«نۇر وتان» پارتياسى ءتوراعاسىنىڭ ءبىرىنشى ورىنباسارى مۇحتار قۇل-مۇحاممەد، دەنساۋلىق جانە الەۋمەتتىك دامۋ ءمينيسترى تامارا دۇيسەنوۆا مەن ءبىلىم جانە عىلىم ءمينيسترى ەرلان ساعادييەۆ ءوزارا ارىپتەستىك تۋرالى مەموراندۋمعا قول قويدى، - دەپ حابارلايدى Qamshy.kz.

مەموراندۋم اياسىندا جوعارى وقۋ ورىندارىنا تۇسپەگەن، ۇبت تاپسىرماعان مەكتەپ تۇلەكتەرىنە قولداۋ جاسالماق.

بيىل قازاقستاندا 122 مىڭ بالا مەكتەپ بىتىرگەن. ولاردىڭ 70 مىڭعا جۋىعى ۇبت-نى ءساتتى تاپسىرسا، 37 مىڭنان استامى تەستىلەۋگە قاتىسپاعان. قالعان 14 مىڭى سىناقتان وتپەي قالعان. وسى جوو-عا تۇسە الماي قالعان جاستاردى جۇمىسپەن قامتۋ تۋرالى تاپسىرمانى 9 قىركۇيەك كۇنگى ۇكىمەتتىڭ كەڭەيتىلگەن جيىنىندا ەلباسىنىڭ ءوزى قويعان بولاتىن.

«ءبىز ورىنداۋعا كىرىسكەن پرەزيدەنت تاپسىرماسى بىردەن بىرنەشە ماڭىزدى ماسەلەنى شەشەدى. بىرىنشىدەن، ەڭ باستىسى ءبىز جاستارعا جۇمىس تابۋعا، ءوز بەتىنشە ءومىر سۇرۋىنە مۇمكىندىك تۋعىزامىز. ەكىنشىدەن، وسى ارقىلى ءبىز «نۇرلى جول» باعدارلاماسى اياسىندا جاڭا جوبالارعا جۇمىس كۇشىن شەشەمىز. ۇشىنشىدەن، جاستاردى ءتۇرلى كۇماندى ۇيىمداردان قورعايمىز. بۇل اۋقىمدى دا ماڭىزدى ءىس»،-دەيدى م. قۇل-مۇحاممەد.