23-24 قىركۇيەكتە موڭعولكۇرە اۋدانىندا قازاق كۇرەسىنەن ءۇى كەزەكتى الەم چەمپيوناتى وتكىزىلدى، - دەپ حابارلايدى Qamshy.kz.
بوتا تىرسەك، بۋرا سان، اتان جىلىك ازاماتتاردىڭ قارىمى مەن دارىنىن، جىگەرىن سىنايتىن الەمدىك دوداعا جۇڭگو، رەسەي، قازاقستان، گرۋزيا، ارمەنيا، گرەسيا، تۇركيا، موڭعوليا، وڭتۇستىك افريكا قاتارلى 22 مەملەكەتتىڭ 23 كومانداسى قاتىناستى. قحر نامىسى ءۇشىن شىڭجاڭ بالۋاندار قۇراماسى مەن موڭعولكۇرە بالۋاندار قۇراماسى الەمنىڭ ءار تۇكپىرىنەن كەلگەن الىپ كۇش يەلەرىمەن كۇش سىناسىپ، تاجىريبە الماستى.
«ۇيىمداسىپ ىستەگەن، ءار ءىستىڭ ءبىر ءسانى بار» دەگەندەي، بۇل رەتكى جارىستى حالىقارالىق كۇرەس قاۋىمداستىعى، دۇنيەجۇزىلىك قازاق كۇرەسى قاۋىمداستىعى، ىلە قازاق كۇرەسى قوعامدىق بىرلەستىگى قاتارلى ۇيىمدار باس بولىپ ۇيىمداستىرىپ، ىلە قازاق اۆتونوميالى وبلىستىق مادەنيەت-دەنەتاربيە، راديو، كينو-تەليەۆيزيا مەكەمەسى مەن ىلە قازاق اۆتونوميالى وبلىسى موڭعولكۇرە اۋداندىق حالىق ۇكىمەتى جوعارى دەڭگەيدەگى سان-سالتاناتپەن وتكىزدى.
ازيانىڭ ءار قيىرىنان، ەۋروپاداعى ەڭسەلى ەلدەر مەن الىستاعى افريكادان ات باسىن بۇرعان اتان جىلىك بالۋاندار 60، 70، 80، 90 كەلى، 90 كەلىدەن جوعارى سالماق كاتەگوريالارى بويىنشا جانە تاماشالاۋشىلاردىڭ تاڭدايىن قاقتىراتىن تۇيە بالۋان (بۇعان سالماعى 80 كيلوگرامنان جوعارى بالۋاندار ەرىكتى تۇردە قاتىسادى) جارىسى بويىنشا ەكى كۇن بويى بوز كىلەمدە بەلدەسىپ، وزدەرىنىڭ قازاق كۇرەسى جاعىنداعى قارىمىن بايقاتتى. الەمدىك دودانىڭ سالتاناتتى دا ءساندى، ءادىل ءجۇرىلۋى ءۇشىن باس تورەشى، ورتاداعى تورەشى، كىلەمدەگى تورەشى، قاپتالداعى تورەشى قاتارلى قازاق كۇرەسىنىڭ قىرى مەن سىرىنا قانىق، قاعيدالارىن جەتىك مەڭگەرگەن حالىقارالىق دەڭگەيدەگى تورەشىلەر تورەلىك ەتىپ، قازاق كۇرەسىنىڭ بۇك ۇپاي، جامباس ۇپاي ءنومىرىن بەرۋ ءتاسىلى ارقىلى جارىستى ءساتتى وتكىزدى.
