تانىمال پروديۋسەر باعىم مۇحيتدەنوۆا بايان ەسەنتايەۆانىڭ ەل الدىنا ماجبۇرلىكتەن شىققانىن ايتىپ، قىنجىلدى. بۇل ءۇشىن ول ب ا ق قىزمەتكەرلەرىن كىنالادى.

بايان ەسەنتايەۆانىڭ باسىنان وتكەن اۋىر جاعداي بۇكىل حالىقتى شۋلاتتى. اسىرەسە، ونىڭ وتباسى، تۋعان-تۋىستارى ول ءۇشىن قاتتى الاڭداۋدا. اتىشۋلى وقيعاعا قاتىستى اقپارات قۇرالدارىنىڭ حابار تاراتۋىنا بايان دا، ونىڭ تۋىستارى دا نارازى. الايدا ەلىمىزدەگى ەڭ تانىمال پروديۋسەردىڭ ءومىرى مەن شىعارماشىلىعى اتىشۋلى وقيعاعا دەيىن دە ەل نازارىنان تىس قالماعان ەدى. ەسەنتايەۆانىڭ ءسىڭلىسى بولعان وقيعالاردىڭ جانىنا قاتتى باتقانىن ايتتى،- دەپ حابارلايدى Qamshy.kz Stan.kz سىلتەمە جاساپ.

«تانىمالدىلىق… ونىڭ وتەۋى اۋىر بولىپ شىقتى… ب ا ق قۇرالدارى مەن تەلەارنالار سەنى ايامايدى… سەنىڭ جەكە ءومىرىڭ بارلىعىن قىزىقتىرادى… نە، قالاي، نەگە، نە ءۇشىن، جايدان جاي ەمەس، دەمەك سەبەبى بار، ساۋاپ بولدى، وزىنە سول كەرەك – ولىمگە ءبىر تابان جاقىنداۋدىڭ نە ەكەنىن ەلەستەتە دە المايتىن ادامداردىڭ پىكىرلەرى وسى. بايانعا نە تىلەسەڭىزدەر، اللا سىزدەرگە سونى ەكى ەسەلەپ قايتارسىن!!! تەلەارنا رەيتينگىن كوتەرۋ ءۇشىن ءوز ەرەجەلەرىنە باعىنادى. جۋرناليستەر باياننىڭ، ونىڭ بالالارى مەن اتا-اناسىنىڭ قانداي كۇيدە ەكەنىن ويلانباستان جەكە ومىرىنە قول سۇعادى (ارىپتەس ەكەندەرىڭىزدى بىلە تۇرا). ەگەر دە ب ا ق قۇرالدارى باياننىڭ جەكە ومىرىنە ارالاسا بەرمەگەندە، قايتالاپ ايتامىن، جەكە ومىرىنە، ول بۇل سۇحباتتى بەرمەس ەدى! ەل الدىنا شىعۋعا ءماجبۇر بولدى. ونى بارلىق تەلەارنالار مەن اقپارات قۇرالدارى دا ءتۇسىنىپ تۇرعان شىعار. تاڭعالۋدامىن، مۇنىڭ ءبارى جانىما اۋىر ءتيىپ جاتىر…» – دەپ جازدى باعىم مۇحيتدەنوۆا جەلىدەگى پاراقشاسىندا.

ايتا كەتەيىك، بايان ەسەنتايەۆا ارىپتەسى ءارى قۇربىسى دينارا ءساتجانعا ەكسكليۋزيۆتى سۇحبات بەرىپ، 10 ماۋسىمدا بولعان وقيعا تۋرالى ءوز اۋزىمەن ايتىپ بەردى. پروديۋسەر مورالدىق تۇرعىدان دا، فيزيكالىق تۇرعىدان دا تولىق قالىپقا كەلمەگەنىن ايتتى. سونداي-اق، ەرلەر قاۋىمىنان زورلىق-زومبىلىق كورگەن ايەلدەردى قورعاۋ اسسوسياسياسىن قۇرۋ ويىندا بار ەكەندىگىن تىلگە تيەك ەتتى. ەسەنتايەۆا كۇيەۋى باقىتبەك ەسەنتايەۆتىڭ كازينوعا قۇمارلىعىن دا مويىندادى.