الماتى وبلىسى جامبىل اۋدانىنداعى قاندى قىلمىس شەكارا بەكەتىنىڭ ماڭىندا بولعان، - دەپ حابارلايدى Qamshy.kz.
بۇل تۋرالى پورتال تىلشىسىنە قىلمىس جاسالعان ورىنعا ارنايى بارىپ قايتقان مارقۇمداردىڭ تۋىستارى مەن جابىرلەنۋشى تاراپتىڭ ادۆوكاتى مۇحتاريما كاربانوۆا ايتىپ بەردى.
قىلمىسكەرلەر قولىنان قازا تاپقان مارقۇمداردىڭ تۋىستارى مەن جابىرلەنۋشى تاراپتىڭ قورعاۋشىسى قىلمىس ورنىمەن تانىسقاننان كەيىن تەرگەۋ بارىسىنا، العاشقى ساتىداعى تەرگەۋ امالدارىنا قاتىستى سۇراقتار تۋعانىن ايتادى.
«قىلمىس بولعان جەر «قاستەك» شەكارا بەكەتىنە جاقىن ورنالاسقان. وقيعا ورنىنا بارا جاتقان ءبىزدى دە شەكاراشىلار الىستان كورىپ، جانىمىزعا كەلدى. ءجون سۇراپ، قۇجاتتارىمىزدى تەكسەردى. ءبىز دە ولاردان 18 
قىركۇيەكتەگى وقيعاعا قاتىستى سۇرادىق. شەكاراشىلار 19 قىركۇيەك كۇنى ءبىر كولىكتى كورگەنىن، ونىڭ ىشىندە ءۇش-اق ادام بولعانىن ايتتى. مۇقيات مارقۇمنىڭ قالتاسىندا ول كۇنى جەكە قۇجاتى بولماعان. ول بۇعان دەيىن جەكە باس كۋالىگىنىڭ مەرزىمى ءبىتىپ، جاڭاسىنا ءوتىنىش بەرگەن. سوندا شەكاراشىلار مەملەكەتتىك شەكاراعا قۇجات تەكسەرىپ وتكىزگەندە ونى قالاي وتكىزگەن؟ باسقا كۋاگەرلەر كوردىك دەگەن ءۇشىنشى كولىك قايدا؟ بۇدان باسقا دا سۇراقتار تۋادى. ءۇش ازامات ولتىرىلگەن ورىنداردىڭ اراسى 100 مەتردەن اسپايدى. اتىلعان مىلتىق داۋىسىن ەشكىمنىڭ ەستىمەي قالۋى مۇمكىن ەمەس. ودان كەيىن قىلمىس بولعان جەر جۇك كولىگىنىڭ جۇرۋىنە وتە قولايسىز. ەشكىم مۇنداي جەرگە ءوز بەتىنشە اۋىر كولىكپەن كەلمەيدى. جول ءجۇرۋ وتە قيىن، كولىك اۋدارىلىپ كەتۋى مۇمكىن. سوندىقتان، قايتىس بولعان ازاماتتاردى قيناپ اكەلگەن دەپ ويلايمىز. تەرگەۋشىلەردىڭ ايتقانى مەن مىنا جەردەگى جاعداي ۇيلەسپەيدى. مايىتتەردى شوپپەن جاسىرعان دەيدى. ال، مۇندا ونداي ورىلعان ءشوپ جوق، قان ىزدەرى جوق. ءبىراق، ماشينانىڭ، مالدىڭ كەلگەن ىزدەرى انىق كورىنىپ تۇر»، - دەيدى مارقۇمداردىڭ ءبىرىنىڭ تۋىسى ەركىن بەيسەكەي.
ءۇش جىگىتتىڭ تۋىستارى سونداي-اق، قىلمىسكەرلەردىڭ ءمايىتتى الىپ جاسىرماقشى بولعان ءبىرىنشى كولىكتىڭ دە قۇيعا باتپاعانىن، سايعا قۇلاعانىن انىقتاعان.
«جاسىرامىز دەپ الىپ كەلە جاتىپ، الدارىنان مالدى اۋىل شىققان سوڭ اينالىپ قاشقان. سوندا كولىك سايعا ءتۇسىپ، كەپتەلىپ قالعان. ەندى سول جەرگە كەلىپ كولىكتى شىعارۋعا كومەكتەسكەن تراكتوريسى بار، ەلەكتريگى بار، كۋاگەرلەر، ۇلگىلى اۋىلىنىڭ تۇرعىندارى، كۇدىكتىنىڭ ءبىرىنىڭ بولەلەرى ايدوس، مۇرات ەسىمدى، بۇرىنعى ميليسيا قىزمەتكەرى دەلىنگەن كىسىلەردىڭ كولىك ۇستىندەگى مايىتتەردى كورمەۋى مۇمكىن بە؟ ارينە، مۇمكىن ەمەس. ولار ءبىلدى»، - دەيدى ە. بەيسەكەي.
