بۇگىن قازاقستان ۆيسە-پرەمەرى يمانعالي تاسماعامبەتوۆتىڭ توراعالىعىمەن جوعارى وقۋ ورىندارىنىڭ رەكتورى لاۋازىمىنا ۇمىتكەرلەردى انىقتاۋ جونىندەگى رەسپۋبليكالىق كونكۋرستىق كوميسسيانىڭ العاشقى وتىرىسى ءوتتى، - دەپ حابارلايدى Qamshy.kz.
ەسكە سالا كەتسەك، جاڭا تالاپتارعا سايكەس رەكتورلاردىڭ تاعايىندالۋى اشىق كونكۋرس نەگىزىندە جۇرگىزىلەدى. رەسپۋبليكالىق كوميسسيا قاراۋىنا جوعارعى وقۋ ورنىنىڭ باقىلاۋشى كەڭەسى ۇشتەن كەم ەمەس كانديداتتى ۇسىنادى. كوميسسيا قاتىسۋشىلاردىڭ وقۋ ورنىن دامىتۋ باعدارلاماسىن تىڭداپ، سۇقبات جۇرگىزەدى. سونىڭ ناتيجەسىندە جوو-نىڭ رەكتورى لاۋازىمىنا كانديداتتى انىقتايدى.
كوميسسيانىڭ قاراۋىنا 21 ۇمىتكەردىڭ قۇجاتتارى كەلىپ ءتۇستى. اتاپ ايتقاندا، ح. دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنەن – 5 ادام، ءى. جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنەن – 5، قوستاناي مەملەكەتتىك پەداگوگيكالىق ينستيتۋتىنان – 6 جانە پاۆلودار مەملەكەتتىك پەداگوگيكالىق ينستيتۋتىنان – 5 ۇمىتكەر ۇسىنىلدى.
اعىمداعى ايدىڭ قازان ايىندا جوو-نىڭ باقىلاۋشى كەڭەستەرىنىڭ وتىرىستارى وتكىزىلدى، وندا ۇمىتكەرلەر ۇسىنعان وقۋ ورنىن دامىتۋ باعدارلامالارى قارالدى. ونىڭ قورىتىندىسىندا ججو-نىڭ باقىلاۋشى كەڭەستەرى قۇپيا داۋىس بەرۋ ارقىلى رەسپۋبليكالىق كوميسسيا قاراۋىنا ۇسىنۋ ءۇشىن كانديداتتاردى انىقتادى. ايتا كەتەيىك، جوو-نىڭ رەكتورلارى داۋىس بەرۋگە قاتىسقان جوق.
باقىلاۋشى كەڭەستەردىڭ حاتتامالىق شەشىمدەرى بارلىق قۇجاتتارىمەن بىرگە رەسپۋبليكالىق كوميسسياعا ۇسىنىلدى. ح. دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنەن ۇسىنىلعان 5 ادامنىڭ ىشىنەن 2 ۇمىتكەر، ءى. جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنەن ۇسىنىلعان 5 ادامنىڭ ىشىنەن 2 ۇمىتكەر، قوستاناي مەملەكەتتىك پەداگوگيكالىق ينستيتۋتىنان 6 ادامنىڭ 3ء-ۋى، پاۆلودار مەملەكەتتىك پەداگوگيكالىق ينستيتۋتىنىڭ 5 ۇمىتكەرى ىشىنەن 1 كانديداتتىڭ قۇجاتى ۇسىنىلدى.
«سىزدەر وقۋ ورنىنىڭ پەداگوگيكالىق باعىتىن ساقتاپ قالۋدىڭ ماڭىزىن ەسكەرۋلەرىڭىز قاجەت. ەگەر دە سىزدەر زاڭ جانە ەكونوميكا سياقتى جاڭا تانىمال ماماندىقتاردى ەنگىزۋگە ۇمتىلاتىن بولساڭىزدار، وزدەرىڭىز باسشىلىق ەتىپ وتىرعان وقۋ ورداسىنىڭ نەگىزگى ورنىن جوعالتىپ الاسىزدار. ويتكەنى، كەز-كەلگەن كاسىپتىڭ نەگىزى ۇستاز سانالادى» - دەدى جوو-نىڭ دامۋ باعدارلاماسىن تالقىلاۋ بارىسىندا ءسوز العان يمانعالي تاسماعامبەتوۆ.
بۇل جاڭاشىلدىق قازاقستاندىق جوعارعى وقۋ ورىندارىنىڭ باسقارۋ قۇرامىن ساپالى تولتىرۋ جانە باسقارۋ دەربەستىگىن ۇلعايتۋ، سونداي-اق، قوعام الدىنداعى ەسەپتىلىكتى كۇشەيتۋ قاجەتتىگىنەن تۋىنداپ وتىر.
بۇعان دەيىن مەملەكەتتىك جوعارعى وقۋ ورىندارىنىڭ رەكتورلارى ق ر ءبىلىم جانە عىلىم ءمينيسترىنىڭ جەكە شەشىمىمەن تاعايىندالىپ كەلدى. سوندىقتان، رەكتورلار كورپۋسىنىڭ ءبىراز بولىگى اتالعان لاۋازىمدا 3 جىل سايىن 2 مەرزىمنەن اسا ۋاقىت يەلەنىپ كەلدى. ناتيجەسىندە بۇگىنگى تاڭدا رەكتورلاردىڭ 40 پايىزى زەينەت جاسىندا نەمەسە زەينەتكە دەيىنگى جاستا، بۇل ءوز كەزەگىندە باسقارۋ ۇتقىرلىعىن تومەندەتەدى.
جوو-نىڭ دامۋ باعدارلاماسىن تالقىلاۋ جانە سۇقبات قورىتىندىسى بويىنشا رەسپۋبليكالىق كونكۋرستىق كوميسسيا بوس لاۋازىمدارعا ۇسىنىلعان ۇمىتكەرلەردى قاراپ، ح. دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ رەكتورى لاۋازىمىنا تاعايىنداۋعا تالتەنوۆ ابزال احاتۇلىن، قوستاناي مەملەكەتتىك پەداگوگيكالىق ينستيتۋتىنىڭ رەكتورى لاۋازىمىنا ءابىل ەركىن امانجولۇلىن ۇسىندى.
سونىمەن قاتار، ءى. جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتى مەن پاۆلودار مەملەكەتتىك پەداگوگيكالىق ينستيتۋتىنىڭ رەكتورى لاۋازىمدارىنا كانديداتتار انىقتالعان جوق. وسىعان وراي، ق ر ءبىلىم جانە عىلىم مينيسترلىگىنە كونكۋرستى جارامسىز دەپ تانۋ جانە ونى قايتا وتكىزۋ تاپسىرىلدى.
