استاناداعى ەسىل اۋداندىق №2 سوتىندا ق ر جۋرناليستەر وداعى ءتوراعاسى سەيىتقازى ماتايەۆ پەن ونىڭ ۇلى، «قازتاگ» حاا-نىڭ باسشىسى اسەت ماتايەۆتىڭ ءىسى بويىنشا ۇكىم وقىلدى، - دەپ حابارلايدى Qamshy.kz.

«س. ماتايەۆ ق ر قىلمىستىق كودەكسىنىڭ 245-بابى، 3-تارماعى، 190-بابى 4-تارماعى بويىنشا كىنالى دەپ تانىلىپ، جيىنتىعى 6 جىلعا باس بوستاندىعىنان ايىرىلسىن. ءا. ماتايەۆ ق ر قىلمىستىق كودەكسىنىڭ 190-بابى 4-تارماعى بويىنشا كىنالى دەپ تانىلىپ، 5 جىلعا باس بوستاندىعىنان ايىرىلسىن»، - دەدى ۇكىمدى وقىعان سۋديا اقبولات قۇرمانتايەۆ.

سونداي-اق، ەكى سوتتالۋشىنىڭ دا مۇلكى تاركىلەنىپ، ەكەۋى دە ءومىر بويى باسشىلىق لاۋازىمدار يەلەنۋ قۇقىعىنان ايىرىلدى.

سوت ۇكىمى وقىلعانعا دەيىن س. ماتايەۆتىڭ ءوزى «ەشقانداي «عاجايىپ» كۇتپەيمىز. ءبىراق، ءبىز ءوزىمىزدى كىنالى دەپ سانامايمىز. ءبىز بۇل شەشىمگە دە شاعىمدانامىز. قولداۋ ءبىلدىرىپ كەلگەندەرگە العىس ايتامىن. وسىنشا قيىندىققا توزگەن اسەتكە، مەنىڭ وتباسىما، ادۆوكاتىما العىس ايتۋ كەرەكپىز»، - دەگەن بولاتىن.  

بۇعان دەيىن سوتتاعى ءجارىسسوز كەزەڭىندە پروكۋرور ەرجان قۇراقبايەۆ سۋديادان سەيىتقازى ماتايەۆتى 6 جىل 8 ايعا، اسەت ماتايەۆتى 6 جىلعا سوتتاۋدى سۇراعان ەدى.

ۇكىم وقىلعان سوڭ ماتايەۆتاردىڭ ادۆوكاتى مادينا باكييەۆا ۇكىمگە قارسى شاعىم بەرەتىنىن حابارلادى.

پروكۋرور سونىمەن قاتار سەيىتقازى ماتايەۆتىڭ كاسىپكەرلىكپەن اينالىسۋىنا 3 جىلعا دەيىن تىيىم سالۋدى، اقپاراتتاندىرۋ جانە بايلانىس كوميتەتى مەن «قازاقتەلەكوم» كومپانياسىنا ولاردىڭ شاعىمى بويىنشا 169 ميلليون تەڭگە ءوندىرىپ بەرۋدى جانە «تولەنبەگەن سالىق» رەتىندە 216 ميلليون تەڭگە ءوندىرۋدى سۇرادى.

بيىل 22 اقپاندا «مەملەكەت قارجىسىن جىمقىرعان» جانە «سالىقتان جالتارعان» دەگەن كۇدىكپەن ۇستالعان سەيىتقازى ماتايەۆ 24 اقپاندا ءۇيقاماققا الىنعان. 28 ناۋرىزدا اسەت ماتايەۆ تا ءۇيقاماققا الىندى.

اكەلى-بالالى ماتايەۆتارعا قاتىستى سوت پروسەسى استانادا 23 تامىزدا باستالعان.