بۇگىن قاراشانىڭ 7ء-ى كۇنى «مۋزارت» توبىنىڭ مۇشەسى، تانىمال ءانشى، عاجاپ قوڭىر داۋىستىڭ يەسى مەيرامبەك بەسپايەۆتىڭ دۇنيەگە ەسىگىن اشقان كۇنى. ءان اتاۋلىسىن جۇرەكپەن سەزىنىپ ايتاتىن مەيرامبەك ەل اۋزىنان ەشقاشان تۇسكەن ەمەس. «بوزتورعايدى» جاقسى كورەتىن، «قوشتاسقىسى كەلمەيتىن» ول بيىل قىرىق جاسقا كەلىپ وتىر. ءوزىنىڭ قىرىق جاسى تۋرالى مەيرامبەك ينستاگرام الەۋمەتتىك جەلىسىندە بىلاي دەپتى: «كەشەگى جۇرگەن بالا ەدىك، كەلىپ تە قاپپىز قىرىققا». qamshy.kz پورتالى قازاقتىڭ سۇيىكتى ۇلىن تۋعان كۇن مەرەكەسىمەن قۇتتىقتاي وتىرىپ، اقىن ەربول بەيىلحاننىڭ مەيرامبەك بەسپايەۆقا ارناپ جازىلعان ولەڭىن نازارلارىڭىزعا ۇسىنادى.

قىزداردىڭ تىلەگى

مەيرامبەك بەسپايەۆقا! 

«قىزدىڭ جاسى ون سەگىز» سۇراما، اعا!؟ 
ءومىر سىرعىپ بارادى تۇرا ما، اعا!.. 
ميلليونداعان قىزداردىڭ ارمانى ءۇشىن، 
تۋ تىككەن بيىگىڭنەن قۇلاما ا-ع-ا! 

سىزگە ارناپ تەرگەم ەركە گۇلدەرىمدى، 
كورسەڭىز عوي، ءبىر كەلىپ كۇلگەنىمدى... 
ءسىز سالعان اۋەندەردى جۇرەككە وراپ، 
وتكىزىپ، ءجۇرمىن اعا، كۇندەرىمدى... 

قايتەمىن، سەزىم نازىك، بۇرشىگىمدى، 
ەشكىمگە ايتا المايمىن بۇل سىرىمدى. 
ازىرشە اۋەن عانا تەربەتەدى، 
سوعاتىن جۇرەك دەگەن تىلسىمىمدى. 

ولەڭ دە ءومىر ەكەن، ەسى بارعا، 
ارنامىز اق ايدىننان قوسىلار ما؟.. 
مۋزارت-تىڭ مۇزبالاعى ءسىز شىققاندا، 
وتىرام ءۇنسىز قاراپ ەكرانعا!... 

شاشىڭىزعا، قوپ-قويۋ قاسىڭىزعا، 
ءتاڭىرىم، ب ا ق سىيلاسىڭ باسىڭىزعا! 
قاراقاتتاي جانارىم جاۋتەڭ قاعىپ، 
شاي قۇيىپ وتىرار ما ەم، قاسىڭىزدا... 

قىلىعىم، وعاش بولسا، تەرگەيسىز بە؟ 
قىزعالداق تەرگۋگە دە كەلمەيسىز بە؟ 
ۇزدىككەن ەكراندا ميلليون ارۋ، 
شىنىمەن، اعا ءبىزدى كورمەيسىز بە؟... 

توشالا تەرگەندە الام كوك سەبەپتى، 
اۋەنىڭىز، جان اعا، كوككە كەتتى. 
ءسىز جايلى قوس قۇربىما سىر ايتىپ ەم، 
ەكەۋى مەنى قاتتى وكپەلەتتى... 

جاقسىعا تىلەكشى بۇل ەل جۇرەگى، 
كوڭىلدىڭ كوك ايدىنىن ەلجىرەدى. 
ءان تۇگىل وزىنە دە عاشىقپىز دەپ، 
قۇربىمنىڭ بوتا كوزى مولدىرەدى. 

ءان سىيلاپ، ءجۇرشى اعا، تاڭىمىزعا، 
ونەردى ءسۇيۋ بار-اۋ قانىمىزدا. 
امال نە، قىزدىڭ ءبارى تىلەكشىمىز، 
سالەم ايتا سالىڭىز، جارىڭىزعا!