الماتى وبلىسى جامبىل اۋدانىندا بولعان قاندى قىلمىستاعى جابىرلەنۋشى تاراپتىڭ قورعاۋشىسى بەلگىلى بولدى، - دەپ حابارلايدى Qamshy.kz.

قىلمىسكەرلەردىڭ قولىنان قازا تاپقان جارقىنبەك دولدان ۇلى، مۇقيات زارلىحان ۇلى مەن قالدىبەك ءالىمحان ۇلىنىڭ تۋىستارى جابىرلەنۋشى تاراپتىڭ قورعاۋشىسى رەتىندە ادۆوكات مۇحتاريما كاربانوۆانى تاڭداعان.

قورعاۋشى بۇگىن اتالعان ءىس بويىنشا تەرگەۋشىلەرمەن جولىققانىن ايتادى.

«ءقازىر تەرگۋشىگە كىرىپ شىقتىم. تەرگەۋشى وسى ۋاقىتقا دەيىن قولدانىلعان شارالار تۋرالى ايتىپ بەردى. ءىستىڭ بەتالىسى جامان ەمەس سياقتى. ءقازىر الماتى وبلىستىق ىشكى ىستەر دەپارتامەنتى باستىعىنىڭ بۇيرىعىمەن ارنايى تەرگەۋ توبى قۇرىلاتىنى بەلگىلى بولدى. وسى ىسپەن قۇرامىنا بىرنەشە تەرگەۋشى، ارنايى مامان كىرەتىن سول توپ اينالىساتىن بولادى. ال، ىسكە كەلەر بولساق، بۇل وتە كۇردەلى جاعداي بولىپ وتىر. قىلمىس جاساعانىن مويىنداعان ەكى كۇدىكتىنىڭ بولۋىنا قاراماستان بارلىق كۋاگەرلەردەن جاۋاپ الىنۋى كەرەك. قىلمىستىڭ ءمان-جايى تولىق زەرتتەلۋى ءتيىس. ەندى ونىڭ بارلىعى تەرگەۋ توبىنىڭ قۇزىرەتىنە كىرەدى. جابىرلەنۋشى تاراپ قورعاۋشىسى تەرگەۋ اياقتالعان سوڭ عانا ءىس ماتەريالدارىمەن تانىسا الادى. بارلىعىن ۋاقىت كورسەتەدى»، - دەيدى قورعاۋشى مۇحتاريما كاربانوۆا.

م. كاربانوۆا قىلمىستىق ءىس جۇرگىزۋ كودەكسىنە ساي تەرگەۋدىڭ ەكى اي مەرزىمگە دەيىن سوزىلاتىنىن، قاجەتتىلىك تۋسا تەرگەۋ مەرزىمى ودان ءارى ۇزارتىلۋى مۇمكىن ەكەنىن ايتتى.

ەستەرىڭىزگە سالساق، 18 قىركۇيەكتە الماتى وبلىسى جامبىل اۋدانىندا جوعالعان ءۇش ازاماتتىڭ قىلمىسكەرلەر قولىنان قازا تاپقانى، وسى قىلمىسقا قاتىستى كۇدىكتى رەتىندە 24 قىركۇيەكتە ەكى ازاماتتىڭ ۇستالعانى حابارلانعان بولاتىن.