اقتوبەدە قارتتار كۇنى مەرەكەسى اتاۋسىز قالعان جوق. اسىرەسە، جەرگىلىكتى ەرلى-زايىپتىلاردىڭ جايعان داستارحانى قارتتاردىڭ كوڭىلىن كوتەرىپ تاستادى،- دەپ حابارلايدى Qamshy.kz Nur.kz-كە سىلتەمە جاساپ.

ەرحان بەگىمبەتوۆ پەن گۇلفايىز ابدىرەشيەۆا قاريالاردىڭ ومىرىندەگى اتاۋلى مەرەكەنى ۇمىت قالدىرماپتى. ولار وزدەرى يەلىك ەتەتىن "ەل-مۇرا" مەيرامحاناسىنىڭ ءبىر كۇنىن قازىنالى قارتتارعا ارنادى.

ەرلى-زايىپتىلار ارنايى مەكەمەدەن قالاداعى قاريالاردىڭ ءتىزىمىن الىپ، جيىرماعا جۋىق قارتقا كەڭ داستارحان جايدى. داستارحان باسىندا ءوز زامانداستارىمەن شۇيىركەلەسە كەتكەن قارتتار بي بيلەپ، ءان شىرقاپ وتىردى.

"مۇنداي داستارحان جايۋ كوپتەن بەرى ويىمدا جۇرگەن. ءبىز داتالى مەرەكەلەردى كەڭ كولەمدە اتاپ وتەمىز. ال قارتتار كۇنى كوپ جاعدايدا ەلەۋسىز قالىپ قويادى. جاسى كەلگەن قاريالاردى قۇرمەت تۇتۋ ءبىزدىڭ پارىزىمىز دەپ بىلەمىن. بۇگىنگى مەرەكەگە قاريالاردىڭ ادەمى كويلەگى مەن ويۋلى قامزولىن كيىپ كەلگەنىنىڭ ءوزى قانداي قۋانىش؟ كۇيبەڭ تىرلىكتەن باس كوتەرمەي جۇرگەندە قاريالارىمىزدى باعالاۋدى ۇمىتىپ تا كەتەمىز. سوندىقتان، بۇگىن ارقامنان جۇك تۇسكەندەي بولىپ، قاريالاردىڭ قۋانىشىنا مارقايىپ قالدىم"، - دەيدى گۇلفايىز ابدىرەشيەۆا.

وتىرىس سوڭىندا قوناققا كەلگەن قاريالاردىڭ بارلىعىنا شاعىن سىيلىقتار تاراتىلدى. اقتوبەلىك ەرلى-زايىپتىلار مۇنداي يگىلىكتى ىستەرىن ودان ءارى جالعاستىرماق.