الماتىدا پوليسيا قىزمەتكەرلەرىنە شابۋىل جاساعان اتىشۋلى رۋسلان كۇلىكبايەۆ پەن ونىڭ 5 سىبايلاسى سوتقا جىبەرىلدى، - دەپ حابارلايدى  Qamshy.kz قازاقپاراتقا  سىلتەمە جاساپ. 

قالا پروكۋراتۋراسىنىڭ سايتتاعى مالىمەتتەرىنە قاراعاندا، ق ر باس پروكۋراتۋراسىنىڭ ۆەدومستۆوارالىق تەرگەۋ توبى ارنايى پروكۋروردىڭ باسشىلىعىمەن الماتىدا 2016 جىلدىڭ 18-شىلدەسى كۇنى بولعان تەرروريستىك اكتكە بايلانىستى قىلمىستىق ءىس بويىنشا سوت الدىنداعى تەرگەۋ جۇمىستارى اياقتادى. 

كۇلىكبايەۆ بىرنەشە قانقۇيلى توناۋ جانە قاراقشىلىق ارەكەتتەرگە قاتىستى بولىپ وتىر. تەرگەۋ امالدارى باستالعان العاشقى كۇننەن باستاپ-اق قالا پروكۋرورى قاداعالاۋ جۇمىستارىنىڭ ءتيىمدى بولۋىن قامتاماسىز ەتۋ ءۇشىن پروسەسسۋالدى پروكۋرورلار توبىن قۇردى. ولار تەرگەۋ جۇمىستارىنىڭ بارىنشا قىسقا مەرزىمدە اياقتالۋىنا ىقپال ەتتى.

تەرگەۋ توبى 57 سوت ساراپتاماسى مەن زەرتتەۋلەر جۇرگىزدى جانە بولعان وقيعانىڭ بارلىق جايتتەرىن انىقتاۋ ماقساتىندا 200-دەن استام كۋاگەرلەر مەن وقيعانى كورگەن ادامداردى تەرگەدى. 

2016 جىلدىڭ 12 قازانىندا 60 تومنان تۇراتىن قىلمىستىق ءىستىڭ ماتەريالدارىن زەرتتەۋ ناتيجەسى بويىنشا، سوتقا كۇلىكبايەۆ پەن وزگە دە ازاماتتار جولداندى.

ر.كۇلىكبايەۆقا ناتيجەسى 8 قۇقىق قورعاۋ جانە ارنايى ورگانداردىڭ قىزمەتكەرلەرىنىڭ جانە 2 بەيبىت تۇرعىننىڭ ولىمىنە الىپ كەلگەن تەرروريستىك اكت جاسادى دەگەن ايىپ تاعىلدى. سونىمەن قاتار ول 3 بەيىبىت تۇرعىندى ولتىرمەك بولدى دەپ ايىپتالىپ وتىر.

سونداي-اق ر.كۇلىكبايەۆپەن بىرگە سوتقا اتىس قارۋىن زاڭسىز ساقتاپ، وزىمەن بىرگە الىپ ءجۇرىپ، دايىنداپ، ر.كۇلىكبايەۆپەن بىرگە م. اتتى كاسىپكەردىڭ ۇيىنە قاراقشىلىق شابۋىل ۇيىمداستىرعان ر.ليۋ، ج.ساپاربەكوۆ، د.اسەمبەك ۇلى، ە.قۇسايىنوۆ، ن.ءابدىمومىن دا سوتقا بەرىلدى.

قىلمىستىق ءىس الماتى قالاسىنىڭ قىلمىستىق ىستەر جونىندەگى ارنايى مامانداندىرىلعان اۋدانارالىق سوتىنا جولداندى.