الماتىدا اباقتىدا ناتاليا سلەكيشينانى زورلادى دەپ ايىپتالعان تۇرمە باقىلاۋشىسىنا قاتىستى سوت ۇكىمى شىقتى، - دەپ حابارلايدى Qamshy.kz  Tengrinews.kz –كە سىلتەمە جاساپ. تۇركسىب اۋداندىق سوتى 37 جاستاعى لا-155/18 قىلمىستىق-اتقارۋ جۇيەسى دەپارتامەنتىنىڭ قىزمەتكەرلەرى رۋسلان حاكىموۆتى توعىز جىلعا باس بوستاندىعىنان ايىردى. 

سوتتالۋشىنىڭ مۇلكى تاركىلەنىپ، مايور اتاعىنان ايىرىلدى. سونىمەن قاتار، حاكىموۆكە ءومىر بويىنا مەملەكەتتىك قىزمەتتە جۇمىس ىستەۋگە تىيىم سالىندى. سوت ۇكىمىن سۋديا ايسارا جىلقىبايەۆا شىعاردى.

سلەكيشينانىڭ ءوزى بۇل ۇكىمگە ريزاشىلىعىن ءبىلدىردى.

ەسكە سالايىق، الماتىدا تەرگەۋ اباقتىسىنىڭ قىزمەتكەرلەرى جازاسىن وتەپ جاتقان ايەلدى جابىلىپ زورلادى دەپ ايىپتالعان بولاتىن. بۇل وقيعادان جابىرلەنۋشى سول سلەكيشينا بولىپ شىعادى. 32 جاستاعى ناتاليا سلەكيشينا 155/18 مەكەمەسىندە جاتقاندا 4 ازاماتتىڭ جىنىستىق قاتىناسقا ماجبۇرلەگەنىن ايتقان. ول ءتىپتى سول كەزدە جۇكتى بولىپ قالعان. ال قىلمىستىق اتقارۋ جۇيەسىنىڭ قىزمەتكەرلەرى تاعىلعان ايىپپەن كەلىسپەيتىنىن ايتىپ وتىر. ايتا كەتەيىك، كىنا تاعىلىپ وتىرعان 4 ازامات تا وسى مەكەمەدە ۇزاق ۋاقىتتان بەرى قىزمەت ەتىپ كەلەدى. ءبارىنىڭ جاسى 35-تەن اسقان. بالا-شاعالارى دا بار. ناتاليانى 4 بىردەي قىزمەتكەر بىرنەشە رەت زورلاعان. كەيىن ارنايى ساراپتاما تاعايىندالىپ، بالانىڭ اكەسى راسىمەن تۇرمە باقىلاۋشىسى رۋسلان حاكىموۆ ەكەنى انىقتالعان بولاتىن. 

"مەملەكەتتىك ايىپتاۋشى جاڭا ايىپتاۋ اكتىسىن تولتىردى، وندا سوتتالۋشىعا مىنا باپتار بويىنشا جاڭا ايىپ تاعىلدى: ق ر قىلمىستىق كودەكسىنىڭ 362-بابىنىڭ 4-بولىگىنىڭ 4-پۋنكتى (بيلiكتi نەمەسە لاۋازىمدىق وكiلەتتiكتەردى اسىرا پايدالانۋ)، 120-بابىنىڭ 2-بولىگىنىڭ 2-پۋنكتى (ءولتىرۋ قاتەرىن توندىرۋمەن ۇلاسقان، سونداي-اق جابىرلەنۋشىگە نەمەسە باسقا ادامدارعا قاتىستى اسا قاتىگەزدىكپەن جاسالعان زورلاۋ ارەكەتى)، 146-بابىنىڭ 2-بولىگىنىڭ 2-پۋنكتى (بىرنەشە رەت ازاپتاۋ). 21 قازاندا مەملەكەتتىك ايىپتاۋشى سوت پروسەسسىندە تاراپتارعا جاڭا ايىپتاۋلاردى باياندادى"، - دەپ ءتۇسىندىردى باسپا ءسوز قىزمەتىندەگىلەر.