ۇكىمەت جيىنىندا ىشكى ىستەر ءمينيسترى قالمۇحانبەت قاسىموۆ الماتى وبلىسى جامبىل اۋدانىنداعى قاندى وقيعا تۋرالى ايتىپ بەردى، - دەپ حابارلايدى Qamshy.kz.
«20 قىركۇيەك كۇنى بىزگە الماتىدا مال ساتۋعا كەتىپ، جوعالعان ازاماتتار تۋرالى ارىز ءتۇستى. ەكى كولىكپەن ولار 41 باس ءىرى قارانى الماتى وبلىسىنداعى بازارعا الىپ بارعان. 21 قىركۇيەكتە ءبىر كولىك، 23ء-ى كۇنى ەكىنشىسى تابىلدى. كەيىن جەرگىلىكتى تۇرعىنداردىڭ وسى كولىك جۇرگىزۋشىلەرىنە كومەكتەسكەنى، ولاردىڭ كولىگى بالشىققا باتىپ قالعانى انىقتالدى، سول تۇرعىندار ارقىلى ەكى كۇدىكتىنى تاپتىق»، - دەدى ءىىم ق. قاسىموۆ.
ءمينيستردىڭ ايتۋىنشا، قىلمىسكەرلەر ول ءۇش ازاماتتى الداپ، الىپ كەتكەن.
«شاتقالعا اپارىپ، ولار ءۇش كىسىنى دە ولتىرگەن. مال مەن مايىتتەردى كولىكپەن الىپ بارا جاتقاندا كولىكتەرى باتىپ قالعان. سوسىن جەرگىلىكتى تۇرعىنداردان كومەك سۇراعان. ءقازىر قىلمىسكەرلەر تۇتقىندالدى، قىلمىس جاسالعان قارۋ تاركىلەندى، قىلمىسكەرلەر قىلمىس ورنى مەن مايىتتەر كومىلگەن جەردى ءوز ەرىكتەرىمەن كورسەتتى. بارلىق قاجەت ساراپتاما تاعايىندالدى. بۇگىن قازا بولعان ازاماتتاردىڭ جەرلەۋ ءراسىمى وتەدى. 36 باس مال تاركىلەندى. ءىستى الماتى وبلىستىق ءىىد باقىلاۋعا الدى. مەن جاقىن كۇندەرى تەرگەۋ اياقتالىپ، ءىس سوتقا بەرىلەدى دەپ ويلايمىن»، - دەيدى مينيستر.
ءمينيستردىڭ بايانداماسىن تىڭداعان پرەمەر-مينيستر باقىتجان ساعىنتايەۆ ق. قاسىموۆقا ءىستىڭ بارىسىن باقىلاۋعا الۋدى تاپسىردى جانە ۇكىمەتتىڭ كەلەسى وتىرىسى قوعامدىق قاۋىپسىزدىك جانە وزبىرلىقپەن كۇرەسكە ارنالاتىنىن ايتتى.
«باقىلاۋعا الىڭىز. قوعامدىق قاۋىپسىزدىك، وزبىرلىقپەن كۇرەس ءبىزدىڭ جۇمىستىڭ باستى باعىتى ەكەنىن ءبارىمىز بىلەمىز. سوندىقتان كەلەسى جاقىندا وسى ماسەلەنى ۇكىمەت جيىنىندا قاراۋ كەرەك دەپ ويلايمىن»، - دەدى ب. ساعىنتايەۆ.
ەستەرىڭىزگە سالساق، الماتى وبلىسى جامبىل اۋدانىندا ءۇش ازامات جوعالىپ، ولاردىڭ كەيىن كىسى قولىنان قازا بولعانى حابارلانعان بولاتىن.
بۇگىن الماتى وبلىسى كوكسۋ اۋدانىندا مارقۇمداردىڭ جەرلەۋ ءراسىمى وتۋدە. مارقۇمداردىڭ ارتىندا سەگىز بالا جەتىم قالدى.
ەستەرىڭىزگە سالساق، Qamshy.kz پورتالى ءىىم ق. قاسىموۆتىڭ اتىنا اتالعان ءىستى قاتاڭ باقىلاۋعا الىپ، تەرگەۋدىڭ بارىسى تۋرالى قوعامدى قۇلاقتاندىرۋدى سۇراپ حات جازعان بولاتىن.
