بۇگىن حالىقارالىق ساۋاتتىلىق كۇنى. وسىعان وراي بۇۇ-نىڭ باس حاتشىسى پان گي مۋن ادىلەتتى قوعام قۇرۋ ماقساتىندا مەملەكەتتەردىڭ ۇكىمەتتەرىن جەكە سەكتورمەن بىرلەسە وتىرىپ ەرەسەكتەر مەن بالالاردىڭ ساۋاتتىلىعىن كوتەرۋگە شاقىردى.

الەم بيىل 2030 جىلعا دەيىنگى تۇراقتى دامۋ باعىتىنداعى اۋقىمدى ىستەردى جۇزەگە اسىرۋدى باستاعانىن ايتقان باس حاتشى وسى ماقساتتا باسىمدىق ساۋاتتىلىققا بەرىلۋى كەرەكتىگىن ەسكەرتتى. ساۋاتتىلىق ادام قۇقىن قامتاماسىز ەتۋدىڭ، گەندەرلىك تەڭدىكتىڭ جانە تۇراقتى قوعام قۇرۋدىڭ ىرگەتاسى بولىپ تابىلادى. پان گي مۋننىڭ پىكىرىنشە، ساۋاتتىلىق شەكتى جاعدايداعى كەدەيلىكتى جويۋ ءۇشىن قاجەت. ادامزات ءال-اۋقاتىنىڭ ءوسۋى ءۇشىن دە ساۋاتتىلىق قاجەت ەكەنى بەلگىلى.   

تۇراقتى دامۋدىڭ 17 ماقساتىنىڭ ىشىندەگى ءتورتىنشىسى ادام بالاسىنىڭ ساپالى ءبىلىم الۋىن كوزدەيدى. بۇۇ-نىڭ باس حاتشىسى سوڭعى 50 جىلدا جەتكەن جەتىستىكتەرگە قاراماستان ادامزاتتىڭ ءالى كۇنگە ساپالى بىلىممەن قامتىلماي وتىرعاندىعىن ايتتى. باس حاتشىسى جولداۋىندا ءبىلىم الۋدىڭ زاماناۋي مۇمكىندىكتەرىنە تولا قازىرگى ادامزات قوعامىندا 750 ميلليون ەرەسەك كىسى  ساۋاتسىز ەكەنى ايتىلعان. ولاردىڭ ۇشتەن ەكىسى ايەل بولسا، 115 ميلليونى – جاستار. باستاۋىش مەكتەپتەگى 250 ميلليون بالا ءارىپ تانىمايدى. دۇنيەجۇزى بويىنشا 124 ميلليون بالا مەن ەرەسەك جان مەكتەپ قابىرعاسىن كورمەيدى ەكەن.  

بيىل 50ء-شى رەت اتالىپ جاتقان حالىقارالىق ساۋاتتىلىق كۇنى «وتكەن تۋرالى وقىپ، بولاشاقتى جازامىز» دەگەن ۇرانمەن وتۋدە.

بۇگىن ءوزىنىڭ جولداۋىن جاريالاعان يۋنەسكو باس ديرەكتورى يرينا بوكوۆا دا ساۋاتتىلىق بارشا ادام بالاسىنىڭ باياندى بولاشاعىنىڭ نەگىزى ەكەندىگىن اتاپ كورسەتتى.

شارافات جىلقىبايەۆا