بۇگىن قىرعىزستان پرەزيدەنتى المازبەك اتامبايەۆتىڭ دەنساۋلىعى سىر بەرىپ، نيۋ-يوركتە وتەتىن بۇۇ باس اسسامبلەياسى سەسسياسىنا بارار جولدا تۇركيانىڭ اۋرۋحاناسىنا جاتقىزىلعانى حابارلاندى. وسى ورايدا المازبەك اتامبايەۆتىڭ دارىگەرلەر كومەگىنە جۇگىنىپ، ەلدى ەلەڭ ەتكىزۋى ءبىر بۇل ەمەستىگىن ەستەرىڭىزگە سالامىز. Qamshy.kz وسى ۋاقىتقا دەيىنگى المازبەك اتامبايەۆتىڭ ۋلاندى دەگەن كۇدىكپەن ەمدەلۋ تاريحىن ءتىزىپ شىقتى.

اتامبايەۆ – پرەزيدەنت اتانباي تۇرىپ، ساياسي قارسىلاستارىنىڭ شابۋىلىنا ۇشىراعان ساياساتكەر. ەڭ العاش رەت ول 2007 جىلدىڭ 11 مامىرى كۇنى ۋلاندى. ول كەزدە المازبەك قىرعىزستاننىڭ پرەمەر-مينيسترى ەدى. اتامبايەۆ وندا ءوزىنىڭ سول كەزدەگى ەل پرەزيدەنتى قۇرمانبەك باكييەۆ پەن ونىڭ اكىمشىلىك جەتەكشىسى مەدەت سادىرقۇلوۆپەن كەزدەسۋدەن سوڭ ءبىر ستاقان شىرىن ىشكەنىن، ارتىنشا ەسىنەن تانىپ قالعانىن ايتقان. ا. اتامبايەۆ 17 مامىر كۇنى اقش ەلشىسى ماري يوۆانوۆيچكە وزىنە بەرىلگەن ۋدىڭ رەسەيلىك ەكەنىنە جانە ونىڭ ءوزىن ءولتىرۋ ءۇشىن ەمەس، تەك ەسكەرتۋ جاساۋ، قورقىتۋ جاساۋ ءۇشىن بەرىلگەنىنە سەنىمدى ەكەنىن ايتىپتى. سونداي-اق، ا. اتامبايەۆ سول وقيعادان سوڭ رەسەيلىك فقق-گە قوڭىراۋ شالىپ، وزىنە قارسى ەشتەڭە جاساماۋلارىن سۇراپ، ءوزىنىڭ «رەسەيشىل پرەمەر-مينيستر ەكەنىن» ايتقانىن دا اشىق مالىمدەگەن.

ءوزىن ۋلاۋعا قاتىسى بار باستى كۇدىكتىلەر رەتىندە ا. اتامبايەۆ قىرعىزستاننىڭ بۇرىنعى پرەمەر-مينيسترى فەليكس كۋلوۆ پەن قازاقستان پرەزيدەنتىنىڭ سول كەزدەگى كۇيەۋ بالالارىنىڭ بىرەۋىن اتاعان. بۇل اڭگىمەنى ولان ءارى داۋرىقتىرۋدى قالاماعان ا. اتامبايەۆ تۇركيانىڭ «گۇلحان» اسكەري-مەديسينالىق اكادەمياسىندا ەمدەلىپ، كەيىن وڭەشىن تازالاتقان.

قىرعىزستانداعى 2009 جىلعى پرەزيدەنت سايلاۋى كەزىندە دە اتامبايەۆ ۋلاندى دەگەن شۋ شىقتى. ماۋسىم ايىنىڭ سوڭىندا كەزەكتى ءبىر جيىندا ول «بويىن يگەرۋى قيىنداپ، سويلەي الماي» قالعان. ول جولعى ۋلانۋعا جۇيكە-پاراليچتىك ۋ سەبەپ بولعانى حابارلانعان ەدى.

2011 جىلدىڭ كۇزىندە وتكەن پرەزيدەنتتىك سايلاۋدا ا. اتامبايەۆ جەڭىسكە جەتىپ، 1 جەلتوقسان كۇنى يناۋگراسياسى وتكەن بولاتىن. وسىدان كەيىن دە اتامبايەۆتىڭ دەنساۋلىق جاعدايىنا قاتىستى ءتۇرلى الىپ-قاشپا اڭگىمەلەر ايتىلدى. تەك 2013 جىلى قايتادان تۇركيانىڭ سول كەزدەگى پرەزيدەنتى ابدوللا گۇلدىڭ شاقىرۋىمەن «گۇلحانا» اسكەري-مەديسينالىق اكادەمياسىندا ەم العانىن بىلەمىز.

ودان بولەك ا. اتامبايەۆ 2014 جىلى ماسكەۋدەگى كلينيكالاردىڭ بىرىندە تىزەسىنە وتا جاساتتى. 2015 جىلى قاراشا ايىندا ءبىرقاتار ب ا ق ا. اتامبايەۆتىڭ بەيجىڭگە بارىپ ەمدەلگەنى تۋرالى جازدى. ءبىراق، بۇل اقپارات رەسمي ورگاندار تاراپىنان راستالمادى.

قىرعىزستاننىڭ ا. اتامبايەۆقا دەيىنگى پرەزيدەنتتەرىنىڭ ۋلانۋى تۋرالى اشىق اقپاراتتار تاراعان جوق. تەك، ەكس-پرەزيدەنت قۇرمانبەك باكييەۆتىڭ وتباسىلىق كمكىلجىڭ كەزىندە تۋعان ۇلى ماكسيم باكييەۆتىڭ اياعىنان اتىپ جاراقاتتاعانى تۋرالى WikiLeaks جازدى.

دايىنداعان: دارحان مۇقانتەگى