اقش-تا وتكەن دۇنيەجۇزىلىك كىتاپحانا جانە اقپاراتتىق كونگرەستە قازاقستان كىتاپحاناسى العاش رەت دوكلاد-پوستەر ۇسىندى.  ولاردىڭ جۇمىسى بىردەن ۇزدىك دەپ تانىلدى.

 «ا. س. پۋشكين اتىنداعى شقو كوشباسشىلارى - وقىرماندار» ستەندتىك بايانداماسى اۋىلدىق كىتاپحانا ونلاين-ورتالىقتارىنىڭ جۇمىسى جايلى.  بۇل جوبا وڭىردە 2012 جىلدان باستاپ ىسكە اسىرىلىپ كەلەدى. ول كەزدە بۇۇ دامۋ باعدارلاماسىنىڭ تەحنيكالىق قولداۋىمەن جانە جەرگىلىكتى بيلىك ورگاندارىمەن ارىپتەستىك نەگىزىندە اۋىلدىق جەردە 32 ونلاين-ورتالىق اشىلعان. ءقازىر ولاردىڭ سانى 45-كە جەتتى. ورتالىقتار جۇمىسىنىڭ ارقاسىندا اۋىلدىقتار كومپيۋتەرلىك ساۋاتتىلىققا ۇيرەنىپ، ەلەكتروندىق ۇكىمەت پورتالىمەن تانىسىپ، مەملەكەتتىك قىزمەتتەر مەن ونلاين-كونسۋلتاسيا الادى.

ءتورت جىلدا شقو كىتاپحانا ونلاين-ورتالىقتارى 40 مىڭنان استام پايدالانۋشى تىركەدى. اۋىل تۇرعىندارى ءۇشىن 6،7 مىڭ اكت-ترەنينگ، سەمينارلار وتكىزدى.

شقو ستەندتىك بايانداما پوستەرى الەمنىڭ ءار ەلى ۇسىنعان ەكى ءجۇز جۇمىستىڭ ىشىندە ۇزدىك دەپ تانىلدى. دەلەگاسيا ءوز جەڭىسىن ەل تاۋەلسىزدىگىنىڭ 25-جىلدىعىنا ارنادى.