ءوز ەلىندە ورىن العان قاقتىعىستار مەن زورلىق-زومبىلىقتار سالدارىنان ميليونداعان بالا بوتەن ەلگە كەتۋگە ءماجبۇر. جات جۇرتتا تابانىنان توزىپ جۇرگەن بۇلدىرشىندەر سۋ مەن ازىق-تۇلىك تاپشىلىعىن تارتۋدا. يۋنيسەف بالالار قورىنىڭ جاڭا بايانداماسىندا وسى ماسەلە ءسوز بولادى.

قوردىڭ اتقارشۋى ديرەكتورى ەنتوني لەيك قازىرگى ادامزات قوعامىنىڭ باسىنا تۇسكەن سۇمدىقتاردىڭ ايقىن نىشانى رەتىندە، سيريادان ەۋروپاعا بارار جولدا سۋعا باتقان ءۇش جاسار الان كۋردي مەن الەپپوداعى قاقتىعىستا بومبا تۇسكەن عيماراتتىڭ استىنان شىعارىلعان ومران داگنيشتى مىسالعا الدى.  

الەم بويىنشا 50 ميلليون بالا تۋعان جەرىنەن قول ءۇزىپتى. ونىڭ 10 ميلليونى بوسقىن بولسا، ميلليونعا جۋىعى باسپانا ىزدەۋشىلەر، قالعان 17 ميلليونى ىشكى كوشى-قونعا ۇشىراعاندار. ال 28 ميلليون ءسابي قاقتىعىستان قاشىپ، جوسىپ كەتكەن. تاعدىردىڭ تالكەگىنە ۇشىراعان سابيلەرگە حالىقارالىق قاۋىمداستىق كومەكتەسۋى كەرەك.

الەمدەگى بارلىق بوسقىنداردىڭ تەڭ جارتىسىن بالالار قۇرايدى. 2015 جىلى بوسقىن بالالاردىڭ 45 پايىزى سيريا مەن اۋعانستاننان شىعىپتى. قاجەتتى قۇجاتتارى بولماعان سوڭ پاناسىز بالالاردىڭ ەرەسەكتەرمەن بىرگە تۇتقىندالىپ جاتقاندارى دا از ەمەس. سونداي-اق بايانداما اۆتورلارى شەت ەلگە شىققان بالالاردىڭ كوبىسىنىڭ قاسىندا اتا-اناسى جوق ەكەنىن ايتىپ دابىل قاعۋدا.   

2015 جىلى اتا-اناسىز 100 مىڭنان استام ءسابي 78 مەملەكەتتەن باسپانا سۇراعان. بۇل 2014 جىلمەن سالىستىرعاندا ءۇش ەسەگە كوپ. شەت ەلگە اۋعان جاسوسپىرىمدەردىڭ ادام ساۋداسى قۇربانىنا اينالىپ جاتقاندارى دا كەزدەسەدى.

ەنتوني لەيك حالىقارالىق قاۋىمداستىقتى بالالاردىڭ ءقاۋىپسىز ءومىر سۇرۋىنە جانە دۇرىس ءبىلىم الۋىنا جاعداي جاساۋعا شاقىردى. «بالالىق شاعىنان ايرىلعان بۇلدىرشىندەر ءوز ەلىنىڭ دامۋىنا قانداي ۇلەس قوسادى؟» دەپ تۇيىندەدى ءسوزىن، يۋنيسەف-تىڭ اتقارۋشى ديرەكتورى.

شارافات جىلقىبايەۆا