سونداي-اق، مارقۇمنىڭ تۋىستارى قىلمىس ورنىندا تەرگەۋدە ايعاق بولاتىن، كولىكتىڭ دوڭگەلەگىنە تىرەيتىن ارنايى تەجەگىش قۇرال، اراق بوتەلكەسى، كىلت، باسقا دا زاتتاردىڭ سول جەردە قالىپ كەتكەنىن ايتادى.
جوعالعان ءۇش ازاماتقا تيەسىلى كولىكتەردىڭ ءبىرى تابىلعان قانشەڭگەل اۋلىنىڭ تۇرعىنى، مەيىربيكە بوپ ىستەيتىن ءسانيا ەسىمدى كەلىنشەك تە ورتەنگەن كولىك تۋرالى ايتىپ بەرگەن. ول كىسى ورتەنگەن كولىك جانىنان ەش ادام كورمەگەنىن، ءبىراق بالالارى كولىكتى سوندىرۋگە بارعاندا ول جەردەن بامپەرى جوق «مەرسەدەس» كولىگى شاڭداتىپ ءوتىپ كەتكەنىن كورگەن.
جابىرلەنۋشى تاراپتىڭ ادۆوكاتى مۇحتاريما كاربانوۆا دا قىلمىس ورنىنا بارعان.
«ارنايى قىلمىس ورنىنا بارىپ قايتتىق. ماقسات قىلمىس ورنىن ءوز كوزىمىزبەن كورىپ، وندا مارقۇمداردىڭ بارعان جولىن كورۋ بولدى. كۇدىكتىلەردىڭ ارەكەتتەرى تۋرالى بۇعان دەيىن تەرگەۋشىلەر ايتىپ بەرگەن بولاتىن. وقيعا ورنىنا بارا جاتقاندا شەكاراشىلار توقتاتتى. ولارعا بولعان جايدى ايتتىق. ولارعا دا سۇراق قويدىق. شەكاراشىلارعا مال ايداپ بارا جاتقاندارىن ايتىپتى كۇدىكتىلەر. ول تۋرالى شەكاراشىلاردىڭ قىزمەت كىتاپشاسىندا دا جازىلعان ەكەن جانە ءبىر ادامدا جەكە كۋالىك بولماعان. بۇل دا سۇراق تۋعىزادى»، -دەيدى ادۆوكات.
ادۆوكات قىلمىس ورنىنىڭ كولىكپەن بارۋعا وتە قولايسىزدىعىنا جانە ول جەردىڭ مال ساتاتىن، ساۋدالاساتىن جەرگە ۇقسامايتىنىن، مارقۇمداردىڭ ول جەرگە قانداي سوزگە سەنىپ بارۋى مۇمكىن ەكەنىنە نازار اۋدارۋ كەرەك دەپ سانايدى.
«جولدىڭ ءوزى سونداي تار. كولىكپەن بارۋ قولايسىز. ولاردى كۇش قولدانىپ، قورقىتىپ اپارۋى مۇمكىن. بۇل سۇراقتاردىڭ بارلىعىن ءبىز تەرگەۋ توبىنا قويىپ، جاۋاپ الاتىن بولامىز»، - دەيدى ادۆوكات م. كاربانوۆا.
ەستەرىڭىزگە سالساق، 18 قىركۇيەك كۇنى الماتى وبلىسى جامبىل اۋدانىندا مال ساتۋعا شىققان كوكسۋ اۋدانىنىڭ ءۇش بىردەي تۇرعىنى جوعالىپ، ولاردىڭ قىلمىسكەرلەر قولىنان قازا تاپقانى 24 قىركۇيەك كۇنى حابارلاندى. اتالعان قىلمىسقا قاتىستى ەكى كۇدىكتى قاماۋعا الىندى. كۇدىكتىلەر پوليسياعا وزدەرىنىڭ ءۇش ازاماتتى ءولتىرىپ، مالدىڭ تەزەگىمەن كومىپ كەتكەندەرىن ايتقان.
ەرلان تولەۋباي
