اتىراۋ قالالىق اكىمدىگى زاڭگەر اسەل نۇرعازييەۆانىڭ 17-قىركۇيەكتە ميتينگ وتكىزۋدى سۇراعان ارىزىنا رۇقسات بەرمەدى، - دەپ حابارلايدى Qamshy.kz ازاتتىققا سىلتەمە جاساپ.

«2016 جىلدىڭ 13 قىركۇيەگى مەن 13 قاراشاسى ارالىعىندا اتىراۋ قالاسى اۋماعىندا سانيتارلىق ەكى ايلىق شەڭبەرىندە اتىراۋ قالاسىنداعى جەڭىس ساياباعىنىڭ شەڭبەرىندە جانە قۇرمانعازى اتىنداعى مادەنيەت سارايى ماڭىنداعى ساياباقتا تازالاۋ، جوندەۋ جانە سەنبىلىك جۇمىستارى جوسپارلانۋىنا بايلانىستى 2016 جىلدىڭ 17 قىركۇيەگىندە ميتينگ وتكىزۋگە رۇقسات بەرۋدەن باس تارتىلسىن»،- دەپ جازىلعان قالا اكىمى سەرىك شاپكەنوۆتىڭ قولى قويىلعان قاۋلىدا.

ازاماتتىق بەلسەندى اسەل نۇرعازييەۆانىڭ ايتۋىنشا، جەر رەفورماسىنا قاتىستى ميتينگتەن سوڭ قاماۋعا الىنعان ماكس بوقايەۆ پەن تالعات ايان جانە باسقا دا بەلسەندىلەردى قولداپ، «اق جاۋلىقتى انالار» اتتى 80 ادام جينالاتىن ميتينگ وتكىزۋگە رۇقسات سۇراعان ارىز قالا اكىمدىگىنە 5-قىركۇيەكتە تاپسىرىلعان.

- ەندى سانيتارلىق تازالىق ايلىعىنا قاتىسۋ ءۇشىن 17-قىركۇيەكتە قالا تازالاۋعا اتالعان ورىندارعا بارماقشىمىز، - دەيدى اسەل نۇرعازييەۆا.

اتىراۋ قالالىق ءماسليحاتىنىڭ 2016 جىل 28-ناۋرىزداعى №13 شەشىمىمەن قۇرمانعازى اتىنداعى مادەنيەت سارايىنىڭ جانىنداعى دەمالىس ساياباعى جانە جەڭىس ساياباعى ميتينگ، بەيبىت شەرۋلەر وتەتىن ورىن رەتىندە بەكىتىلگەن.