اتىشۋلى شىمكەنتتىك كاسىپكەر توقتار تولەشوۆتىڭ مەنشىگىندەگى «شىمكەنتسىرا» زاۋىتى اتف بانكتىڭ مەنشىگىنە ءوتىپ كەتتى. بۇل تۋرالى استانا  تەلەارناسىنىڭ تىلشىلەرىنە بەرگەن سۇحباتىندا بانكتىڭ باسقارۋشى ديرەكتورى ەلدوس جۇمابايەۆ ءمالىم ەتتى دەپ حابارلايدى  Qamshy.kz Nur.kz سىلتەمە جاساپ.

قارجى ۇيىمىنا كاسىپورىن 100 ملن اقش دوللارىنا تارتا قارجى قارىز بولعان. 2007 جىلى بانكتەن نەسيە راسىمدەگەن "شىمكەنتسىرا" ج ش س كەيىننەن نەسيەلىك مىندەتتەمەلەرىن ورىنداماي قويعان.

بىلتىرعى جىلدىڭ جەلتوقسان ايىندا سوت بانك پايداسىنا شامامەن 20 ملرد تەڭگە ءوندىرىپ الۋ تۋرالى شەشىم شىعارعان.

«زاۋىت ساتىلىمعا قويىلدى. وكىنىشكە وراي، ونى ساتىپ الۋعا الەۋەتى جەتەتىن الۋشىنىڭ بولماۋىنا بايلانىستى ساتىلىم جۇزەگە اسپادى. ق ر زاڭناماسىنا سايكەس بانك سوت ورىنداۋشىدان وتپەي قالعان ساتىلىم مۇلكىن ءوز بالانسىنا الۋ قۇقىعىمەن شاعىمدانا الادى. ءبىز سولاي جاسادىق. اتالعان شاعىم سوت ورىنداۋشى تاراپىنان قاناعاتتاندىرىلدى. قابىلداپ الۋ اكتىسى تولتىرىلىپ، سايكەس قاۋلى شىعارىلدى. اتالعان ءوندىرىس ورنى جۇمىسىن توقتاتپايدى، سىرا شىعارۋدى جالعاستىرادى. تەك بانككە ول جۇمىستارمەن تىكەلەي اينالىسۋعا تىيىم سالىنعاندىقتان، بانك ەنشىلەس كومپانيا قۇرۋعا قۇقىلى. ءبىز سوندا اتالعان مۇلىكتى تولىقتاي اۋدارامىز»، - دەدى باسقارۋشى ديرەكتور.

ەستەرىڭىزگە سالا كەتەيىك، اعىمداعى جىلدىڭ  30 قاڭتارىندا قالتالى ازامات توقتار تولەشوۆ شىمكەنتتە وتكەن ارنايى جاساق وپەراسياسى بارىسىندا قۇرىقتالدى. ونى قۇرىقتاۋ ءۇشىن قالاداعى بەدەلدى مەيرامحانالاردىڭ ءبىرى «ريكسوس حاديشا شىمكەنت» قورشاۋعا الىندى. بيزنەسمەننىڭ تۇرعىلىقتى مەكەنجايى مەن جۇمىس ورنىن تەكسەرۋ كەزىندە قارۋ، ەسىرتكى زاتى مەن وقۋلىقتار تابىلعان.  مۇنان سوڭ تولەشوۆ ەكى اي مەرزىمگە ۋاقىتشا قاماۋعا الىنىپ، ءىستىڭ تەرگەلۋ بارىسى قۇپيا ساقتالدى.  ق ر باس پروكۋراتۋراسى كاسىپكەردى اقتوبەدە بولعان لاڭكەستىڭ وقيعاعا قاتىسى بار دەپ ايىپتاپ، بيلىكتى كۇشپەن قۇلاتپاق بولىپ، وعان وتكەن جىلدان بەرى دايىندىق جۇمىستارىن جۇرگىزگەنىن مالىمدەدى. كەيىنىرەك ۇقك قىزمەتىندەگىلەر بيزنەسمەننىڭ جەر رەفورماسىنا قارسى اكسيالاردى قارجىلاندىرعانىن مالىمدەدى.

كاسىپكەر ۋاقىتشا قاماۋعا الىنعان سوڭ ونىڭ يەلىگىندەگى سىرا زاۋىتىنىڭ قىزمەتكەرلەرى باسى داۋعا قالعان باسشىلارىنىڭ بىلىقتارىن جايىپ سالدى. ايتۋلارىنشا،  سىرا زاۋىتى ەسەبىنەن كاسىپەردىڭ ءتورت ايەلى اي سايىن 2 ملن 282 مىڭ تەڭگە  كولەمىندە  جالاقى الىپ كەلگەن. سونىمەن قاتار،  تولەشەوۆتىڭ وتاندىق بانكتەردىڭ بىرىندە 300 ملن دوللار قارىزى  بار ەكەنى جاريا ەتىلدى. وسىدان سوڭ ونىڭ مەنشىگىندەگى « شىمكەنت سىرا» زاۋىتى ساتىلىمعا شىعارىلدى.   ءوندىرىس ورنى 28 ملرد تەڭگەگە باعالاندى. الايدا اتالعان زاۋىتتى ساتىپ الاتىن ادامنىڭ تابىلماۋىنا بايلانىستى اۋكسيون وتپەي قالدى.

جۋىردا الەۋمەتتىك جەلىدە قاماۋدا وتىرعان توقتار تولەشوۆتىڭ ءوز قولىمەن جازعان مويىنداۋ حاتى پايدا بولدى.  وندا كاسىپكەر ءوزىنىڭ قولاستىندا ىستەيتىن ايانوۆقا 100 000 اقش دوللارىن بەرىپ، قازاق جەرىنىڭ شەتەلدىكتەرگە ساتىلاتىنى تۋرالى اقپاراتتى حالىققا تاراتۋ تۋرالى تاپسىرما بەرگەنى جازىلعان.

«مەن مۇنىڭ حالىق نارازىلىعىن تۋدىراتىنىن، حالىق جەرىن قورعاۋ ءۇشىن الاڭعا شىعاتىنىن ءبىلدىم»، — دەلىنگەن بيزنەسمەن جازعان حاتتا.

ەرەكشە ايتا كەتەرلىگى، تەرگەۋ جۇمىستارىنىڭ قورىتىندىسىنا سايكەس كاسىپكەر تولەشوۆكە ادام ۇرلاۋ، كىسى ءولتىرۋ جانە تاعى دا باسقا باس-اياعى 16 قىلمىس جاسادى دەگەن ايىپ تاعىلدى. سوت  وتىرىسى  ەرتەڭ، ياعني، 14 قىركۇيەكتە باستالادى.