جاقىندا رەسەيلىك جازۋشى ءارى ساتيريك ميحايل جۆانەسكييدىڭ "الماتىلىق قازاقتاردىڭ ورىسشاسى وتە كەرەمەت ەكەن. ورىس ءتىلىنىڭ ساقتاپ قالۋشىسى ءبىز ەمەس، سولار بولىپ قالاتىن سياقتى" دەگەن پىكىرىن كوزىم شالدى. الماتىلىقتاردىڭ تەك ورىسشاسى عانا ەمەس، قازاقشاسى دا جەتىلىپ كەلە جاتقاندىعىن مويىنداۋىمىز قاجەت. ءتىپتى، شالكەز شاھارداعى وزگە ۇلتتار قازاق تىلىندە شۇلدىرلەپ كەتپەسە دە، ەداۋىر تۇسىنەتىندىگىن ءىس جۇزىندە بايقاۋعا بولادى. 

ءبىزدىڭ مىندەتىمىز نە؟! قازاقتىڭ دالاسىندا وتىرىپ، ورىستىڭ ادەبي تىلىندە سويلەۋ ماقتان ەمەس. اركىم ءوز جىرتىعىن ءوزى جاماپ الۋى ءتيىس. تولستويى مەن دوستايەۆسكييى بار ەل ءتىلىن دە، ءتۇرىن دە جوعالتپايدى. ءبىراق، ادامزاتتىڭ ايتماتوۆى ايتقانداي «ءسوزدى وزگەلەرمەن بولىسپەسەڭ، ولەدى» دەگەن ءسوز تاعى دا بار. سول سەبەپتى مەملەكەت قۇرۋشى ۇلتتىڭ انا تiلiنiڭ ۇستەمدiگi جولىنداعى كۇرەسi جالعاسا بەرەدi. جالپى، تiل كۇرەسi ەشقاشان توقتاعان ەمەس. مەيلى ءسىزدىڭ ءتىلىڭىز حالىقارالىق، تiپتi الەمدiك قاتىناس تiلi بولسىن، ەگەر تiلدiڭ دامۋى جولىنداعى كۇرەس توقتاسا، تiلiڭiز دە سول كۇننەن باستاپ سولعىن تارتۋى زاڭدىلىق. جاھاندىق تۇتاستىققا جۇتىلىپ كەتپەۋ قامىن جاسايدى.

وتكەن سەنبىدە ءبىر تانىسىم الماتىداعى بالالاردىڭ قالالىق كلينيكالىق جۇقپالى اۋرۋلار اۋرۋحاناسىندا مەديسينا قىزمەتكەرلەرىنىڭ ءتول مەرەكەسىنە وراي وتكىزىلەتىن مەرەكەلىك شارانى جۇرگىزىپ بەرۋىمدى ءوتىندى. بۇرىن-سوڭدى تەك ءوز ورتامىزداعى وتىرىستاردى جۇرگىزىپ جۇرگەندىكتەن، بۇل وتىنىشىنە داعدارىپ قالعانىم راس. ءبىراق، باتىلدىعىما باسىپ، اق حالاتتىلاردىڭ مەرەكەلىك شاراسىن جۇرگىزدىم. بارلىعى مەن ويلاعاننان الدەقايدا كەرەمەت بولدى. سەبەبى، شارا باستالماس بۇرىن، ءراسىمدى تەك قازاق تىلىندە عانا جۇرگىزەم دەگەن تالاپ قويدىم. شاراعا قاتىسقان 70 شاقتى اق حالاتتىلاردىڭ 90 پايىزىن ايەلدەر قۇرايدى ەكەن. Iشىندە قازاقتان وزگەلەرى دە جەتىپ ارتىلادى. قالعان قازاقتاردىڭ دەنى دە قازاقشا ءبىر ءسوز ايتۋ ءۇشىن ۇزاق ويلاناتىندار.

ءبىراق، سول وتىرعانداردىڭ بارلىعى مەنىڭ ايتقان سوزدەرىمدى تۇگەل ءتۇسىنىپ وتىر. ءازىل ايتساڭ جىميعان، قالجىڭداساڭ كۇلىمدەگەن كوزدەرىنەن ءبارى كورىنىپ تۇر. ءتىپتى، مەرەكەلىك ءراسىم اياقتالعان سوڭ، بارلىعى ريزاشىلىعىن ءبىلدىرىپ، قۇرمەتىن كورسەتتى. قازاقتىڭ ءتىلىنىڭ دامىعاندىعى ەمەي نەمەنە بۇل؟! بۇگىن تۇسىنسە، ەرتەڭ سويلەيدى. سوسىن اقىرىنداپ جازا باستايدى. سوندىقتان، قازاق ءتىلىن بىلمەيتىندەرگە قوزعاۋ ساپ، ۇيىتقى بولاتىن ءوزىمىز. "وردا" توبىنىڭ قازاقشا بارلىق اندەرىن جاتقا سوعاتىن ورىستى دا، كارىستى دە كورگەنبىز. ءسوزىمىز سالماقتى ءارى پاراساتتى، ءونىمىمىز ساپالى ءارى ءتيىمدى بولىپ جاتسا جەڭىس بىزدە.ءتىل ءتىرىلۋ ءۇشىن الدىمەن ءوزىمىز تىرىلەيىك.

سۋرەت rusmirzp.com سايتىنان الىندى