قازاقستان رەسپۋبليكاسى تاۋەلسىزدىگىنىڭ 25 جىلدىعىن مەرەكەلەۋگە بايلانىستى وبلىس اكىمى ب.اتامقۇلوۆتىڭ توراعالىعىمەن 2016 جىلعى 19 قىركۇيەكتە وتكەن ماجىلىستە اۋداندار مەن قالالارعا، شالعايدا ورنالاسقان ەلدى مەكەندەردىڭ تۇرعىندارىنا مادەني قىزمەت كورسەتۋ ماقساتىندا وبلىستىق ونەر مەكەمەلەرىنىڭ گاسترولدىك ءىسساپارلارىن ۇيىمداستىرۋدى تاپسىرعان بولاتىن. وسىعان وراي، 2016 جىلعى 30 قىركۇيەك كۇنى ساعات 15.00-دە اكىمشىلىك-ىسكەرلىك ورتالىعىنىڭ الاڭىندا «ونەرىم ساعان – اۋىلىم» ق ر تاۋەلسىزدىگىنىڭ 25 جىلدىعىنا - 25 گاسترولدىك ساپار جانە   «كىتاپحانالىق  كەرۋەن – 25 اۋىلعا» جوباسى اياسىندا وبلىستىق 8 كاسىبي تەاتر، فيلارمونيا، «وڭتۇستىك-سيرك»، «وڭتۇستىكفيلم» مەكەمەلەرى مەن  وبلىستىق كىتاپحانالاردى ساپارعا شىعارىپ سالۋ سالتاناتى ءوتتى، - دەپ حابارلايدى Qamshy.kz.

بۇگىن «ونەرىم ساعان - اۋىلىم» گاسترولدىك ساپارىمەن وبلىستىق ءازىل-سىقاق جانە ساتيرا تەاترى تۇلكىباس اۋدانىنىڭ ماشات اۋىلىنا، وبلىستىق قۋىرشاق تەاترى سايرام اۋدانىنىڭ ىنتىماق اۋىلىنا، ق.جانداربەكوۆ اتىنداعى جەتىساي دراما تەاترى سارىاعاش اۋدانىنىڭ تەگىسشىل، تاسكەسكەن، جارتىتوبە، توڭكەرىس، قاپلانبەك اۋىلدارىنا، تۇركىستان قالاسىنىڭ سازدى-دراما تەاترى كەنتاۋ قالاسىنا گاسترولدىك ساپارلارىن باستاپ، «كىتاپحانالىق كەرۋەن – 25 اۋىلعا» اۆتوكەرۋەنى سايرام اۋدانىنىڭ  قارابۇلاق اۋىلىنداعى كەزدەسۋمەن جالعاسادى. ءار مادەنيەت جانە ونەر مەكەمەسى وبلىستىڭ بارلىق اۋداندارىنداعى 25 اۋىلعا توقتاپ، ءار ايالدامادا سپەكتاكلدەر مەن كونسەرتتىك، سيركتىك باعدارلامالار، كەزدەسۋ كەشتەرىن وتكىزەدى.

اعىمداعى جىلدىڭ جەلتوقسان ايىنا دەيىن جالعاسىن تاباتىن اتالمىش جوبا، تاۋەلسىزدىك كۇنى مەرەكەسى قارساڭىندا قورىتىندىلانادى.

سالتاناتتى ءىس-شاراعا وبلىس اكىمىنىڭ ورىنباسارى سادىبەكوۆ ۇلاسبەك سادىبەك ۇلى مەن جازۋشى، دراماتۋرگ، حالىقارالىق «الاش» ادەبي سىيلىعى مەن «پاراسات» وردەنىنىڭ يەگەرى مارحابات بايعۇت قاتىسىپ، اۋىل-ەلمەن جۇزدەسۋگە اتتانعالى تۇرعان ونەر ۇجىمدارىنا اق جول تىلەگىن ءبىلدىردى.