وسكەمەندە وتكەن «التاي – تۇركى الەمىنىڭ التىن بەسىگى» اتتى حالىقارالىق كونفەرەنسيانىڭ اياسىندا ارحەولوگيا سالاسىنىڭ ماسەلەلەرى جانە 2016 جىلى شىعىس قازاقستاندا 5 ەجەلگى ەسكەرتكىشتە جۇرگىزىلگەن قازبا جۇمىستارىنىڭ ناتيجەلەرى تالقىلاندى.
شارا الدىندا كونفەرەنسياعا قاتىسۋشىلار مەن قالا تۇرعىندارى ءۇش كيىز ۇيگە قويىلعان بەرەل قورعاندارى، شىلىكتى جازىعى، ابلايكيت بەكىنىس-عيباداتحاناسى، قىرىقۇڭگىر ەسكەرتكىشى جانە ەلەكە سازى جەرىندەگى قازبا جۇمىستارى كەزىندە تابىلعان بۇيىمداردى تاماشالادى. ەڭ باستى جادىگەرلەر – «التىن ادام» مەن بەرەل جازىعىنداعى №11 قورعاننان تابىلعان جىلقىنىڭ كوشىرمەلەرى مادەنيەت سارايىنىڭ دالىزىندە جيىنعا قاتىسۋشىلاردى قارسى الدى.
پلەنارلىق وتىرىس بارىسىندا عالىمدار ارحەولوگيا عىلىمىنىڭ جانە شىعىس قازاقستاندا تابىلعان تاريحي جادىگەرلەردى ساقتاۋ مەن ونى مۇراجايعا قويۋدىڭ وزەكتى ماسەلەلەرىن تالقىلادى. ارحەولوگتاردىڭ پىكىرىنشە، بۇل – ءوڭىردىڭ مادەني جانە ەكونوميكالىق دامۋىنا، تۋريستىك ينفراقۇرىلىمنىڭ قالىپتاسۋىنا وڭ اسەر ەتەدى.
- عىلىمي-زەرتتەۋ جۇمىستارىن ءبىزدىڭ وڭىردە جۇرگىزۋ قاجەتتىلىگى كۇمان تۋدىرمايدى. مۇنداي جۇمىستار زەرتتەلگەن نىسانداردى يۋنەسكو-نىڭ بۇكىلالەمدىك مۇرالارىنىڭ قاتارىنا قوسۋ ءۇشىن قاجەتتى تەوريالىق نەگىزىن جانە ءوڭىرىمىزدىڭ مادەني برەندىن قالىپتاستىرىپ، تۋريستىك الەۋەتىنىڭ ارتۋىنا سەپ بولماق. قازبا جۇمىستارىنىڭ ناتيجەسىندە تابىلعان جادىگەرلەر وبلىسىمىزدا قالىپ، جاستارىمىزدىڭ پاتريوتتىق تاربيەسى ءۇشىن قىزمەت ەتەتىن بولادى، - دەدى شقو اكىمى دانيال احمەتوۆ.
سونىمەن قاتار ايماق باسشىسى تابىلعان زاتتاردىڭ وبلىستىق تاريحي-ولكەتانۋ مۇراجايىنا بەرىلەتىنىن حابارلادى.
كونفەرەنسيانىڭ اياسىندا كاتونقاراعاي اۋدانىنىڭ بەرەل جازىعىندا ەلىمىزدە بالاماسى جوق اسپان استىنداعى مۇراجاي اشىلعانىن اتاپ ءوتۋ كەرەك. مۇنداي مۇراجاي كەلەسى جىلى شىلىكتى جازىعىندا دا سالىنباق.
