قازاقستان رەسپۋبليكاسىنىڭ مەملەكەتتىك قىزمەت ءىستەرى مينيسترلىگىنىڭ وبلىس بويىنشا دەپارتامەنتىنىڭ ۇيىمداستىرۋىمەن تالدىقورعان قالاسىنىڭ «جاستار» ساياباعىندا ءبىرنەشە مەملەكەتتىك مەكەمە قىزمەتكەرلەرى تۇرعىنداردى اشىق اڭگىمەگە تارتىپ، ءوز سالالارىنداعى جاڭالىقتار مەن مۇمكىندىكتەر جايلى تۇسىنىك جۇمىستارىن جۇرگىزدى.
اتاپ ايتار بولساق: «تۇرعىنءۇيقۇرىلىسجيناقبانكى»، وبلىستىق كاسىپكەرلىك جانە يندۋستريالىق-ينوۆاسيالىق دامۋ باسقارماسى، وبلىستىق ءبىلىم باسقارماسى، «ءبىرىڭعاي جيناقتاۋشى زەينەتاقى قورى» جانە حالىققا قىزمەت كورسەتۋ ورتالىعىنىڭ ماماندارى ارلى-بەرلى وتكەن قالا تۇعىندارى مەن قوناقتارىن تولعاندىرىپ جۇرگەن سۇراقتارعا جاۋاپ بەرىپ، ءوز مەكەمەلەرىنىڭ حالىققا جاقىن ەكەندىكتەرىن تانىتتى. «اشىق مەملەكەت» اتتى جاڭا فورماتتاعى حالىقپەن ءجۇزدەسۋدە تەك قانا اقپارات بەرىپ قويماي، جاھاندانۋدىڭ جاڭا مۇمكىندىكتەرىن وڭتايلى پايدالانۋدىڭ ادىس-تاسىلدەرىن دە ۇيرەتتى. مىسالى، «ەلەكتروندى ۇكىمەت» ارقىلى ۇيدە وتىرىپ-اق مەكەنجاي انىقتاماسىن سايت ارقىلى الۋعا بولاتىنى، بالانى بالاباقشاعا كەزەككە قويۋ، ايىپپۇلداردىڭ سوماسىن انىقتاپ قانا قويماي، بانك كارتوچكاسى ارقىلى ونى تولەۋدىڭ جولدارى جانە سۋ، جارىق سىندى كوممۋنالدىق قىزمەتتەردىڭ دە اقىسىن كەزەككە تۇرىپ، ۋاقىت جوعالتپاي تەز ءارى جىلدام وتەۋگە بولاتىنى تۋرالى ماعلۇماتقا قانىقتىق.
جۇرتتىڭ العىسىنا بولەنگەن مەكەمەلەر قىزمەتكەرلەرى وسىنداي ءىس-شارالار جۇمىستى جۇيەلى ەتىپ قانا قويماي، حالىقتىڭ سەنىمىن اقتاپ، ولارمەن تىعىز قارىم-قاتىناس ورناتاتىنىن ايتتى.
ماۋلەن انەرباي، "جەتىسۋ" گازەتى
