كاسىپورىن باسشىسى قالامقاس الەنوۆا 2012 جىلى "بيزنەستىڭ جول كارتاسى 2020" باعدارلاماسى اياسىندا 800 مىڭ تەڭگە نەسيەگە نەمىس تىگىن ماشينالارىن ساتىپ العان.

اقسۋ قالاسىندا 2010 جىلى "اتامەكەن" جەكە كاسىپكەرلىگىن اشقان قالامقاس الەنوۆانىڭ ۇلتتىق كيىمدەرىنە بۇگىندە سۇرانىس ارتقان، - دەپ حابارلايدى  Qamshy.kz  Zakon.kz cىلتەمە جاساپ.

تىگىن سەحىنىڭ بريگاديرى نۇربانۋ العاشبايەۆانىڭ ايتۋىنشا، بيىلعى جىلى ءبىر ايدىڭ ىشىندە كورشىلەس رەسەي ەلىنە 25 ۇلتتىق كيىم جىبەرگەن. ونىڭ ىشىندە قازاقتىڭ جانە ورىس ۇلتىنىڭ ويۋ-ورنەگىمەن اشەكەيلەنگەن باس كيىم، كامزول جانە كويلەكتەر بار.

- تاپسىرىس بويىنشا بالاباقشالارعا، مەكتەپتەرگە، ءتۇرلى كاسىپورىندارعا ارنايى جانە ۇلتتىق كيىمدەر تىگەمىز. ەندىگى ماقساتىمىز - كاسىبىمىزدى كەڭەيتىپ، جەكە عيماراتقا كوشۋ. قازىرگى تاڭدا "سۆەتلانا" دۇكەنىنەن ورىندى جالعا الىپ وتىرمىز. كۇنىنە 30-دان استام كيىم تىگەمىز. بارلىعى 10 ادام جۇمىس ىستەيدى، - دەيدى نۇربانۋ العاشبايەۆا.

ايتا كەتەرلىگى، كاسىپورىن باسشىسى قالامقاس الەنوۆا 2012 جىلى "بيزنەستىڭ جول كارتاسى 2020" باعدارلاماسى اياسىندا 800 مىڭ تەڭگە نەسيەگە نەمىس تىگىن ماشينالارىن ساتىپ العان. ال، 2014 جىلى قامزين كوشەسىنەن 64،4 شارشى مەتردى قۇرايتىن جەكە تىگىن سەحىن اشۋ ءۇشىن جەتى جىل مەرزىمگە مەملەكەتتەن 9 ملن 150 مىڭ تەڭگە راسىمدەگەن. بۇگىندە بۇل سومانىڭ 4 ميلليون تەڭگە قارىزى قايتارىلعان.