قازاقستاننىڭ باتىس ايماقتارىندا ءداستۇرلى ەمەس ءدىني اعىمداردى ۇستانعان ادامداردىڭ مەكتەپ جاسىنداعى بالالارى مەملەكەتتىك ءانۇراندى ورىنداۋدان جانە دەنە شىنىقتىرۋ مەن سۋرەت ساباقتارىنا قاتىسۋدان باس تارتىپ وتىر دەپ،  حابارلايدى Qamshy.kz NUR.KZ – كە سىلتەمە جاساپ.

ءداستۇرلى ەمەس ءدىني اعىمداردى ۇستانۋشىلار تاراپىنان تونگەن ءقاۋىپ قازاقستان مەكتەپتەرىنە دە جەتكەن ءتارىزدى. جەرگىلىكتى بيلىك ورگاندارىنىڭ حابارلاۋىنشا، اتىراۋ، اقتوبە جانە ماڭعىستاۋ وبلىستارىندا 200 جۋىق وقۋشى مەن ستۋدەنت جاستار اگرەسسيۆتى ءدىني اعىمدارعا بەت بۇرعان.

اتا-انالاردىڭ ايتۋىنشا، حيدجاب كيگەن قىزدار قازاقستان رەسپۋبليكاسىنىڭ ءانۇرانىن ورىنداۋدان باس تارتىپ، ونى ورىنداۋ كەزىندە ورىندارىنان تۇرمايدى، دەنە شىنىقتىرۋ مەن سۋرەت ساباقتارىنا ادەيى قاتىسپايدى. باسقا وقۋشىلار مەن اتا-انالار مۇنداي ارەكەتتەردەن قاۋىپتەنىپ وتىر، جوعارىدا اتالعان بالالار قۇربىلارىن «دۇرىس ەمەس مۇسىلماندار»، «وپاسىزدار» دەپ ءتىل تيگىزەدى، اگرەسسيا تانىتىپ، «ناعىز يسلام» جولىنا تۇسۋگە ۇگىتتەيتىن كورىنەدى.

مەكتەپتەردە حيدجاب كيۋگە تىيىم سالىنعانىنا قاراماستان، اتا-انالار قىزدارعا ورامال تاعۋدى توقتاتپاي كەلەدى.

قوعام قايراتكەرى اياگۇل ميرازوۆانىڭ ايتۋىنشا، مەملەكەت بويىنشا اتا-انالار مەن مۇعالىمدەردىڭ باسىم بولىگى بەلگىلەنگەن ەرەجەنى ۇستاناتىن كورىنەدى.

«قىزمەت بابىمەن قازاقستاننىڭ ءتۇرلى ايماقتارىندا ءجيى بولامىن. ەلىمىزدە مىندەتتى مەكتەپ فورماسىنا قويىلاتىن تالاپتارعا قاتىستى وڭ كوزقاراس قالىپتاسقان دەپ سەنىممەن ايتا الامىن. اتا-انالار ءبىرىڭعاي مەكتەپ فورماسىنىڭ بالالار ءۇشىن اسا ىڭعايلى ءارى ءتيىمدى ەكەندىگىن جاقسى تۇسىنەدى. سوندىقتان ءبىرىڭعاي ەرەجەلەردى ساقتاي وتىرىپ، ءبىزدىڭ ۇتارىمىز كوپ. كيىمگە نەمەسە دىنگە قاتىستى ماسەلەلەرگە ەمەس، بالالاردىڭ ءبىلىم دەڭگەيىنە جانە ولاردى تولىققاندى وقىتۋعا باسىمدىق جاساۋ كەرەك»، - دەپ اتاپ ءوتتى قوعام قايراتكەرى.

ەڭ قورقىنىشتىسى، بالالار قازاق مەملەكەتتىلىگى مەن مادەنيەتىن جوققا شىعارىپ، جەرگىلىكتى جانە ورتالىق بيلىكتى جەك كورەدى.