ەلىمىزدە نەگىزگى ەرەجەلەرى زاڭعا باعىنىستى اكتىمەن رەتتەلەتىن سوتقا دەيىن رەتتەۋدىڭ جاڭا ينستيتۋتى – اپەللياسيا كوميسسياسىن قۇرۋ ۇسىنىلادى. بۇل تۋرالى بۇگىن وتكەن ۇكىمەت وتىرىسىندا ۇلتتىق ەكونوميكا ءمينيسترى قۋاندىق بيشىمبايەۆ ايتتى، - دەپ حابارلايدى Qamshy.kz.
«قازاقستان رەسپۋبليكاسىنىڭ كەيبىر زاڭنامالىق اكتىلەرىنە سالىق سالۋ جانە كەدەندىك اكىمشىلەندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى بويىنشا سويلەگەن سوزىندە مينيستر سونىمەن قاتار مونيتورينگ جۇرگىزۋگە جاتاتىن ءىرى سالىق تولەۋشىلەر تىزبەسىن قۇرۋ ءتارتىبىن ناقتىلاناتىنىن ايتتى.
«مونيتورينگ جۇرگىزۋگە جاتاتىن سالىق تولەۋشىلەردەن ءوز قىزمەتى شەڭبەرىندە تابىس الۋ ماقساتىن كوزدەمەيتىن ۇيىمدار رەتىندە كوممەرسيالىق ەمەس ۇيىمداردى جانە رەسپۋبليكالىق مەملەكەتتىك كاسىپورىندار الىپ تاستاۋدى ۇسىنامىز. سەبەبى، اتالعان ۇيىمدار مەملەكەتتىك مۇلىك تۋرالى زاڭناماعا سايكەس ەسەپتىلىك ۇسىنادى»، - دەدى ق.بيشىمبيەۆ.
ول اتالعان تىزبەگە قالا ءتۇزۋشى ساناتىنا جاتقىزىلعان جەر قويناۋىن پايدالانۋشى زاڭدى تۇلعالار مىندەتتى تۇردە ەنگىزىلەتىنىن ايتتى.
سونىمەن بىرگە، اقپارات الماسۋ بويىنشا حالىقارالىق ءوزارا ءىس-قيمىل، ەلەكتروندى ءاۋديتتى ەنگىزۋ مەرزىمدەرىن ۇزارتۋ، ۆاليۋتا اۋىستىرۋدىڭ نارىقتىڭ باعامىن ايقىنداۋ ماسەلەلەرىندە، بەيرەزيدەنتتىڭ رەزيدەنتتىكتى راستاۋ ءتارتىبى بولىگىندە تۇزەتۋلەر ەنگىزىلەدى.
ال كەدەندىك اكىمشىلەندىرۋگە قاتىستى ۋاقىتشا ساقتاۋ قويمالارى، ۋاكىلەتتى ەكونوميكالىق وپەراتورلاردىڭ قىزمەتى، كەدەندىك ءترانزيتتى وڭتايلاندىرۋ جانە كەدەندىك وپەراسيالاردى جۇزەگە اسىرۋ بويىنشا تۇزەتۋلەر ەنگىزۋ ۇسىنىلىپ وتىر.
