پاكىستان پارلامەنتى وتباسىنىڭ ار-ۇجدانىنا نۇقسان كەلتىرگەن جاندى ولتىرگەن ادامعا قولدانىلاتىن جازانى كۇشەيتتى، - دەپ حابارلايدى Qamshy.kz حابار24-كە سىلتەمە جاساپ.
جاڭا زاڭ بويىنشا ەندى وسى سەبەپپەن كىسى ولتىرگەن قاندى قول قىلمىسكەر كەمى 25 جىلعا باس بوستاندىعىنان ايىرىلادى. بۇعان دەيىن وتباسىنىڭ نامىسىن اياققا تاپتادى دەپ ايىپتالعان ادامدى ولتىرگەن كىسى وتباسى مۇشەلەرىمەن كەشىرىلسە، ۇكىمەت ول ادامدى ەشقانداي جازاعا تارتپايتىن. ەندى ول كەشىرىم ءولىم جازاسىنا كەسىلگەن ادامنىڭ عانا جازاسىن جەڭىلدەتۋگە كومەكتەسە الادى.
ايتا كەتەيىك، پاكىستاندا جىل سايىن وتباسىنىڭ ار-ۇجدانىنا نۇقسان كەلتىردى دەگەن ايىپپەن مىڭداعان ايەل اجال قۇشادى. ماسەلەن، وسى جىلدىڭ شىلدە ايىندا ىس-ارەكەتى وتباسىنىڭ ار-ۇجدانىنا نۇقسان كەلتىردى دەگەن جەلەۋمەن پاكىستاندا تانىمال مودەل جانە بلوگەر قىزدى ءوز اعاسى بۋىندىرىپ ولتىرگەن.
