پرەزيدەنت جارلىعىمەن داريعا نازاربايەۆا ق ر پارلامەنت سەناتىنىڭ دەپۋتاتى بولىپ تاعايىندالدى، - دەپ حابارلايدى Qamshy.kz اقوردا سايتىنا سىلتەمە جاساپ.

«نازاربايەۆا داريعا نۇرسۇلتان قىزى قازاقستان رەسپۋبليكاسى پارلامەنت سەناتىنىڭ دەپۋتاتى بولىپ تاعايىندالسىن»، - دەلىنگەن پرەزيدەنت جارلىعىندا.

سونىمەن، وتكەن اپتادا بيلىكتىڭ جوعارعى ساتىسىندا باستالعان كادرلىق اۋىس-تۇيىستەر بۇگىن ءوزىنىڭ لوگيكالىق شەگىنە جەتكەن سياقتى. 8 قىركۇيەك كۇنى پرەزيدەنت ۇكىمەت باسشىسى كارىم ءماسىموۆتى ورنىنان الىپ، ۇقك باسشىلىعىنا تاعايىنداسا، 2012 جىلدان بەرى ۇكىمەت جەتەكشىسىنىڭ ءبىرىنشى ورىنباسارى لاۋازىمىن اتقارىپ كەلگەن باقىتجان ساعىنتايەۆ پرەمەر كرەسلوسىنا جايعاستى.

وسى وزگەرىستەردىڭ قارساڭىندا، 5 قىركۇيەك كۇنى Qamshy.kz  پورتالىندا «ساعىنتايەۆ ءماسىموۆتىڭ ورنىن باسىپ، سەناتقا داريعا نازاربايەۆا بارۋى مۇمكىن»، - دەگەن بولجام ماقالا جازعان بولاتىنبىز. وندا ۇكىمەت قۇرامىندا ءبىرقاتار كادرلىق وزگەرىستەردىڭ بولاتىنى، ەلباسى وزبەكستان جاعدايىنان ساباق الىپ، بيلىكتىڭ ءار تارماعىنداعى ىقپالدى نۇكتەلەردى سەنىمدى تۇلعالارعا تاپسىراتىنى تۋرالى بولجام جاسادىق.

قازاقستان كونستيتۋسياسى بويىنشا، سەنات ءتوراعاسى - بيلىك يەرارحياسىنداعى ەكىنشى تۇلعا. اتا زاڭنىڭ 48-بابىندا «1. قازاقستان رەسپۋبليكاسىنىڭ پرەزيدەنتi قىزمەتiنەن مەرزiمiنەن بۇرىن بوساعان نەمەسە كەتiرiلگەن، سونداي-اق قايتىس بولعان جاعدايدا رەسپۋبليكا پرەزيدەنتiنiڭ وكiلەتتiگi قالعان مەرزiمگە پارلامەنت سەناتىنىڭ ءتوراعاسىنا كوشەدi» دەلىنگەن.

بۇل جەردە سەنات ءتوراعالىعى تۋرالى اڭگىمەنى دە بەكەرگە قوزعاپ وتىرعان جوقپىز. داريعا نۇرسۇلتان قىزى سەناتقا بەكەر بارمادى. قازىرگى سپيكەر قاسىم-جومارت توقايەۆ زەينەت جاسىنا جەتكەنىن ەسكەرسەك، ول الداعى وتىرىستاردىڭ بىرىندە لاۋازىمىن وتكىزۋى مۇمكىن. ال، سەنات دەپۋتاتتارى «ق ر پارلامەنتى جانە ونىڭ دەپۋتاتتارىنىڭ مارتەبەسى تۋرالى» زاڭعا ساي ءتوراعالىققا داريعا نازاربايەۆانىڭ كانديداتۋراسى ۇسىنىلسا، قارسى كەلە قويماس.