الماتى اۋرۋحاناسىندا قايتىس بولعان 6 جاسار ءبۇلدىرشىننىڭ اناسى پەرزەنتىنىڭ جۇمباق ولىمىنە دارىگەرلەردى كىنالاۋدا. يولانتا يانۋشەنەنىڭ ايتۋىنشا، ونىڭ ءىشى اۋىرىپ بارعان قىزى ەۆەليناعا اق حالاتتىلار ءارتۇرلى دياگنوز قويىپ، ارى-بەرى سابىلتىپ قويعان. ال سوڭىندا سوقىرىشەككە وتا جاساپ، 4 ساعاتتان كەيىن ءبۇلدىرشىننىڭ ءولى دەنەسىن قايتارىپتى، – دەپ حابارلايدى Qamshy.kz كتك ارناسىنا سىلتەمە جاساپ.

پاتەر تولى ويىنشىقتار ەندى يەسىز قالدى. ولارمەن وينايتىن ەۆەلينا 2 كۇن بۇرىن جەر قوينىنا تاپسىرىلعان. ال كۇنى كەشە مەكتەپ تابالدىرىعىن اتتاعان جالعىز قىزىنىڭ ولىمىنە اناسى ءالى سەنە الماي ءجۇر. سەبەبى، پەرزەنتى  بۇعان دەيىن قاتەرلى دەرتپەن اۋىرعان ەمەس. تەك ءبىر اپتا بۇرىن ىستىعى كوتەرىلىپ، ءىشى اۋىرا باستاپتى.

“مازاسى كەتە باستاعان سوڭ اۋرۋحاناعا ءوزىم اپاردىم. دارىگەرلەر سوقىرىشەگىن تەكسەردى. ءسويتىپ، ول جەرى دۇرىس دەپ، جۇقپالى اۋرۋلار اۋرۋحاناسىنا جىبەردى. ونداعى ماماندار قىزىمنىڭ تاماق بەزى ىسىنگەنىن مالىمدەدى. ءسويتىپ، انگينانىڭ ەمىن ۇيدە قابىلداي باستادىق”، – دەيدى ەۆەلينا يانۋشايتەنىڭ اناسى يولانتا يانۋشەنە.

الايدا ەۆەلينانىڭ تاماعى ەمەس، ءىشى اۋىرا بەرىپتى. ال 3 كۇن بۇرىن جاعدايى تىپتەن ناشارلاپ، جەدەل جاردەممەن اۋرۋحاناعا جەتكىزىلگەن. ءسويتىپ، دارىگەرلەر تاعى دا سوقىرىشەك بولعان دەپ، ناۋقاس قىز بىردەن پىشاققا ءتۇسىپتى. تەك 4 ساعاتتان كەيىن ءولى دەنەسى قايتارىلعان. ەندى وپەراسيا ۇستىندە كوز جۇمعان قىزدىڭ اناسى بولعان جاعدايعا دارىگەرلەردى كىنالاپ وتىر.

“نەگىزى وتانىڭ جەتىنشى مينۋتىندا كوز جۇمعان. ال دارىگەرلەر قارالى حاباردى 4 ساعاتتان كەيىن جەتكىزدى. وسى ۋاقىت بويى قاتەلىكتەرىن جابۋعا تىرىسقانى انىق. سەبەبى، ولار وتا الدىندا قىزىمنىڭ اعزاسىن تەكسەرگەن جوق. مەنىڭ ويىمشا، قىزىم ارتىق مولشەردەگى ناركوزدان نەمەسە سالىنعان دارى-دارمەكتەرگە اللەرگيادان كوز جۇمدى”، – دەيدى يولانتا يانۋشەنە. وتا سوقىرىشەككە جاسالعانىمەن، سوڭىندا ناۋقاستىڭ وكپەسى قابىنعان بولىپ شىققان. دەگەنمەن، دارىگەرلەر وزدەرىنەن ەشقانداي اعاتتىق كەتپەگەنىن مالىمدەدى.

“ماماندار دۇرىس دياگنوز قويعان. ناۋقاستىڭ ءىش قۋىسى قاتتى اۋىرعاندا ءبىز وتا ارقىلى، سەبەبىن انىقتاۋعا مىندەتتىمىز. ناۋقاستىڭ نەدەن كوز جۇمعانىن مايىتكە جاسالعان زەرتتەۋ كورسەتەدى. سونى كۇتەيىك”، – دەيدى الماتى قالاسى №1 بالالار كلينيكاسى باس دارىگەرىنىڭ ورىنباسارى نيكولاي دياچەنكو. ال قارا جامىلعان ايەل پەرزەنتىن اۋرۋحاناعا اپارعانى ءۇشىن وكىنىپ قالعان. دارىگەرلەردەن كوڭىلى قالعان ول ەندى شىندىققا قول جەتكىزبەك. سوندىقتان ەۆەلينانىڭ ولىمىنە كىنالىلەردى جازالاۋ ءۇشىن پروكۋراتۋراعا شاعىمدانباق.