كەشە الماتىدا MEGA Park ساۋدا ءۇيى اۋماعىندا ورنالاسقان جۇلدىزدار اللەياسىندا تانىمال قازاق اكتەرى، تەاتر جانە كينو رەجيسسەرى، سەناريست، پەداگوگ ءاسانالى ءاشىموۆتىڭ قۇرمەتىنە ورناتىلعان جۇلدىزدىڭ اشىلۋى بولدى. بۇل تۋرالى Qamshy.kz  جۇلدىزدار قۇپياسىنا سىلتەمە جاساپ حابارلايدى. 

اشىلۋ سالتاناتىنا “قازاقفيلم” كينوستۋدياسىنىڭ باسشىسى باقىت قايىربەكوۆ، مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ديرەكتورى ەرلان ءبىلال، قازاقستاننىڭ حالىق ءارتىسى، “قازاقكونسەرت” باسشىسى التىنبەك قورازبايەۆتار قاتىستى.

“بارلىعىڭىزعا راحمەت ايتامىن. مۇنداي جۇلدىزدى اشۋ مەن ءۇشىن ءسال ىڭعايسىز دۇنيە، ايتسەدە گولليۆۋد ۇلگىسى بويىنشا بۇل تاماشا باستاما. قازاقستاندا ۇلى ادامدار كوپ، ولاردىڭ ءبىرازى ومىردەن ءوتىپ كەتتى. كوزى تىرىلەردىڭ اراسىنان ولجاس سۇلەيمەنوۆتى بولە-جارا ايتقىم كەلەدى. حالىقتىڭ داڭقتى ۇلىنىڭ جۇلدىزى دا وسى اللەيادا “جانۋى” ءتيىس دەپ ويلايمىن. بۇل مەن ءۇشىن تاريحي ءارى تولقىنىسقا تولى كۇن. قادىر مىرزالييەۆ ايتقانداي ادامعا ومىردەن وتكەن سوڭ ەمەس، كوزى ءتىرى كەزىندە قۇرمەت كورسەتىلۋى ءتيىس. وسى شارانى ۇيىمداستىرۋشىلاردىڭ بارلىعىنا ەرەكشە العىس ايتامىن”، – دەدى ءاسانالى ءاشىموۆ.

 ەسكە سالا كەتسەك، جۇلدىزدار اللەياسىندا تۇڭعىش رەت ەكى دۇركىن وليمپيادا چەمپيونى، ءتورت دۇركىن الەم چەمپيونى يليا ءيليننىڭ جۇلدىزى ورناتىلعان بولاتىن. ال كەلەسى جۇلدىزدى “دوم” قورىنىڭ باسشىسى ارۋجان ساين “جاقتى”. ول بۇل جۇلدىزدى بارشا قازاقستاندىق قايىرىمدىلىق شاراسىنىڭ ۇيىمداستىرۋشىلارىنا ارناعان. جۇلدىزدار اللەياسىنىڭ قاتارى 2015 جىلى كۇزدە وليمپيادا چەمپيونى الەكساندر ۆينوكۋروۆتىڭ ەسىمىمەن تولىقتى.