جاڭا ۇكىمەت جاساقتالعاننان كەيىن قازنەتتە ءسۇيىنشى سۇراپ ءبىر-بىرىن قۇتتىقتاۋشىلار كوبەيدى. مينيسترلەر كابينەتىن باسقارۋعا بىلىكتى، ۇلتجاندى ازاماتتار كەلدى دەگەن كوپشىلىك ۇكىمەتتەن كوپ ءۇمىت كۇتىپ وتىرعان سىڭايلى، - دەپ حابارلايدى Qamshy.kz 31-ارناعا سىلتەمە جاساپ.

ال،  مينيسترلەر بۇل جۇكتى ابىرويمەن الىپ جۇرە الا ما، ولاردىڭ اتقارۋى ءتيىس باستى مىندەتى قانداي؟

جاڭا ۇكىمەتتەن ءۇمىت كوپ. ءماسىموۆتىڭ وتستاۆكاعا كەتۋى قازنەتتى شۋلاتسا، باقىتجان ساعىنتايەۆتىڭ ورىنباسارى بولىپ يمانعالي تاسماعامبەتوۆتىڭ سايلانۋى ودان بەتەر تالقىلانىپ جاتىر. ساراپشىلار دا ساعىنتايەۆتىڭ مىقتى ورىنباسارلارمەن جاساقتانۋىن، قارىزعا باتىپ كەتكەن ۇكىمەتتى قۇتقارۋ امالى دەپ وتىر.

وزات وقۋشى ىسپەتتى - يمانعالي نۇرعالي ۇلى پرەزيدەنتتەن تاعى ماقتاۋ ەستىدى. قورعانىستاعى قىزمەتى ءۇشىن «بەستىك» الدى، ەندىگى ەڭ اۋىر جۇك تە يمانعالي تاسماعامبەتوۆتە. سەبەبى جاڭادان تاعايىندالعان ۆيسە-پرەمەر قوردالانعان ۇشتىلدىلىك پەن داۋلى دەنساۋلىققا جاۋاپ بەرەدى.

بەرىك ءابدىعالي، ساياساتتانۋشى:

- ءقازىر قوعامعا ءقاۋىپ ءتونىپ تۇرعان ءبىرقاتار وقيعالار بولدى عوي. ەكسترەميستىك، تاعى باسقالار. سوندىقتان يمانعالي تاسماعامبەتوۆتىڭ كەلۋى وسىدان بولار.

جەر مەن ءتىل، باسپانا مەن جۇمىسسىزدىق باسقايعى بولعان كەزدە ءدال وسى قۇرامنىڭ باسشىلىققا جايعاسقانىن ازىرگە قولداۋشىلار كوپ. مۇنىڭ دا ءوز سەبەبى بار دەيدى ساراپشىلار

مۇحتار تايجان، ەكونوميست:

- ادام جاقسى مامان بولۋى مۇمكىن. ءبىراق جۇرەگىندە ەگەر تازا نيەت بولماسا، ۇلتتىق وت جانىپ تۇرماسا ناتيجە جوق. ونداي مىسالدار كوپ بىزدە.

قازاقستاننىڭ تابىسى 40 پايىزعا قىسقاردى. سىرتقى بەرەشەك ارتتى، تاعى 7 ملرد دوللار شەتتەن قارىز الامىز. وسى قارجىنى قاجەت جەرگە جۇمساپ، ەكونوميكانى اياققا تۇرعىزۋدى نەبارى 36 جاستاعى قۋاندىق بيشىمبايەۆقا تاپسىرۋدان دا ساراپشىلار قاتەر كورىپ تۇرعان جوق. ال دىنگە جاۋاپتى جاڭا مينيسترلىكتى قوس قولداپ قولداعان ساياساتتانۋشىلار پايداسىز تاعى بىرنەشە ۆەدومستۆونى قىسقارتسا دەپ وتىر.