اقتىق سىناسۋعا جولداما العان بالۋاندار تەحنيكالىق تەبىن، مىعىم كۇش، قايتپاس قاجىر ارقىلى ءوز سالماعى بويىنشا قارسىلاسىن الىپ تا، شالىپ تا كوردى. سوڭىندا، 60 كيلوگرامدىق سالماقتا قازاقستان بالۋانى قۇسمان قىرعىزبايەۆ ءبىرىنشى، قىرعىزستان بالۋانى سانجار وسماناليەۆ ەكىنشى، ءۇندىستان بالۋانى گۇلاب الي موحسين مەن جۇڭگو بالۋانى نۇرتاي نۇرمۇحامەت ۇلى ءۇشىنشى ورىندى يەلەدى؛ 70 كيلوگرامدىق سالماقتا قازاقستان بالۋانى قۇمار قىرعىزبايەۆ ءبىرىنشى، جۇڭگو بالۋانى جالىنبەك مادەنيەت ۇلى ەكىنشى، قىرعىزستان بالۋانى ميرلان ەراليەۆ پەن وزبەكستان بالۋانى باحروم ينوياتوۆ ءۇشىنشى بولدى؛ 80 كيلوگرامدىق سالماقتا قازاقستان بالۋانى داۋلەت پاحىريدەنوۆ ءبىرىنشى، ەستونيا بالۋانى گەورگي لادوكين ەكىنشى، گرۋزيا بالۋانى زۆياد بازانداراشۆيل مەن ارمەنيا بالۋانى ديەۆيد ساركسياي ءۇشىنشى ورىنعا جايعاستى؛ 90 كيلوگرامدىق سالماقتا قازاقستان بالۋانى ايبول ايتبەك ۇلى ءبىرىنشى، وزبەكستان بالۋانى شاكىرجان ارسىلانوۆ ەكىنشى، ەستونيا بالۋانى الەكساندر مارمەلجۇك پەن جۇڭگو بالۋانى جايداربەك سەرىك ۇلى ءۇشىنشى ورىنعا يە بولدى؛ 90 كيلوگرامنان جوعارى سالماقتا قازاقستان بالۋانى ايبەك نۇعىمانوۆ ءبىرىنشى، گرۋزيا بالۋانى ليەۆاني ماتيلاشۆيلي ەكىنشى، رەسەي بالۋانى ماكسيم شيريايەۆ پەن بەلورۋس بالۋانى الەكساندر ۆاحاۆياك ءۇشىنشى ورىندى يەلەندى.
قازاق كۇرەسىنەن 6-كەزەكتى الەم چەمپيوناتىنىڭ تۇيە بالۋانى كىم بولادى دەپ ەلەڭدەسكەن جۇرت بوز كىلەمنەن كوز ايىرماي، بالۋاندارعا دەم بەرىپ وتىردى. جانكۇيەرلەردىڭ جان ايعايى بالۋانداردىڭ جىگەرىن جانىپ، بەكەم بەلدەسۋگە شاقىردى. تۇيە بالۋان دارەجەسى بويىنشا باسەكەدە گرۋزيالىق گۋرام تۋشيشۆيلي تۇيە بالۋان اتاعىنا يە بولسا، بەلورۋسسيا بالۋانى الەكساندر ۆاحاۆياك ەكىنشى ورىنعا، قازاقستان بالۋانى مۇحيت تۇرسىنوۆ پەن رەسەي بالۋانى ماكسيم شيريايەۆ ءۇشىنشى ورىنعا يە بولدى.
وسى رەتكى جارىستىڭ تۇيە بالۋانى اتانعان سوم بىلەكتى، شىمىر تۇلعالى گرۋزيا ازاماتى گۋرام تۋشيۆيليدىڭ دەنە ءبىتىمى مەن كۇرەس تەحنيكاسى ءوزارا ۇشتاسىپ، جالپاق جۇرتتى جالت قاراتتى. قازاق كۇرەسىن جەتىك مەڭگەرگەن وزگە ۇلت بالۋاندارىنا قاراپ، ەكپىندى دە ەرشىمدى قاداممەن حالىقاراعا بەت العان قازاق كۇرەسىنىڭ الداعى اسۋى بيىك بولارىنا سەنىمىمىز كامىل.
الىمبەك نۇرالين،
جانبولات ماناربەك ۇلى
