كەلەر جىلى رەسپۋبليكا اۋماعىندا اۋىلشارۋاشىلىعى ماقساتىنداعى جانە جەكە تۇرعىن ءۇي قۇرىلىسى مەن جەكە قوسالقى شارۋاشىلىققا ارنالعان جەر ۋچاسكەلەرىن تەكسەرۋ باستالادى، - دەپ حابارلايدى Qamshy.kz.
بۇل تۋرالى ۇكىمەت جانىنداعى جەر رەفورماسى جونىندەگى كوميسسيا قۇقىقتىق جۇمىس توبىنىڭ جەتەكشىسى، پارلامەنت ماجىلىسىندەگى ءبىرقاتار زاڭنامالارعا وزگەرىستەر مەن تولىقتىرۋلار ەنگىزۋ جونىندەگى جۇمىس توپتارىنىڭ مۇشەسى مۇحتار تايجان مالىمدەپ، فەيسبۋك جەلىسىندە «اۋىلشارۋاشىلىعى ماقساتىنداعى جانە جەكە تۇرعىن ءۇي قۇرىلىسى مەن جەكە قوسالقى شارۋاشىلىققا ارنالعان جەر ۋچاسكەلەرىن تەكسەرۋ بويىنشا ۇسىنىستىڭ» ءماتىنىن جاريالادى.
پرەمەر-مينيستردىڭ تاپسىرماسىمەن جۇرگىزىلەتىن تەكسەرىس مەرزىمى 2017-2018 جىلدارعا بەلگىلەنگەن. تەكسەرىس بارىسىندا اۋىلشارۋاشىلىعى ماقساتىنداعى جانە جەكە تۇرعىن ءۇي قۇرىلىسى مەن جەكە قوسالقى شارۋاشىلىققا ارنالعان جەر ۋچاسكەلەرىنىڭ ناقتى جاعدايى، زاڭ تالاپتارىنىڭ ساقتالۋى، اۋىلشارۋاشىلىق جەرلەرىنىڭ ساپالىق جاي-كۇيى انىقتالىپ، جەردى ءتيىمدى پايدالانۋ جونىندەگى شارالار كەشەنى قابىلدانباق. سونداي-اق، تەكسەرىس ناتيجەسى بويىنشا حالىقتىڭ سۇرانىسىن قاناعاتتاندىرۋ ماقساتىندا جايىلىم، شابىندىق جانە جەكە ءۇي قۇرىلىسىنا ارنالعان ارنايى جەر قورى قۇرىلماق.
تەكسەرۋ تەك اۋىلشارۋاشىلىق، تۇرعىن ءۇي سالۋ جانە قوسالقى شارۋاشىلىق ءۇشىن بەرىلگەن جەرلەرگە عانا ەمەس، مەملەكەتتىك قورداعى جەرلەرگە دە جۇرگىزىلەدى. ول جۇمىستار ءۇشىن ءتيىستى كوميسسيالار قۇرىلىپ، قۇرامىنا مۇددەلى ازاماتتار ەنەتىن بولادى. ال، رەسپۋبليكالىق دەڭگەيدەگى كوميسسيا پرەمەر-مينيستر شەشىمىمەن قۇرىلىپ، ەرەجەسى بەكىتىلمەك.
بىرنەشە ساتىدان تۇراتىن تەكسەرۋدىڭ ءار ساتىسىنان كەيىن جەر ۋچاسكەلەرىنىڭ پايدالانىلۋى، جاي-كۇيى، زاڭنامالاردىڭ ساقتالۋى، تاعى باسقا ماسەلەلەر بويىنشا تالداۋ جۇرگىزىلىپ، ءتيىستى ۇسىنىستار ازىرلەنۋى ءتيىس.
ەستەرىڭىزگە سالساق، ءقازىر پارلامەنت دەپۋتاتتارى «جەر كودەكسىنە» جانە جەر قاتىناستارىنا بايلانىستى ءبىرقاتار زاڭنامالارعا وزگەرىستەر مەن تولىقتىرۋلار ەنگىزۋ تۋرالى»، «جايىلىم جەرلەر تۋرالى» جاڭا زاڭ جوباسى قارالىپ جاتىر.
