب. برەندتەرى ارقىلى تانيدى، ءبىراق ونىڭ يمپەراتورىنىڭ كىم ەكەنىن قىزىعۋشىلىق تانىتقان ادامدار عانا بىلەدى. اقش-رىن ۇلىلىعىن ۇزدىك تەحنولگيالار، ءومىر ءسۇرۋ دەڭگەيىنىڭ جوعارلىعى ارقىلى تانيدى، ءبىراق ءجيى اۋىسقان پرەزيدەنتتەردىڭ اتىن ءبىلۋ مىندەت دەپ سانامايدى، تەك مەملەكەتتىڭ ۇلىلىلىعىن عانا مويىندايدى. ال ءبىز مويىنداۋىمىز كەرەك 25 جىلدىڭ ىشىندە ءبىزدىڭ ۇكىمەت قازاق ەلىن الەمگە تانىتا المادى!

ال، ادام ماڭگىلىك ەمەس، ۇكىمەتتە وتىرعان مەنەدجەرلەر الەمگە قازاقتى ۇزدىك تەحنولوگيالار ارقىلى تانىتا الماس، ويتكەنى «ينوۆاسيالى ۇدەمەلى جوبالار» اشىلىپ، ىلە جابىلىپ جاتىر، ەندەشە وزبەكتەردى الا شاپانى مەن الا تاقياسى، قىرعىزداردى ايىر قالپاعى مەن «ماناس» جىرى ارقىلى تانىسا، ال قازاقتى ءوزىمىزدىڭ ۇلتتىق برەندتەرىمىز ارقىلى ءبىلسىن.

ەرسىن ەرعالييەۆ